مراجعة
The Callisto Protocol
شخصيًا بعتبر ألعاب الرعب المبنية على الفضاء أكتر أنواع الرعب فعالية بسبب روح الوحدة وعدم معرفة الخطر اللي بتواجهه في بيئة اللعب. Dead space هي أول مثال هيجي في دماغ أي حد لو قولتله لعبة رعب بتدور أحداثها في الفضاء.
لعبة Dead space ظهرت في وقت كانت شركة EA في قمة مجدها وكانت بتجرب حاجات جديدة وجريئة وخرجت من الحقبة دي ألعاب كتير محبوبة وأولها Mass effect و Dead space و Dragon Age و Mirror’s Edge، وكل واحدة فيهم كانت علامة في نوعها.
النهاردة بتصدرلنا لعبة مخرج لعبة Dead Space الأصلي Glen Schofield واللي بتتسمى The Callisto Protocol بعد سنوات من الكلام عنها والدعاية الغامضة، ونقد البعض ليها بسبب التشابهات الكبيرة بينها وبين ديد سبيس، فهل اللعبة تستحق التجربة. وبتقدم حاجة تفرقها بالفعل عن ديد سبيس؟
القصة
قصة اللعبة عن شخصية Jacob Lee اللي بيشتغل موصل شحنات بين محطات الفضاء في سنة 2320، واللي بيتم تكليفه بمهمة غامضة بتوصيل شحنة مجهولة لسجن شديد الحراسة على أحد أقمار كوكب المشترى اسمه كاليستو. قرب وصولهم بيتم اختطاف السفينة والدخول في معركة مع القراصنة واللي بتأدي لتحطم السفينة على سطح كاليستو، وبعدها جاكوب واللي معاه بيخشوا السجن بالغلط لإن حراس السجن افتكروهم قراصنة.
طبعًا الأمور بتسوء أكتر، وجيكوب بيلاقي الدنيا حواليه اتقلبت والمساجين كلهم أتحولوا لمخلوقات متحورة شريرة ودموية شبيهة بالزومبيز، ودورك في القصة كلها بيتلخص في محاولة الهروب كهدف أساسي وفهم السر ورا اللي حصل كهدف ثانوي.هل في تجارب سرية كان بيتم إجراءها على المساجين؟ مين بالظبط اللي بيعمل التجارب دي وعايز من وراها إيه، وإزاي تقدر تحذر بقية المحطات الفضائية والسجون من عواقب التجارب دي؟ كل دي اسئلة بتتطرح في بداية القصة وبتكون مهتم تلاقي إجابة عليها، فهل فعلا الأحداث بقى قوية وبتفضل محافظة على اهتمامك اللي اكتسبته في أول ساعة لعب؟
الحقيقة، مش أوي…اللعبة مدتها 10 ساعات كحد أقصى. وبتقدم تقدم خطي في الأحداث يعني الاستكشاف مش كتير ومفيش محتوى جانبي على هيئة مهمات جانبية، بالتالي القصة المفروض تكون مكثفة وقوية جدًا لكن الحقيقة القصة بتيجي في نص عمرها تبهت وتبقى مش اهتمام اللعبة الأساسي. القصة كمان متوقعة والنهاية للأسف مفتوحة لإن من الواضح إنهم ناويين يعملوها سلسلة ألعاب.
أنا معنديش مشكلة مع كده بس النهايات المفتوحة دايمًا بتحتاج لتكملة أفضل منها عشان تديك قيمة للتجربة. وهان بيجي سؤال مهم، هل تستحق اللعبة تدفعلها 70$ مقابل 10 ساعات نهايتهم مفتوحة؟ هنا أنت محتاج جيم بلاي خارق وجذاب جدًا عشان تقدر تبرر طلبك للسعر ده كله في تجربة عمرها 10 ساعات يعني تخلص في جلستين لعب مش طوال في ويك إند.
الجيم بلاي
الجيم بلاي هو ما قد تتوقعه من لعبة مستوحاه من ديد سبيس. رعب البقاء في محطة فضاء معطلة ومسكونة بالمخلوقات العنيفة، وترسانة أسلحة قوية ونظام معارك دومي وعنيف وأجواء كئيبة وشعور بالوحدة. الجيم بلاي مفيهوش أكتر من التقدم من نقطة A للنقطة B مع قتال الأعداء اللي في النص، منهم Mini Bosses و Bosses وللأسف دول كانوا مكررين.
المعارك هنا معتمدة أكتر حاجة على الMelee Attacks أكتر من الأسلحة النارية اللي كان أعتماد ديد سبيس أكتر عليها. وطبعًا لما نقول مخلوقات شبه الزومبيز و Melee Combat هيجي في دماغنا لعبة Dying Light والمتعة اللي قدمتها.
للأسف كاليستو بروتوكول بتفشل إنها تقدم متعة مماثلة بسبب نظام الكومبات المكرر. أنت عندك حركتين تلاتة مش هتعمل غيرهم في اللعبة كلها وهم الDodge بطريقة معينة، والBlock. الدودج عن طريق إنك تفضل دايس الأنالوج لليمين أو الشمال…والبلوك عن طريق إنك تسحب الأنالوج لورا…مش مطلوب منك تظبط التوقيت وبالتالي الموضوع أسهل من اللازم. بعد ما تعمل دودج مرتين بيتفتحلك مجال إنك تضرب العدو وبعدين تستناه يرجع يضربك والدورة تعيد نفسها. وفي أعداء كمان اللعبة مش مبرمجاهم على إنهم يتضربوا من قريب حتى لو أنت نجحت وقربت منهم.
نظام المعارك ده اتحط في اللعبة عشان تبقى سينيمائية بشكل كبير وفعلا بينجح في رفع مستواها بشكل جبار في المعارك الواحد على واحد، لكن لما الدنيا بتوسع منك والمعارك بيخش فيها أكتر من عدو بيبقى الموضوع فوضوي أوي وبزيادة وهتكره نفسك واللعبة بسبب إن مفيش زرار Lock on Target وكمان الأعداء ممكن يجولك من برا كادر الكاميرا بسرعة كبيرة، ويضربوك ضربات مؤثرة.
ولما بتستخدم سلاحك الناري في اللحظات دي، فالذخيرة مش كافية طبعًا للكميات دي من الأعداء..بالتالي الموضوع مستحيل إلا لو أنت عامل اللعبة على صعوبة منخفضة جدًا. في نص اللعبة بتاخد سلاح grp وده قادر على تحريك الأعداء وهتلاقيه سلاح over powered جدًا وبيقتل أي تحدي في اللعبة. كنت حابب أشوف توازن أكتر من كده في المعارك اللي هتقضي فيها معظم وقتك.
اللعبة فيها نظام تطوير قوي للأسلحة وبيساعد مع الوقت على اكتساب قدرات قوية بتحسسك فعلًا بالتقدم في اللعبة وبتغير من أسلوب اللعب بشكل كبير.
أيوة كاليستو بروتوكول مطلوب منها تحقق الرعب بشكل فعال، وبتنجح في كده نسبيًا بأجواءها الخرافية ومجموعة من الخضات القوية، ولكن الخضات متكررة كتير في عمر اللعبة ومفيهاش تجديد عن المتوقع من ألعاب الرعب. مرة تكون واقف قدام إزاز فيجي الوحش يخبط عليه فجأة، أو ماسورة تنفجر وأنت ماشي فوقيها بشكل مش متوقع وكده يعني…الرعب الحقيقي كان في اللفل ديزاين وإحساس التوهان.
اللفل ديزاين
البيئة كلها خطية بدون طرق مختصرة أو محتوى جانبي، لكن الجميل هو إن مفيش أي إرشادات. على عكس GOW مثلًا اللي كان فيها لون أبيض بيرشدك المفروض تمشي إزاي وإيه الأماكن اللي ممكن تتفاعل معاها وإيه اللي مش ممكن.
الحقيقة ده كله مش موجود هنا ولازم دايمًا تمشي في البيئة وتبص على كل شبر فيها بعينك عشان تتأكد إنك ماينفعش تمشي من هنا. ده بيخلق جو من الرعب قوي جدًا خصوصًا في لحظات القصة القوية (أول 5 ساعات) وبالتالي الرعب هنا مبني أكتر على البيئة من كونه مبني على البقاء أو الخضات.
الجرافيكس
تصميم البيئات جميل إلى أبعد حدود. حجم التفاصيل في كل مكان بتروحه عملاق، وبيبين قد إيه Unreal engine 4 قادر على توفير تجارب عظيمة لسا. كل حاجة في الجرافيكس هنا جميلة. ظلال، وانعكاسات أضواء وأشكال وشوش وحتة واقعية أي شيء مجسم قدامك. لو استخدمت الفوتو مود عشان تقرب من أي مجسم زي لبس البطل مثلا هتلاقي تفاصيل ملمسه باينة وواضحة جدًا.
الأداء التقني
الأداء التقني رائع على منصات الجيل الجديد وخصوصًا بلايستيشن 5 مع نوعين أداء PERFORMANCE و QUALITY الأول بيقدملك 60 فريم من غير تتبع الأشعة والتاني بيقدم 30 فريم مع تتبع الأشعة.
الحقيقة مش عارف أقولك أنهي أحسن لإن الموضوع معتمد على تفضيلك الشخصي..بالنسبالي لعبة زي دي ماينفعش تتلعب من غير تتبع الأشعة لإن التفاصيل خرافية والموضوع مستاهل جدًا، و30 فريم مش وحش إطلاقًا خصوصًا إنهم ثابتين.
الفريمات بتقع ساعات قليلة أثناء الدخول في أنيميشن من وقت للتاني لكن مش حاجة ملحوظة خالص يعني، لكن الغريب أكتر في نسخة الجيل الجديد إن نسخة الإكس بوكس مفيهاش إنعكاسات الRAY TRACING مع إن فيها RAY TRACED SHADOWS بدون سبب صريح مذكور من المطور لكده. مع إن جهاز الإكس بوكس سيريس إكس أصلا جهاز قوي وأفضل من البلايستيشن 5 تقنيًا.
على السيريس إس بقى مفيش راي تراسينج ولا يحزنون، اللعبة شغالة ب 30 فريم مستقر على جرافيكس متوسط بين الجيل الجديد والقديم وعلى الجيل القديم اللعبة شغالة بدقة 1080P على 30 فريم.
أما على البي سي، فالدنيا أتحسنت بفضل باتش نزل مع صدور اللعبة. في ناس لسا بتعاني مع اللعبة بس معظم المشاكل الكبيرة اختفت بأبديت حجمة كان 60 جيجا كاملين. اللعبة قبل صدورها كانت كارثة تقنية ومراجعين كتير أشتكوا منها بشكل صريح وهاجموها لدرجة إن بعضهم قال ماحدش يشتيري نسخة البي سي.
أنا عن نفسي لعبتها على لابتوب بكارت شاشة RTX 3080 و رامات 16 جيجا وكانت الأمور كويسة لكن طبعًا من غير تتبع الأشعة لإن الأداء ماستقرش لدرجة إني أشغل تقنية مستخدمة بقوة في اللعبة زي تتبع الأشعة. والفريمات كانت مش بتنزل عن 30 غير نادرًا. اللعبة بشكل عام أتحسنت وأنا أقدر أرشحها للناس من دلوقتي او ممكن تستنى اسبوع أو أتنين كمان تكون الدنيا ظبطت أكتر كمان.
في النهاية
مفيش شيء ثوري حول The callisto protcol غير الجرافيكس الخرافي والأداءات التمثيلية، ووشوش الشخصيات اللي مستحيل تصدق إنها جرافيكس. تقريبا دي أحسن وشوش شوفتها في تاريخ الجيمينج بلا مبالغة. وأنا لعبت gow ragnarok و TLOU 2 وغيرهم من التحف التقنية، وبقولك إن دي أقواهم. لكن جانب الجيم بلاي كان والقصة كانوا أقل من توقعاتي الحقيقة.
كاليستو بروتوكول تجربة قوية لكن مش ثورية، لو دخلت عليها بتوقعات منخفضة هتخرج مبسوط، وبما إن شكلهم ناويين يعملوا جزء تاني، فأنا الحقيقة متحمس أشوف التحسينات اللي هتحصل قدام، لكن هل كل ده يبرر تمنها الغالي 70$؟ دي بقى يا صديقي حاجة ترجعلك أنت.
التقييم النهائي
7.5/10
لو عايز تشتري اللعبة تقدر تحصل عليها من متجر جيمزاوي من هنا
