استعراضات, عن الألعاب, مقالات

انطباع ومناقشة تريلر Suicide Squad Kill The Justice league

في حدث DC fandom اللي فات تم إصدار مجموعة كبيرة من التريلرز، لأفلام وألعاب دي سي اللي هتنزل علي مدار السنين اللي جاية، بعد مدة طويلة من الإشاعات الكتير حوالين مستقبل ألعاب باتمان أركام، وشروع روكستيدي الجديد اللي سمعنا عنه كلام كتير، أخيرًا تم الأعلان عن لعبتين هم Gotham Knights من تطوير WB Montreal و Suicide squad kill the justice league من تطوير Rocksteady. الإتنين لسا بدري عليهم نسبيًا، الأولي هتنزل في 2021 والتانية هتنزل 2022، ومفيش مواعيد محددة. النهاردة إحنا هنتكلم عن Suicide squad لإن التريلر بتاعها أثار في دماغي تساؤلات كتيرة جدًا.

مش عايزك تفهمني إن التريلر معجبنيش، بالعكس هو ممكن يكون عجبني زيادة عن اللزوم، وأثار فضولي بطريقة خلتني من وقت ما اتعرض لحد ما كتبت المقال ده بفكر، وعندي فضول أعرف اللعبة دي بتقدم إيه بالظبط. وده الشيء اللي للإسف الترلير مجاوبش عليه.

خليني الأول أشرحلك التريلر ده عبارة عن إيه، هو تريلر شبيه جدًا بإعلانات الأفلام بتاعة الشركة، وخاصة إعلان فيلم سويسايد سكواد، بيستعرض لحظة من وسط المهمة اللي هم طالعين ينفذوها، بتشوف في أول التيلر اماندا والر، بتتكلم مع هارلي كوين وبتوجهها، وبعدين بتشوف صورة أكبر وهي وضع الفرقة، أو المكان اللي هم متواجدين فيه، ومن الواضح إنهم بيطاردوا هدف مجهول.
لمدة قصيرة بعدها بتدور حوارات جانبية بين الشخصيات هدفها استعراض الكيميا بينهم، بشكل عظيم جدًا جدًا الصراحة، أنا ابتسمت أو ضحكت كذا مرة وأنا بتفرج. المهم إنه في النهاية بيكتشفوا إنهم هيواجهوا سوبرمان. وبينتهي التريلر بلقطة كوميدية جميلة.
لكن معرفناش إيه نوع اللعبة؟ بما إن لعبة Gotham Knights شكلها متجهة إتجاه لعبة أفنجرز في إنها تكون لعبة خدمية، فليه اللعبة دي كمان متكونش كده؟ خليني الأول قبل ما أناقش معاك الاحتمالات الواردة للعبة دي، أقولك إيه الحاجت اللي حسيتها من التريلر ده وهل هي مفيدة في معرفة هوية اللعبة ولا لأ,


التريلر ده بيبينلنا إيه؟

أولًا التريلر معمول حلو جدًا بشكل خلاني أشك إن ده ممكن يبقي فيلم أنيشمن للمجموعة دي من الشخصيات، أو أفكر إنه ده الفيلم الجديد مثلًا، والحوارات فيه كانت جميلة وبتبين قد إيه روكستيدي، أو أيًا كان عمل التريلر ده، عنده فهم عميق جدًا للإمكانيات اللي عند الشخصيات دي، وعارف كويس أوي إزاي يحطهم مع بعض في فيلم أو لعبة واحدة، بدون ما يكون حد مغطي علي التاني. لو رجعت شفت التيلر تاني هتحس إن كل شخصية كان ليها سطر أو مقولة أو حركة مميزة، حتي سوبرمان!! أكتر لعبة في حياتي حسيت فيها إن كل شخصية مكتوبة صح، وواخدة وقتها علي الشاشة بالمسطرة هي لعبة GTAV، وعلي الرغم إني كنت ساعات بحس إن فرانكلين كان واخد حجم أقل من حجمه، لكن النهاية حسستنا كلنا إن دوره مهم واحنا اللي مكناش واخدين بالنا، حركة ذكية خلتك تتعلق بالتلات شخصيات بنسبة متقاربة، وتشوف كل واحد فيهم في مواقف كتيرمع إن عمر اللعبة مكنش 100 ساعة مثلًا.
هنا مع سويسايد سكواد ممكن انطباعي الأول كان إن الموضوع مبشر إن الناس دي عارفة بتعمل إيه وشكله مشروع معمول علي إيد ناس بتحب الكوميكس ومقدرة الشخصيات.
لكن للأسف لو رجعنا ورا شوية وافتكرنا إن التيلرز الخاصة بجزءين لعبة Injustice كانوا معمولين بجودة عظيمة مماثلة، وفي الآخر كانوا لعبتين فايتينج ممكن نحطهم في خانة واحدة مع Street fighter و Mortal Kombat. غير كده هو في شركات كتير زي يوبي سوفت مثلًا بتعرف تعمل تريلرز عظيمة، ولكن الواقع مبيكنش زي اللي اتعرض ببساطة لإنه مش بيحاول يقدملك فكرة اللعبة، لأ هو بيبلغك فقط إننا بنعمل لعبة للسويسايد سكواد. الاحتمالين واردين ولكن اللي عايز استنتجه من الكلام ده كله، إن التريلر ده مش معبر عن أي شيء.


الاحتمالات الموجودة:

الاحتمال الأول هو إن تكون اللعبة دي لعبة قصة عادية، زيها زي سلسلة أركام، ولكن مع إضافة فكرة التيم، أو اللعب الجماعي من خلال القصة، واللي بيخليك تبدل بين الشخصيات وتلعب مع عدد من أصحابك خلال لعبة اهتمامها الأول والأخير هو القصة. وده شيء مبقناش نشوفه كتير في عالم الألعاب للأسف، يعتبر انقرض خلاص.

الاحتمال التاني هو إن تكون اللعبة هي لعبة لوتر، بنظام شبيه شوية بالأرينا شوتر من خلال المعارك مع افراد الجاستس ليج. سمعنا قبل المؤتمر بيوم إن في إشاعة بتقول إن فلاش ووندر ومن هيكونوا متواجدين كأعداء للSuicide squad في اللعبة هيكون عليك قتلهم. وبما إنه زي ماحنا شايفين في اتجاه لاستخدام السوبر هيروز في ألعاب خدمية زي أفنجرز، وGotham Knights، فوارد جدًا تكون دي كمان لعبة مشابهة ليهم، وده يفسر فكرة إن إصدارها هيكون بسنة فرق عن Gotham Knights.
الاحتمال ده مش سيء لو تم كتابة قصة بنفس مستوي التريلر، ومستوي ألعاب باتمان أركام اللي فاتت، مع إضافة بقي مجموعة من المهمات الشبيهة بالRaids من ديستني، ومهمات لعب جماعي تكون مناسبة لنوع الGrind اللي بيبقي في الألعاب من النوع ده. وطبعًا هيبقي في خط رفيع بين إنك تصمم مهمات هدفها تخلي الناس تدفع عشان تحقق Progress من غير تكرار وملل، وإنك تصمم مهمات فيها جرايند مقبول، وللأسف مشوفناش لعبة تقدم الخيار الأول بشكل ممتاز لحد انهاردة.

الشيء المثير للريبة بقي إن هل اللعبة دي مكنش مكتمل منها شيء خالص لدرجة إننا منشوفش ولا لقطة جيم بلاي ويكون الاختيار إننا نشوف تريلر كامل سينيماتك CGI؟ اللي يعرف عن صناعة الألعاب شوية عارف إن ده دايمًا اختيار مش محبذ، أو خطوة بياخدها الناشر لما تبقي لعبته مجرد فكرة علي ورق، أو بقي فيها مشاكل تطوير محترمة. السؤال التاني اللي مش قادر ألاقيله إجابة هو ليه بعد سنتين من دلوقتي؟ مش ده يعتبر بعيد؟ المفروض إن اللعبة بقالها 3 سنين في التطوير هل اللعبة فيها مشاكل تطوير للدرجة؟
لو حطينا الأسئلة دي علي جنب ورجعنا لورا شوية وافتكرنا الإشاعات اللي كانت بتدور حوالين مستقبل سلسلة أركام، ومشروع روكستيدي الجديد، هنكتشف إننا سمعنا كذا إشاعة متضاربين شوية، وكان النتيجة المنطقية هي إن فعلًا في لعبتين من وارنر بروس بيتطوروا في نفس الوقت، لكن برضو كان في لعبة سوبرمان سمعنا عنها كتير وشوفنالها صورة كمان، لكن يُقال إنها اتلغت عشان صعوبات تقنية في ظبط ميكانيكيات اللعب بسوبرمان، وتظبيط ده في خلال نافذة زمنية كان حاططها الناشر للمطور. إشاعة تانية كانت بتقول إنه في لعبة سويسايد سكواد تحت التطوير من الستوديو بعد إلغاء سوبرمان،والموضوع ده خلاني أروح لبعيد شوية بتفكيري واقول إن ممكن يكون الاتجاة كان إن مشروع سوبرمان ممكن يتم استغلال المجهود اللي اتحط فيه والميكانيكس اللي اتصممت لسوبرمان، في دمج مشروع اللعبتين مع بعض وإنتاج لعبة تستغل وجود سوبرمان.

 

السؤال المنطقي اللي هيجي بعد الاستنتاج ده، هو هل إحنا هنلعب بسوبرمان في اللعبة دي؟

الحقيقة أنا كل كلامي انهاردة مبني علي حاجة واحدة، حماسي اللي زاد بعد ما شوفت تريلر حلو. واللي بنشوفه من حوالينا في الصناعة بشكل عام.
وهنا بقي نيجي للآخر نقطة هتكلم عنها النهاردة، خلال السنة دي نزل لعبتين قدموا فكرة متشابهة شوية، وهم Resident Evil Resistance و Predator Hunting Grounds
لعبتين قدموا لعب جماعي، بيخلي مجموعة من اللاعبين يتحكموا بشخصيات تقريبًا من نفس الفئة أو الكلاس، وواحد من الاعبين يلعب بالVillain. يعني الNemisis في لعبة RE Resistance و Predator في لعبة Predator Hunting Ground. وفي حالة Suicide Squad ممكن تكون شخصيات الJustice league، ومنهم سوبرمان، باستخدام الجيم ميكانكس اللي تم تطويرها خلال مشروعه الملغي، بدون ما يكون في حرية مطلقة في التحكم بيه، وبالتالي، تجنب صعوبات التطوير.
الموضوع ممكن يبقي ناجح، خصوصًا إن التجربتين الليي ذكرتهم كان فيهم مشكلة مشتركة، وهي إن اللعب بالvillian بس هو اللي كان ممتع، وبيوفر تنوع وميكانكس مسلية في مواجهة الطرف التاني اللي بيكون أضعف. في رزدنت إيفل إنت كنت بتلعب بأربع أشخاص بشريين بيحاولوا يهربوا من مكان، وبيكون اللاعب اللي بيلعب بنيمسس متاح ليه مجموعة من الأفخاخ، والطرق اللي بيمنعهم بيها من النجاح، زي مثلًا إنه يستدعي زومبي، ويختارله المكان اللي هيظهر فيه. اللي عايز أوصله هو كمية التنوع اللي موجودة في جانب علي حساب التاني، وده اللي خلي النوعية دي من الألعاب مش ناجحة أوي، حتي ولو تواجد فيها قدر متعة لا بأس به.
في سويسايد سكواد الشخصيات اللي علي الناحية الأضعف، هم هارلي كوين، بومرانج، ديدشوت، وكينج شارك، ودي كلها شخصيات خارقة، أو عندهم قدرات قتالية قوية، وبطبيعة الحال هيكون ليهم ميكانكس مختلفة، وده شيء عظيم بيوحي إن ممكن يكون فيه تنوع ضخم جدًا.


في النهاية:

تقدر تعتبر كل ده أفكار ملهاش أي أساس، أو مناقشة كده علي الهامش، لا تمت للواقعة بصلة، ولكن أنا الحقيقة مش قادر أشوف التريلر علي ما هو عليه فقط، مجرد تعريف بالمشروع الجديد لستوديو روكستيدي، وده يمكن بسبب إني اتحمستله زيادة؟
مش قادر أشوف شخصيات Suicide squad في لعبة ميكونش فيها قصة، علي الرغم من إن فكرة اللعب التعاوين فكرة مش وحشة في حد ذاتها، لكن مشكلتها إنها في معظم الأوقات حتي ولو بدأت كويس، بينتهي بيها الحالي إنها تبقي منتج هدفه الربح، مش تقديم جودة يستحق عليها الفلوس.

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي