مراجعة لعبة

Star Wars Jedi: Survivor

في الفترة الأخيرة EA بدأت تستعيد الأمجاد بألعاب القصة والسنجل بلاير من جديد

بعد ما كان التوجه بتاعها اتقلب ناحية الألعاب الأونلاين والألعاب الخدمية بشكل أساسي

الظاهر إن الشركة رجعت لطريقها الصحيح ورجعت تعمل نوع الألعاب اللي كلنا بنحبه

وبدأت السنة بداية قوية مع ريميك ديد سبيس

لعبة قصة تديك عدد ساعات محترم من اللعب

ومتحتاجش تشتري حاجة زيادة فوق اللعبة، لا تقولي سيزون باس ولا عملات جوا اللعبة..

وده يجيبنا للعبة Star Wars Jedi: Survivor

الجزء التاني بعد لعبة Star Wars Jedi Fallen Order اللي نزلت في 2019 وحققت نجاح كبير

من تطوير استوديو Respawn الاستوديو اللي اشتغل على سلسلة Titanfall ولعبة Apex Legends

فـ هل نجح الاستوديو إنه يتفوق على نفسه بجزء جديد من سلسلة ستار وورز؟

بعد 30 ساعة لعب، دي مراجعتنا للعبة Star Wars Jedi: Survivor.

بص أنا جايلك بعد ما اللعبة نزلت بشوية ومراجعاتها كمان نزلت

فـ أنت غالبا عارف هي فيها ايه من دلوقتي، عشان كدة انا مش جاي اقولك كلام أنت سمعته قبل كدة

كلنا عارفين دلوقتي إن اللعبة حلوة جدا بس مشكلتها الأداء التقني الكارثي

عشان كدة انا جاي اقولك هي ليه حلوة ، ومش بس كدة، هقولك ليه انا شايفها تترشح للعبة السنة كمان

وأكيد بردو هنتكلم عن الأداء التقني كعادة مراجعاتنا

القصة

بتبدأ قصتنا بعد 5 سنين من قصة الجزء اللي فات

على كوكب كروسانت بنشوف كال مقبوض عليه وهيتسلم لواحد من القيادات في الإمبراطورية

بس بعدها بنكتشف إنه فخ من كال وإنه جاي مع أصحابه وعاملين فيلم عشان يسرقوا معلومات مهمة عن الإمبراطورية

المهم بعدها بنعرف إن كال انفصل عن صحابه اللي كانوا معاه في الجزء اللي فات

وبقى دلوقتي شغال مع زعيم المناضلة Saw Gerrera وبيحاربوا الإمبراطورية على أد ما يقدروا

بيعدي شوية وقت وكال بيلاحظ إنه كل السنين اللي فاتت دي كانت مضيعة وقت،

وإن الإمبراطورية بتزيد قوتها يوم ورا التاني بالرغم اللي بيعمله

وبيدخل حالة من اليأس والصراع النفسي، وبيشكك في اللي بيعمله دا كله

لحد ما بيكتشف بالصدفة إن فيه كوكب بعيد محدش قدر يوصله قبل كدة ما عدا الجيداي القُدام

من زمان أوي قبل 200 سنة مثلًا

ف بيقرر إن الكوكب ده هو الملاذ الأخير للي عايزين يهربوا من الإمبراطورية وظلمها

وبيبدأ يمشي على توجيهات جماعة الجيداي القدماء في رحلته للبحث عن الكوكب ده

واللي بتكون رحلة صعبة ومليانه تقلبات ولحظات مجنونة ولحظات تانية حزينة.

القصة مدتها 20 ساعة تقريبًا لو هتلعب المحتوى الرئيسي بس على صعوبة متوسطة.

طول مدة القصة محسيتش بملل أو تكرار في المهمات ما عدا في جزء بسيط في نص الأحداث

لكن غير كدة، القصة ممتعة ومكتوبة حلو أوي، وكمان فيها لحظات هتعلق في دماغك لوقت طويل

من أكبر مميزات القصة هي الشخصيات الجانبية والاهتمام الكبير بيها هنا

سواء الشخصيات القديمة زي Cere أو Merrin أو شخصيات جديدة زي Bode

وخد بالك من Bode ده بالذات عشان ده فعلا من أحسن شخصيات اللعبة

وبقى من شخصيات عالم ستار وورز المفضلين بالنسبالي

حاجة كمان هي التركيز على الأشرار أو الـ Villains

كان واضح الاهتمام بتقديم كل شرير وتوضيح دوافعه وماضيه

وده تم عن طريق تسجيلات بتلاقيها أو ذكريات بتتفرج عليها أو حوارات مباشرة مع الأشرار نفسهم

وحاجة زي دي انعكست على حلاوة البوص فايتس أو معارك الزعماء

لأنك مش بتحارب واحد قوي كدة وخلاص، لا دا فيه تاريخ وقصة ورا الراجل ده

وعنده دوافعه وأسبابه اللي ممكن تتعاطف معاها كمان

هنتكلم أكتر عن معارك الزعماء قدام في المراجعة..

السرد هنا كان زي الجزء اللي فات بس بشكل أكبر وأحسن كمان

فـ زي ما قلتلك هتلاقي ذكريات وتسجيلات تقدر تسمعها وتشوفها

والمحرك الرئيسي للأحداث هو إنك بتمشي على خطى جيداي ماستر قديمة

بالظبط زي ما حصل مع Cordova في الجزء اللي فات وكان هو المرشد ليك في رحلتك

بس زي ما قلتلك هنا السرد شامل أكتر من الجزء اللي فات، فالاعتماد مكانش على إرشاد القدماء وبس

لا فيه حبكات وشخصيات دوافعها بتتغير وليها أعذار وعواقب لأفعالها

وكل ده بينعكس عليك وعلى رحلتك

بشكل عام القصة جرعة من العظمة والمتعة اللي هتخليك مشدود طول ما انت بتلعب

بس خد بالك لازم تلعب الجزء اللي فات قبل ما تخش على الجزء ده

أسلوب اللعب

طيب قبل أي حاجة خليني أقولك إني قومت من على اللعبة بالعافية عشان أعمل المراجعة دي

يعني أنا مخلصها وقربت أخلص المحتوى الجانبي وعيدت اللعبة من تاني

ولسة عايز أكمل لعب ومش حاسس بأي زهق

ده ببساطة يا صديقي عشان الجيمبلاي هنا عبقري وإدمان بدون مبالغة.. خليني أشرحلك

اللعبة بتديلك 5 وضعيات مختلفة للسيف

وضعية السيف الفردي العادي – السيف المزدوج بيكون سيفين لازقين في بعض – السيفين المنفصلين – سيف فردي ومسدس –  والسيف الطويل أوي والتقيل أوي

كل وضعية من دول ليها استخدام مختلف، حركات مختلفة، قدرات مختلفة، وفعليًا كل ما تغير السيف هتحس إن اللعبة اتغيرت أصلا

يعني السيف المزدوج الطويل ده تستخدمه قدام مجموعة كبيرة من الأعداء عشان تخلص عليهم بسرعة وتخليهم بعيد عنك

السيفين المنفصلين دول أسرع وضعية من الخمس وضعيات، وتستخدمهم لو قدامك زعيم رخم ومش بتلحق تضربه ضربتين على بعض

السيف مع المسدس تستخدمهم لو فيه واحد بعيد مش عارف توصله وبيضرب عليك من بعيد

أما السيف الطويل ده بقى فـ مش عارف بصراحة، أنا حاولت معاه كتير وحاسس إني مش متقبله خالص، يمكن عشان بيناسبني أكتر أسلوب اللعب السريع واضرب واجري وكدة، بس هو فعلا تقيل جدا وبردو قوي جدا

فـ كل وضعية من دول بتديك خيارات مختلفة وأسلوب جديد عشان تتعامل مع الأعداء

الوضعيات دي بتتفتحلك بشكل تدريجي لما تتقدم في القصة ومش بيبقوا معاك من البداية

وتقدر تحط وضعيتين بس معاك تبدل بينهم بسرعة

طبعًا اللي بيخلي للأنواع دي كلها قيمة هو التنوع الرائع في الأعداء

فـ عندك كل أنواع جنود الإمبراطورية بـ الرتب المختلفة بتاعتهم

وكمان فيه أنواع جديدة اتضافت في الجزء ده

سواء أعداء من الوحوش البرية أو من أتباع الإمبراطورية، أو أتباع الطرف التالت اللي ظهر هنا ومش هقدرأقولك عليه عشان الحرق

بس كل نوع من الأعداء بيحتاج تفكير مختلف فعلًا وممكن تضطر تغير نوع السلاح خالص عشان تتعامل مع نوع معين من الأعداء.

طيب دا كدا كله ولسة متكلمناش على.. القوة! أو The Force

زي الجزء الفات هنا فيه استخدام للقوة وتقدر تطورها وتفتح حركات جديدة وكدة

بس زي كل حاجة تانية في الجزء ده، استخدام القوة بقى أوسع وفيه خيارات أكتر

فـ أنت عندك قدرة الجذب أو الدفع بتطويرهم وحركاتهم

والجديد إنك تقدر تمسك العدو في الهوا وتصد بيه الطلقات من الأعداء التانيين، أو تمسكه تحدفه على عدو تاني العب بيه براحتك

وكمان بقيت تقدر تستخدم القوة في التحكم بالعقل عن بُعد

يعني تقدر تخدع أعداء وتخليهم يحاربوا معاك لمدة معينة

وتقدر تحركهم لفوق أو لتحت

دا كله طبعًا غير استخدام القوة مع كل وضعية من وضعيات السيف الجديدة

فـ كل وضعية لما بتدوس على زرار الصد مع زرار القوة بيعمل حركة مختلفة

وكالعادة كل الحاجات دي تقدر تطورها من شجرة المهارات

وأكيد أنت توقعت انا هقول ايه دلوقتي

بالظبط، شجرة المهارات هي كمان ضخمة وفيها حاجات جديدة كتير

وكمان فيه حاجات من اللي المفروض إنك اتعلمتها في الجزء اللي فات مبقتش موجودة في شجرة المهارات هنا وكال بقى متعلمها من البداية

شجرة المهارات هنا بتتقسم لـ 3 أقسام رئيسية

السيف – القوة – البقاء

وبتقدر تطور كل سيف وحركاته من شجرة خاصة بيه، يعني عندك 5 شجر مهارات للسيوف بس

دا ايه الشجر دا كله

المهم خلينا نخش في الجيمبلاي نفسه بقى، يعني كل ده كلام جميل بس هل بيتطبق كويس وأنت بتلعب؟

ما أنا قلتلك بقى مش عارف أقوم من عليها بقالي 30 ساعة بسبب الجيمبلاي

بس عادي بردو تعالى نتكلم

بص يا سيدي، خليني أقولك إن الجيمبلاي هنا عبقري

كل حركة وكل ضربة بالسيف أو بالقوة بتخلي مستوى الأدرينالين يرفع في السما

وفيه حركة سلوموشن صايعة كدة لما بتيجي تخلص على عدو أو لما بتضرب كذا عدو مع بعض

دا طبعًا غير حركة الفينيش اللي بتعملها، وكل سيف ليه حركة فينيش مختلفة

وكمان عندك الصد أو الـ Parry، هتحس إنك بتلعب لعبة سولز رايقة أوي

مع كل صدة كنت بحس قلبي بيرفرف من الفرحة ومخي متحمس للصدة اللي بعدها

خصوصًا في معارك الزعماء الرئيسيين

مش ممكن على الحلاوة والجمال

كل معركة منهم جاية بشاحنة من جرعات الأدرينالين

وتصميم المعارك متنوع وفيه شغل واضح فعلا

خصوصًا إن فيه زعماء هتقابلهم أكتر من مرة، وفي كل مرة محسيتش بملل كأنها أول مرة

بس خد بالك الجيمبلاي هنا مش سهل ومعارك الزعماء وموضوع الـ Parry ده هيحسسك إنك بتلعب لعبة سولز فعلا عشان هو عامل شبه ألعاب السولز حقيقي

بس على صورة أسهل شوية

اه صحيح هو انا مقولتلكش؟ اللعبة مفيهاش حفظ تلقائي بردو زي ألعاب السولز

وعشان تحفظ محتاج توصل لنقطة تأمل أو Meditation Point

وتقدر تملى صحتك فيها، بس ده هيخلي الأعداء اللي قتلتهم في كل حتة يرجعوا تاني

بردووو زي ألعاب السولز

فـ أه، اللعبة في جوهرها واخده شوية من ألعاب السولز زي الجزء اللي فات

وعامله دا بذكاء شديد، مخليها محافظة على هويتها وفي نفس الوقت بتضيف أكتر للتجربة..

باختصار الجيمبلاي هنا إدمان لو أتقنته وعرفت تستخدم كل مهارة صح

وبياخد كل اللي عجب الناس من الجزء اللي فات وبيضيف عليه ويحسنه بذكاء

عشان في الآخر تطلعلنا لعبة هي من أمتع الألعاب اللي لعبتها في السنين الأخيرة

خصوصًا بقى لو كنت متابع لعالم ستار وورز ومحب ليه

هتغرق في اللعبة دي.

العالم والاستكشاف

Star Wars Jedi: Survivor بتقدم عالم أضخم وأوسع من الجزء اللي فات بكتير

5 كواكب وقمر قابلين للاستكشاف بشكل كامل

والاستكشاف مبقاش مقتصر على شوية سكينز لـ كال أو للسيف أو BD One

لا بقى فيه محتوى جانبي محترم وبيقدم من 5 لـ 10 ساعات زيادة

أغلبه هيكون على كوكب Koboh وهو أكبر الكواكب في اللعبة تقريبًا

فـ أنت بتقابل حد جديد وبتتكلم معاه، وهو بيطلب منك طلب وبتبقى مهمة جانبية

وممكن تقابل ناس جديدة في أي مكان عادي وأنت بتستكشف، يعني ممكن تبقى ماشي وتلاقي ناس بيهجم عليهم وحش ومحتاجين مساعدتك

لكن أغلب المهمات الجانبية تقدر تلاقيها في صالون بايلوون واللي هو مطعم على القد كدة تحت إشراف عمو Greeze بنفسه

المطعم ده أو الصالون، هتلاقي فيه أنشطة تانية مختلفة

زي إنك تقدر تجمع نباتات وتزرعها على السطح، وكمان تتحكم في شكلها وأنواعها

وتقدر تقعد تتكلم مع الناس كدة بس وتعرف منهم أحوال المجرة ايه والدنيا عامله معاهم ايه

والأهم بقى بالنسبالي هي لعبة Holo Tactics

ودي لعبة استراتيجية صغيرة كدة تقدر تلعبها في المطعم مع شخصيات تانية

واتفاجئت بصراحة بكمية التفاصيل والجمدان اللي في اللعبة المصغرة دي

ببساطة تقدر تعتبرها لعبة Gwent بتاعت ألعاب ذا ويتشر بس في عالم ستار وورز

بيبقى قدامك ساحة معركة ديجيتال صغيرة كدة بتختار فيها بطاقات الشخصيات اللي عايز تحارب بيها

وتقدر تختار من بين كل الأعداء اللي بتواجههم في اللعبة حرفيا

أعداء بيضربوا بأسلحة يدوية أو أسلحة نارية عن بُعد وغيرهم وغيرهم

وكل كارت ليه سعر عدد من النقط، وبيكون معاك عدد معين من النقط تشتري بيه كروتك كلها كل جولة

ولما بتشتري الكروت بتختار تحطها فين في الساحة على حسب مراكز عدوك

عشان تبدأ المعركة الصغيرة دي وتتفرج على الحرب كأنها لعبة أركيدية كلاسيكية

وكل ما تكسب منافس بيبقى ليك جايزة، زي مظهر جديد أو قصة شعر جديدة، أو حتى قدرة جديدة

شخصيًا أنا حاسس إني قضيت وقت أكتر من اللازم مع اللعبة دي من كتر ما حبيتها

وفعلًا بتفكرني بـ Gwent من ذا ويتشر..

تصميم العالم عجبني جدًا وإنه بنظام Metroidvania ، يعني المناطق بتفتح على بعض من خلال طرق مختصرة أنت بتفتحها بنفسك لما توصلها

يعني مثلًا لو لقيت باب مقفول ومينفعش تعدي منه، لما تلف وتوصل للناحية التانية هتقدر تفتح الباب ده، وكدة بقيت خلاص تقدر تدخل وتطلع وقت ما تحب من غير ما تلف اللفة الكبيرة دي تاني

النظام دا بيساعد كمان مع فكرة إن مفيش حفظ تلقائي وإنك محتاج تروح Meditation Point عشان تحفظ وتملى الهيلث بتاعك، فـ بدل ما هتقعد تلف عشان ترجع لنقطة التأمل دي، لا شوفلك أقرب طريق مختصر افتحه وارجع منه

الألغاز كمان هنا فيها تطور واضح عن الجزء اللي فات

بقى فيه أنواع أكتر من الألغاز، وبالتالي طرق مختلفة للتعامل معاها

وعجنبي جدًا توظيف الروبوت BD One في حل الألغاز دي

ودي كانت من الحاجات اللي اتمنيت أشوفها في الجزء ده بعد ما لعبت الجزء اللي فات

بشكل عام محسيتش بملل أو صعوبة زيادة في الألغاز، والتنوع فيها كمان ساعد على ده..

كمان الروبوت BD One بقى ليه وظيفة في الاستكشاف والاستطلاع

بقيت تقدر تستخدمه كـ منظار عشان تبص على أماكن بعيدة وتستطلع المكان

وطبعًا الإضافات اللي في الجيمبلاي من ناحية الحركة وميزات تانية ساعدت بشكل كبير في الاستكشاف والتشجيع عليه

فـ مع الجري على الحوئط Wall Run أو التسلق أو القفز المزدوج، بقى فيه كمان مسدس خطاف أو Grapple شبه بتاع باتمان كدة بيوصلك لأماكن عالية

وبقى فيه القفز والاندفاع في الهوا واللي بتخليك توصل لمناطق أبعد

وكل الحركات دي اتوظفت بشكل حلو جدًا بشكل يشجعك أكتر على الاستكشاف في عالم اللعبة الضخم

إضافة تانية هي ركوب الحيوانات عشان تتنقل بسرعة في المساحات الواسعة

أو التعلق من طائر عشان ينقلك من مكان لمكان تاني بعيد

بس الإضافتين دول مش موجودين بشكل كبير في اللعبة ومش على كل الكواكب

وهي حاجة منطقية بردو لو سألتني، فاللعبة مش هتديك كل آليات الحركة دي عشان تسيبها وتركب طائر طول الوقت

عشان كدة وجودهم محدود في أماكن معينة، وفي الأماكن دي متقدرش تتنقل غير بيهم بردو.

باختصار تصميم العالم الضخم كان ذكي وعجبني جدًا ، وفيه تفاصيل وحاجات بسيطة كدة تكافئك على الاستكشاف

ومعاه فيه آليات كتير للتنقل والاستكشاف مع ألغاز ممتعة ومتنوعة تمنع عنك الملل، يعني كل حاجة في عالم اللعبة بتقولك تعالى استكشف وقضي وقت أطول!

الرسوميات والصوتيات

مش محتاج أتكلم عن أد إيه الجرافيك هنا عظيم جدًا

كل بيئة جديدة ومكان جديد بتدخله هو لوحة فنية أو مشهد سينمائي عالي أوي

تقدر تقول إن الجرافيك هو من لعبة جيل جديد فعلًا

واللي اتفوق بشكل واضح على الجزء اللي فات، اللي كان الجرافيك بتاعه حلو بردو بالمناسبة

والصوتيات بردو نفس الكلام

جرعة سمعية ممتازة وممتعة جدًا

خصوصًا لو كنت من محبين عالم ستار وورز

أصوات السيف يجماعة مش ممكن بجد

من أول ما بتطلع السيف وتضرب الأعداء وتصد الضربات، ولحد ما تشيل السيف التاني

كلها كفيلة إنك حتى لو مش حابب حاجة تانية في اللعبة، هتلعبها عشان الأصوات اللي فيها

دا طبعًا غير الساوندتراك الملحمي لـ ستار وورز

واللي اللعبة اشتغلت عليه بشكل كويس جدًا وإدت لكل لحظة حقها من التجربة السمعية

الأداء التقني

هنا بقى نقف شوية ونوقف المدح اللي عمالين نتكلم فيه من البداية

لأن دي مشكلة اللعبة الكبيرة والكبيرة أوي بصراحة

ومبقتش مشكلة لعبتنا النهاردة بس، دي بقت مشكلة كل الألعاب اللي بتنزل اليومين دول

والسبب مش معروف هل هو كسل من المطورين ولا التقنيات الجديدة دا آخرها فعلا في الأداء

على أجهزة الجيل الجديد بلايستيشن فايف و إكس بوكس سيريس إكس، اللعبة بتقل عن ال30 فريم على وضع الجودة

وعلى وضع الأداء جرافيك اللعبة بيقل بشكل ملحوظ وتحس إنك بتلعبها على جيل قديم

أما على البي سي فـ كالعادة هتلاقي أكبر كمية من المشاكل التقنية والأداء المتذبذب

إحنا جربنا اللعبة على جهاز بالمواصفات دي

RTX 2070 – i3 1200F – 16GB RAM و تخزين SSD

شغلنا اللعبة على إعدادات High من غير راي تريسنج وتفعيل تقنية FSR على وضع الجودة

خدنا من 40 لـ 70 فريم تقريبًا، في المناطق الداخلية كانت بتوصل 70 أو أكتر، والمناطق الخارجية الفريمات مش بتزيد عن 40

 والمشكلة كانت في الدروبات الرهيبة وكمية التقطيع أو Stuttering

خصوصًا لما بتخش منطقة جديدة، بتحس إنها لسة بدأت تحمل قدامك

الفريمات بتنزل لتحت 30 ساعات، وكمان بيحصل Freeze مفاجئ في المناطق المليانة

واللعبة عملت كراش معانا وقفلت خالص مرتين في فترة تجربتنا

طبعًا أداء مش مقبول خالص من عنوان ضخم زي ده ومن شركة كبيرة واستوديو خبير

ومنتظرين التحديثات اللي هتصلح الأداء في أقرب وقت على كل المنصات.

في النهاية أقدر أقول إن Star Wars Jedi: Survivor هي من أحسن ألعاب السنة،

طبعًا دا لو مبصيناش على الأداء التقني السيئ

اللعبة قادرة تنافس على جايزة لعبة السنة، ومين عارف، ممكن تكسبها كمان

قصة قوية وحماسية وجيمبلاي هيخليك تدمن اللعبة طول ساعات اللعب

وعالم جميل بتصميم ذكي وجرافيك ممتاز وأصوات من أحسن ما يكون

فـ مش هبالغ لو قولت إن اللعبة قربت تكون مثالية، لولا الأداء التقني وشوية تمطيط في القصة

التقييم النهائي

9 \ 10