مراجعة
Wild hearts
تخيل لو فورتنايت اندمجت مع Monster hunter !!
لا دي مش أحلام العصر دي لعبة اسمها Wild hearts واللي كانت هتبقى لعبتي المفضلة السنة دي عشان نظام البناء اللي فيها والGlider اللي على شكل مروحة ده لكن…
لعبة Wild Hearts هي لعبة RPG، من نوع اصطياد الوحوش في عالم خيالي، وهي شبيهة جدًا بألعاب Monster Hunter بتاعت استوديو Capcom. اللعبة من نشر EA ومن تطوير استوديو Omega Force الياباني.
Wild Hearts بتنزل في فترة مزدهرة للألعاب الفردية وألعاب القصة من EA، واللي واضح اهتمام الشركة الشديد بيها في الفترة الأخيرة، فـ لسة من شهر شوفنا ريميك Dead Space ودلوقتي بنشوف Wild Hearts، وفي إبريل هنشوف Star Wars Jedi: Survivor، ومشاريع تانية من الشركة.
لما نتكلم على Wild Hearts فأكيد اللي ييجي في بال أي حد مهتم بالنوع ده من الألعاب هو إن هل اللعبة منقولة من ألعاب Monster Hunter اللي مسيطرة على النوع ده من الألعاب؟ ولا Wild Hearts لعبة ليها هويتها الخاصة بيها؟ دا اللي هنعرفه من المراجعة.
القصة
قصة Wild Hearts بتحصل في زمن قديم في اليابان، لما الوحوش، واللي هنا اسمهم Kemono، انقلبوا على البشر وبقوا خارج طوعهم وبيشكلوا خطر كبير عليهم، وده بعد ما كانوا متوافقين مع بعض لفترات طويلة من الزمن.
لغاية ما بييجي صياد مختلف ومميز عن غيره وبيتحكم في قوة سحر غريبة، اللي هو أنت، بييجي من أرض بعيدة عشان يساعد يحمي البشر من الوحوش في المكان ده، وكله بفلوسه طبعًا. الموضوع بيفكرني بصيد الوحوش في The Witcher 3، لما بتحدد الوحش وتصطاده وبعدين تاخد فلوس من الناس.
جيمبلاي مذهل من صيد الوحوش، مع نكهة سحرية خرافية!
Wild Hearts بتقدم نمط جيمبلاي (Gameplay Loop) هو المتوقع في الفئة دي من الألعاب، إنك بتختار الوحش وتحدد مكانه، بتروح تحاربه، وبعدين تجمع الغنيمة منه عشان تروح تطور أسلحتك ودروعك، وتعمل مهمات مختلفة متعلقة بصيد الوحوش بردو، وهكذا. وكل ده في سياق درامي بيحصل.
الجديد بقى هنا هو البناء! بالظبط زي ما قريت، في Wild Hearts فيه جزء أساسي من الجيمبلاي بيعتمد على البناء بقوة سحرية اسمها Karakuri، ودي بتخليك تبني حاجات مختلفة بتستخدمها في كل حاجة، سواء في المعارك أو في الاستكشاف، وزي ما قولت هي جزء أساسي من اللعبة، ولازم تعتمد عليه بشكل كبير.
الـ Karakuri هنا بيعتمد على مادة اسمها Thread، ودي اللي بتستخدمها عشان تبني أي حاجة. بتلاقيها في البيئة حواليك لما تكسر صخر وشجر ليه شكل معين، ومتقلقش هتلاقيها بسهولة.
تقدر تبني صناديق فوق بعض وتنط من فوقيها على الوحش عشان تهجم عليه بضربة خاصة ودامدج عالي، وتقدر تجمع كذا صندوق (9 بالظبط) في شكل مستطيل عشان تبني جدار مميز بيمنع هجمات الوحوش وبيرميهم لورا لما يجروا ناحيتك. دا غير بناء برج استكشاف لمعرفة أماكن الوحوش القريبة منك، وإنك تقدر تبني آلة بتعمل حبل من مكان للتاني (Zipline) عشان تتنقل بسرعة وتوصل أماكن بعيدة بسهولة.
كل دول وفيه حاجات أكتر كمان ليها استخدامات مختلفة، والجامد بقى إن البناء هنا خرافي! مش الميزة نفسها بس اللي إضافة عبقرية للجيمبلاي، لا استخدامها نفسه ممتع وسلس بطريقة رهيبة! مفيش تأخير أو مشاكل في تصميم أي حاجة تقريبًا من ناحية البناء، دا غير إنك هتتعود عليه كجزء أساسي من الجيمبلاي وهيبقى زيه زي مسكة السلاح كدة، لأنك بردو لو أهملته أو متعودتش عليه، هتتطحن من أول الفايت!
الجيمبلاي نفسه بقى.. رهيب بردو
لما نتكلم عن الجيمبلاي في لعبة زي دي فإحنا نقصد الكومبات بشكل أساسي، وده طبيعي لأنك هتقضي أغلب الوقت بتحارب وحوش في مواقف مختلفة.
الكومبات هنا عظيم جدًا، إحساس الضربات والحركة في المعارك، والأنميشن لكل ضربة واستخدام كل سلاح، ودمجها مع البناء طبعًا زي ما قولنا، دا كله مع موسيقى ملحمية في الخلفية ومؤثرات صوتية تخلي قلبك يرفرف، كل ده بيخلي الكومبات خرافي، وعلى الرغم من صعوبة الوحوش وإنه فعلًا مفيش معركة سهلة، لكني محستش بالزهق أو الملل في أي معركة.
المشكلة الوحيدة اللي ضايقتني في الكومبات هي حركة الكاميرا وأنت بتحارب، خصوصًا لو عامل Lock على الوحش. بتحس إن حركة الكاميرا بتبقى عشوائية والزوايا بتاعتها بتبوظ عن العادي في مواقف معينة.
تصميم المعارك حلو جدًا، أنت بتحارب الوحش، اللي بيبقى عنده حركات مختلفة ومراحل متراكمة من القوة، وبتحاول تدمجه بأكتر شكل ممكن من غير ما تموت، وبعد شوية لما يضعف بتلاقيه بيجري لمكان تاني فـ تطارده، وتحاربه في المكان الجديد ده لفترة بردو، وهكذا لحد ما يموت.
النظام ده بيخلي فيه تنوع مقبول في كل معركة، لأن فيه معارك ممكن توصل معاك لساعة إلا ربع متواصل، فـ موضوع تغيير الأماكن وهجمات الوحش بالتدريج ده بيخليك تحس إنك بتخش كذا معركة ورا بعض مش معركة واحدة.
ومن ناحية الأسلحة، فأنت تقدر تشيل سلاح واحد، وفيه تنوع كويس بردو، وكل سلاح ليه الستايل الخاص بيه وأسلوبه في المعركة، فعندك السيف العادي بهجمة عادية وهجمة وقوية، وفيه قوس بهجمات بعيدة المدى وقدرات خاصة بيه بردو، وفيه أسلحة تانية مشتقة من الثقافة اليابانية زي Wagansa Blades واللي بتخليك تطير بعد ما تضرب وتنزل من الهوا بضربة تانية أقوى، وكمان بتقدر تصد بيها الضربات لما تفتحها زي الشمسية كدة. وأسلحة وأكتر وقدرات أكتر لكل سلاح.
كمان كل سلاح ليه شجرة مهارات ضخمة ومتفرعة، وكل اللي قلبك يحبه من عناصر الـ RPG من ناحية تطوير الأسلحة موجودة هنا، فـ هتلاقي إحصائيات من أنواع مختلفة وتطويرات في اتجاهات مختلفة حسب اللي تحبه لسلاحك.
تصميم العالم جميل
في Wild Hearts بتقدر تبني معسكرات في أماكن مختلفة من الخريطة، بالتحديد في الأماكن اللي فيها حظيرة تنانين “Dragon Pit”. هناك تقدر تحط كل مستلزمات المعسكر، مثلًا نار المخيم اللي بتخليك تبدأ الصيد بشكل مباشر، وحوض مياه الهيل اللي بتقدر منه تملى المخزون بتاعك، وحاجات تانية بتفتحها مع الوقت.
المعسكرات دي مهمة عشان السفر السريع، وكمان عشان تطلع منها لما تموت، لأن لما تموت لازم تختار معسكر ترجع منه.
أما العالم نفسه فهو جميل بصريًا وتصميميًا كمان، فالمناطق أغلبها مفتوح على بعضه ومش هتتعب كتير وأنت بتتنقل فيه، وكمان في وجود أدوات للتنقل بتسهل عليك الاستكشاف أكتر وبتخليك تستمتع بالعالم أكتر وأكتر.
طبعًا فيه موارد ووحوش صغيرة في كل مكان عشان تجمع منها موارد لتطوير الأسلحة والدروع.
تقدر تصطاد وحوش أونلاين مع صحابك!
زي Monster Hunter، لعبة Wild Hearts فيها إنك تلعب أونلاين مع لاعب تاني وتساعده في صيد الوحوش، فـ تقدر تطلب المساعدة من لاعبين تانيين قبل ما تبدأ المعركة، وكمان تقدر تنضم للاعبين تانيين وتساعدهم.
اللعب أونلاين مش أكتر من لعب المعركة مع لاعبين تانيين، فـ متقدرش تدخل مع صاحبك لمجرد الاستكشاف كدة، لا، لازم يكون فيه صيد متفعل.
فرحت لما لقيت الميزة دي هنا بصراحة، لأنها لو مكانتش موجودة كانت هتكون نقطة تفوق واضحة لـ Monster Hunter.
الأداء التقني.. ليه كدة؟
غالبًا هي بقت عادة اليومين دول إن أي لعبة جامدة في كل حاجة لازم تقع أوي في حاجة مهمة (أيوة بكلمك يا Atomic Heart)، فـ في Wild Hearts الجيمبلاي والعالم والأجواء كلها جامدة جدًا، لكن كل ده ميكملش بأداء تقني أقل ما يُقال عنه، إنه كارثي.
زي ما انت عارف، Wild Hearts هي لعبة جيل جديد بس، يعني نازلة للبلايستيشن 5 و الإكس بوكس سيرس والبي سي بس. مش عارف على ايه بصراحة، الجرافيك جامد وكل حاجة بس مش خرافي يعني.
بس الظاهر إن اللعبة لعبة جيل جديد دا كان حجة للاستوديو المطور إنه يكسل في عملية تحسين الأداء التقني والـ Optimization للعبة، فأداء اللعبة على البي سي بالأخص، حاجة مش مقبولة نهائي.
فريمات بتقع، جليتشات، كراشات، وكل اللي تحبه، موجود في Wild Hearts. يمكن أسوأ جليتش فيها هو جليتش السلو موشن، ودا بيظهر بعد مقدمة اللعبة وبيخلي كل حاجة في اللعبة تمشي بالبطيء. الحل الوحيد ليه هو إنك تقفل الفريمات على 30 فريم بس.
دا غير أرقام عجيبة وغريبة شوفناها في اليومين اللي فاتوا، زي إن اللعبة على الـ RTX 2070 بتوصل 25 فريم بالعافية.
كل اللي أقدر أقوله إني أحذرك من شراء اللعبة على البي سي دلوقتي، ابعد عنها تمامًا لحد ما المشاكل دي تتصلح، خصوصًا إنها بـ 70 دولار. لحد دلوقتي لسة المشاكل موجودة، بس الاستوديو وعد إنه هيحلها كلها في أقرب وقت.
كلمة أخيرة
Wild Hearts لعبة جامدة جدًا، ومش هتفاجئ لو شوفتها مترشحة للعبة السنة في آخر السنة، ودا لأنها اقتحمت تصنيف حلو من الألعاب بقوة كبيرة، وعملت لنفسها هوية خاصة بيها وقفلت باب المقارنات بينها وبين Monster Hunter بإضافة لمستها المميزة.
ولكن للأسف الأداء التقني الكارثي على البي سي والمشاكل التقنية فيها عمومًا خليتها في مكانة أقل من اللي تستحقها حاليًا، ولكن خلينا نأمل إن المشاكل دي تتصلح في أقرب وقت، وساعتها هتكون Wild Hearts لعبة عظيمة.
التقييم النهائي
8/10
