Articles, Console News, الأخبار, مقالات

ملخص قصة Halo

قصة Halo

الفصل الأول

هالو قصتها كبيرة جدا وعميقة، مؤلفين كتير اشتغلوا عليها وروايات كتيرة اتكتبت عنها، بس احنا هنساعدك ونقولك ملخص قصة العالم الضخم ده ايه، فجهز مشروبك الدافئ وشد اللحاف وانطلق معانا في رحلة Halo
عشان نسهل القصة هنذكر اولا الجماعات والفرق والأماكن المتنوعة والشخصيات والتواريخ المهمة في عالم اللعبة
الكوكب الحلقي Halo
وده اللي اتسمت عليه اللعبة اصلا، هالو عبارة ميجاستراكشر منشأ فضائي عظيم كوكب اصطناعي على شكل حلقة، الكوكب ده فيه سبل الحياة من مياه واكسجين ونباتات وحيوانات كلهم عايشين على الحلقة من الداخل، اللي صنعه هم سلالة فضائية اسمهم The Forerunners، واكتر من جزء بتدور احداثه على الكوكب ده اللي بيخفي وراه سر كبير.
الجندي الخارق Master Chief:
بطل قصة هالو معروف طبعا الشخصية الأيقونية الشهيرة في عالم الالعاب، هو جندي خارق من فرقة Spartan، صاحب الرقم التعريفي 117، انقذ لوحده البشرية مرات عدة، قليل الكلام ثقة في النفس كبيرة حكيم جدا، وضخم الهيئة، بالرغم من كده مش مشهور ولا معروف عند البشر، الجنود بس تعرفه وتعرف شجاعته وقوته
اذكى ذكاء العالم Cortana
دي بقى الشخصية اللي هي لونها ازرق هولوجرام، وهي عبارة عن ذكاء اصطناعي شديد التطور لدرجة اولا متعرفش تفرق في كونها بشر ولا AI كمان عندها قدرات كتيرة جدا، سلاح سري خطير في ايد البشر عندها القدرة التحكم في اي شئ الكتروني وعندها مكتبة واسرار وتاريخ البشر في عقلها تقدر تحسب اي حاجة وساعدت ماستر شيف في حماية البشر وهي رفيقة ماستر شيف في رحلته
سلالة The Forerunners
دول شعب منقرض بس كان متطور جدا كان عندهم حضارة متقدمة جدا، وشكلهم يشبه البشر ولكن ارقى واعلى من البشر بكتير، كانوا اسياد الكون، ومن كتر تطورهم عندهم القدرة على صناعة الكواكب تخيل، في الحقيقة ان الforerunner  كان ليهم اسلاف هما الخلقوا عرق الforerunner، بس للاسف الforerunner شافوا نفسهم انهم افضل عرق في الكون، فبعد ما اخدوا معظم العلم من اللي خلقوهم ثاروا عليهم وحاربوهم وقتلوهم كلهم، بس للاسف تحول غبار و ذرات جثثهم الي كابوس وجحيم لا يمكن ايقافه وشر لا يمكن منعه، الشر ده اسمه The Flood
كائنات Flood
 الflood دول كائنات طيفيلة بتفترس اي كائن حسي حي، وبتحوله لكائن غير عاقل مفترس بينقل العدوى لغيره، زي الزومبي كده، بس الكائنات دي كلها رغم انها غير عاقلة بس هما كلهم متصليين بعقل واحد، والعقل ده في كائن ضخم اسمه Gravemind وده بقى شكله تحس انه اخطبوط كده بس ضخم جدا بيتحكم في جميع الطفيليات دي، والFloods دول بياكلوا الاخضر واليابس بيتنقلوا بين الكواكب وهددوا كل الحضارات وكل الكائنات الحسية
حكومة البشر العالمية
البشر بقى كونوا اتحاد وخلوا الارض كلها دولة واحدة والحكومة بتاعتها اسمها United Nation Space Command واللي تعرف اختصارا ب UNCS واللي قدرت تغزوا الفضاء وتبني المستعمرات في كواكب عدة، بس حصلت نزاعات وثورات كتيرة في المستعمرات في انحاء المجرى، مما دفع الحكومة انها تعمل مشروع سري اسمه Spartan Project وده من خلاله هيطلع جنود خارقين واللي منهم Master Chief الجنود دول هيتم اختطافهم ومن هما لسة اطفال، ويتم محي ذاكرتهم وحقنهم بادوية واجراء لهم عمليات وتجارب عشان يطلعوا جنود اقوياء ميعرفوش حاجة غير الحرب Killing Machine يعني، وهيلبسوا بدل مصنوعة من مواد تحميهم من الطلقات وغيره من تهديدات، المهم الجنود دول فعلا قدروا ينهوا كل النزاعات وترجع هيبة الUNSC في كافة مستعمراتها، ولكن يحصل اول احتكاك بين البشر وبين اول شغب فضائي ليهم وهم The Covenant
حضارة The Covenant
الحضارة دي اللي Master Chief والبشر عموما بيحاربوهم طول الوقت في كل الاجزاء، ودول عبارة عن تحالف مقدس بين أعراق متعددة أهمهم :
  • سلالة شانجهيلي اللي معروفين عند البشر بأسم Elites ودول اللي هما جنوده لابسين دروع قوية زي ال Spartanومعاهم سيوف وبيختفوا أو رشاشات وبيعرفوا يهربوا من طلقاتك
  • سلالة چيراهاني اللي معروفين بإسم Brutes ودول اللي منهم Craig 😅 بيتميزوا بضخامة وقوة جسمهم وبيحاربوا بالأسلحة الثقيلة والمدافع
  • سلالة شانشيوم واللي معروفين بأسم Prophets ودول بيكونوا المجلس الأعلى لقيادة الحلف المقدس وده وهما الكهنة للدين اللي بيعتقنوه ال Covenant
  • سلالة اونجوي واللي معروفين بأسم Grunts ودول يعيني مغلوبين أمرهم صغيرين الحجم وضعاف، وبيحاربوك بأسلحة خفيفة، بس خد بالك من اللي بيفرقعوا نفسهم فيك
حقبتي BCE و CE
اول حاجة ننسى الBC والAD، احنا عندنا هنا تاريخ العالم في القصة ديه مقسوم لBCE و CE يعني عصر قديم واسمه Before Common Era وعصر بتدور فيه احداث هالو وهو Common Era
نبدا بحقبة BCE
ودي بتمد لمئات آلاف السنين، متخيل الرقم يعني اقدم من تاريخ البشر على الأرض اصلا في عالمنا، المثير بقى في الموضوع أن أن كان في بشر لينا أسلاف عايشين موجودين في الزمن ده، وعن شرط كانوا عندهم حضارة فضائية ضخمة، وفي إحدى رحلاتهم الاستكشافية زاروا إحدى الكواكب يروحوا يلاقوا ايه ؟؟!
الFlood فاكرهم؟ الجحيم اللي لا يمكن ايقافه؟ المشكلة أن الكوكب ده كان بتاع ال Forerunners اصلا بس أدمر على ايد الFlood راحوا البشر حاربوا الFlood، وهنا القائد العام لجيوش ال Forerunners واللي اسمه Didact يستغل الحصل ده كذريعة حرب ضد البشر وفعلا المجلس الأعلى وافق وبدأت الحرب بين البشر الأوائل وال Forerunners
كانت حرب مهلكة اتهزم فيها البشر شر هزيمة وDidact يروح مدمر الحضارة البشرية كلها وخليهم يرجعوا تاني لنقطة الصفر يستخدموا الحجارة وصيد الحيوانات، بالرغم من قوة ال Forerunners دي إلا أنهم برده مش قادرين على ال Flood وخلاص الوباء ده بدأ يغزوا المواكب والمستعمرات الرئيسية بتاعتهم
لحد ما قرر ال Forerunners يصنعوا ال Halo Array ايوه هالو اللي ذكرتها في أول كلامنا خالص، طب ليه هالو؟ لان هالو مش مجرد كوكب اصطناعي قابل للحياة لأ، ده Super Weapon قادر على اهلاك الحياة في الكون كله، تخيل لما يكون سلاح بحجم القمر مثلا؟ لان الحلقات أو الخواتم دي هتبث موجات كهرومغناطيسية تموت اي حاجة حسية أو كائن حي يلمسها
قدروا فعلا يصنعوا ال ARK وده عبارة عن محطة فضائية عملاقة جدا يتصنع ال Halos ايه مش هالو واحد، انت محتاج كذا هالو عشان تكون الحياة كلها في الأكوان، وال ARK ده بيتحكم فيه AI عظيم اسمه  Mendicant Biasالمشكلة بقى أنهم لسة منتهوش من صناعة الدروع اللس هتحميهم من إشاعات وموجات هالو.
 وأثناء إنشاء الدروع دي، قائد الجيوش Didact رفض فكرة هالو وجه بفكرة تانية وهي انهم يحولوا أجسادهم العضوية الحسية الي أجساد معدنية وبالفعل عمل كده في الجيش الخاص بتاعه، المجلس الأعلى لل Forerunners رفض الفكرة دي وقرر يعاقب Didact على فعلته دي وحبسوه جوه كورة يفضل نايم فيها حياته كلها، وعلى الرغم أن Didact كان شرير الا زوجته كانت طيبة وعملت حركة عظيمة جدا
زوجة Didact قامت بحفظ كل الأحماض النووية لكل حاجة حية وحسية في الكون، زي البشر وباقي الكائنات الفضائية وجميع النباتات والحيوانات وكل مظاهر ومقومات الحياة، حفظت الأحماض النووية دي في ال Halos بحيث بعد ضخ الموجات وإهلاك الكون يروح يصنع الكون تاني من اول وجديد بس من غير ال Flood بقى، وكمان نقلت العلوم المهمة وخزنتها في اجهزة شبه الكومبيوتر هيبقى اسمها بعد كده Artifacts عشان لما البشر وغيرهم يرجعوا للحياة يدرسوا العلوم دي ويتطوروا بصورة اسرع
فاكر ال Gravemind ؟ اللي ذكرته فوق في Section الخاص بال Flood الوحش الضخم والعقل الأوحد للجميع الطفيليات، قدر يوصل للذكاء الاصطناعي بتاع ARK مصنع ال Halos، قدر Gravemind يهزم كل دفاعات الذكاء ده Mendicant Bias وسبب ليه خلل، الخلل ده على Bias يقلب على اللي صنعوه Forerunners ويفعل الهالوز ويخلي كل ال Halos تطلع موجاتها المميتة واصلا ال Forerunners مكنوش خلصوا من بناء الدروع اللي هتحميهم
والموجات من الهالوز ضربت، وكل حاجة كل حاجة حرفيا ماتت، الكون كله بمجراته وكواكبه ونجومه ماتت، ظلام دامس سكون وهدوء الموت في كل مكان، ولكن تمر الاف السنين والاحماض النووية المخزنة في ال Halos تنموا ويظهر النباتات والحيوانات والARK يرسل الاحماض النووية بتاعت البشر للأرض وباقي الاعراق الفضائية الي كواكب اخرى، وتبدأ دور الحياة من اول وجديد
مرت الاف السنين ونهض البشر مره اخرى وهنا يبدأ التاريخ من الصفر وتعداد جديد وهو الCE  ومر على البشر ما مر عليه في واقعنا من علوم واكتشافات وايضا حروب وصراعات ومؤامرات وحدثت حروب عالمية والمفروض ان الخير انتصر فيها على الشر وتكونت حكومة ارضية عالمية. ولكن للاسف الصراعات لم تنتي حيث اتنين اخوات واسمهم Koslovics و Frieden كان حلمهم ان مجد الشيوعية يرجع تاني وقرروا انهم يقضوا حياتهم على تحقيق هذا الامل الي ان وقع في ايديهم الartifacts بتاعت زوجة didact العملتها قبل ما تموت من آلاف آلاف السنين وبدأ الاخين دول يصبح عندهم علوم جديدة وخطيرة فهربوا للقمر ومعاهم اتباعهم في سفينة واحدة وبنوا جيش آليين بذكاء اصطناعي علي القمر واستعدوا لغزو الارض.
الحكومة العالمية بتاعت الارض فعلت كل ما بوسعها وطورت من نفسها وعملت حكومة جديدة اسمها UNSC اللي ذكرناها فوق، ونجحوا في الحرب وسيطروا على القمر وهزموا الاخين، تقريبا الاخين معرفوش يفهموا كل علوم المخزنة في ال artifacts ووقع في ايد الحكومة العلوم ديه وبدأ البشر في النهوض أكثر واكثر وتزداد قوتهم وتوصل قوتهم للمريخ ويحكموه وواكتشفوا كوكب جديد خارج نظامنا الشمسي قابل للحياة واسمه Reach واصبح البيت الثاني لدى البشر بعد الارض , طبعا البشر ميعرفوش حاجة عن التاريخ القديم ميعرفوش مين اوجد العلوم ديه وميعرفوش مين الforerunner واسلافهم ومين الflood ومين الcovenant لكن مش مهم تاريخها المهم ان الحكومة وصلت للعلوم ديه.
بس للأسف برده الصراعات لم تنتهي حيث بدأت الحكومة ديه يبقى فيها فساد وناس اشرار يحكومها ومنازعات كتيرة اشهرها ثورة اهل المريخ  وزعزعة في جميع مستعمرات البشر ولكنها باءت كلها بالفشل بسبب فرقة الSpartans الجنود صنعتهم الحكومة اللي ذكرناها فوق قبل كده
ده كان قصة البشر، طب بالنسبة لباقي الاعراق؟ برده حصلهم زي ما حصلوا للبشر بداية من الاحماض النووية بدأوا من الصفر وكل عرق عمل حضارتهم بس كان في اتنين معينين منهم كانوا اتطور بسرعة وهم الشانجهيلي والشانشيوم ذكرناهم فوق ودول اللي اسسوا تحالف وحضارة جديدة بأسم الCovenant بس قبل التحالف ده كان في صراع على ارث الforerunner وحصلت حروب بينهم، لكن بعد التحالف بداوا يتطلعوا سويا على ارث الforerunner من علوم وغيره وبدأوا يرتقوا ويكتشفوا الفضاء ويكتشفوا المدن الجميلة والكواكب الرائعة الكانو الforerunner بنوها زمان من الاف السنين واصبحوا اقوية واصبحوا احفاد الforerunner فعلا
الشانشيوم او كما يطلق عليهم البشر prophets كانوا هما اعضاء مجلس الحكم وفي نفس الوقت رجال دين وكانوا مقتنعين بشيء غريب جدا ألا وهو ان ال  Halosدي طريقهم للخلاص، وعشان يخشوا الجنة لازم يفعلوا ويشغلوا ال Halos!!!! في هذه الفترة ولد Master Chief عام 2511 CE واسمه الحقيقي جون خطفته الحكومة وادخلته لسلاح العسكرية عام 2517 وابلى بلاءا حسنا في كثير من المعارك وعمل بطولات عدة
بس للاسف بعد ما ال UNCS رجعت سيطرتها على كفاة المستعمرات الفضائية ملحقتش تفرح وحصل اول احتكاك بين البشر والCovenant وسرعان ما اعتبر الProphets ان البشر كفرة ولازم يتقتلوا كلهم من أجل الخلاص المقدس، وفي عام 2525CE هاجم الCovenant احدى محطات فضائية تابعة للبشر ومن هنا بدأت الحرب الخاطفة المهلكة على البشر، الCovenant كانوا متطورين من البشر بكتير ومعاهم اسلحة وتقنيات تفوق البشر، فبدأت سفن الCovenant الفضائية بتبخير اسطح الكواكب اللي بيسكنها البشر لحد ما دمروا كوكبين، وزحفوا بعد كده للكوكب الثالث Reach اللي ذكرناه فوق هو البيت التاني بعد الارض للبشر
لحسن الحظ كانت فرقة الSpartans موجودة على كوكب Reach ومنهم فرقة Noble وهنا تدور احداث جزء Halo Reach وبتلعب فيها احد اعضاء فرقة Noble وبيكون اسمك نوبل6 واللي مهمتك تكون ابطاء زحف الCovenant لحين اخلاء البشر من عاصمة الكوكب وتنجح في كده بس بعدها بتتكلف في مهمة تانية خطيرة وهي ايصال سلاح سري لآخر سفينة فضائية لدى البشر هتقلع من كوكب Reach السفينة دي اسمها Pillars of Autumn والسلاح الخطير ده هو كورتانا !!
واحد تلوا الاخر من فرقة Noble يموت في الحرب وميتبقاش غيرك انت بس تنجح وتقدر توصل Cortana لقبطان السفينة Captain Keys واللي يقولك يلا يبني اركب معانا ولكن انت نوبل 6 يرد بمقولته الشهير
“Negative Commander, I Have my Gun”
انت كنت من الارض دي كوكب Reach قررت تحارب لحد اخر لحظة في عمرك في ترابها وتموت بجانب زملاءك في الفرقة، وفعلا دي كانت المهمة الاخيرة بعنوان Survive انت لوحدك ادام جيوش من الCovenant قعد اقتل فيهم بس انت عندك فرصة واحدة فلو هتموت وحتما هتموت هتقع على الارض وينتهي الجزء العظيم ده Halo Reach
تبدأ على طول احداث الجزء الاول بمأساه ضياع كوكب reach البيت الثاني لدى البشر سقطت في ايد الcovenant قتلوا مئات الاف ونجاة القليلين وفرت اخر سفينة فضائية عملاقة من reach ولكن سفن الcovenant تتبعها وتهجم عليها وتسقطها على كوكب حلقي ايوه هو halo قبل ما تسقط السفينة كابتن keys امر الجنود بأنهم يطلعوا اقوي جندي من ال Cryosleep وهو ماستر شيف، وبعدخا يدي أمر لماستر شيف بانه ياخد كورتانا ويحميها وميخليهاش تقع في ايد الcovenant لانهم لو اخدوا كورتانا هيعرفوا كل حاجة عن البشر وهيعرفوا مكان الارض وبالفعل ماستر شيف ياخد كورتانا ويفضل يحارب في الcovenant اللي اخترقوا  السفينة لحد ما وقعت السفينة الضخمة على halo ، اخيرا رجعنا تاني لHalo وخد بالك البشر دول اول مره يشوفوا الهالو
المهمة الجديدة انك تبحث عن كابتن keys اللي كان في السفينة لما وقعت والcovenant قبضوا عليه وتبحث عن كل سبل النجاة علشان تهربوا من الكوكب الحلقي الغريب ده وبالفعل وانت عمال تحارب هتعرف مكانه الكابتن وهتلاقيه وهتفك اسره ولكن الخطة تتغير والكابتن يؤمر ماستر شيف انه يحارب الcovenant ويسيطر على مركز التحكم بتاع هالو ويعرف ايه غرض هالو بعد ما كورتانا عرفت تترجم كلامهم وفهموا انه كوكب صناعي ليه منطقة مركزية بتتحكم فيه،  وبالفعل ماستر شيف يحارب لحد ما يوصل لغرفة التحكم ويخلي كورتانا تبحث وتعرف ايه هالو وفجاة كورتانا تتعصب وتخاف وتقول لماستر شيف ارجع بسرعة احمي الكابتن وبالفعل ماستر شيف يجري للكابتن لكن يلاقيه مات من ……….. تخيل مات من ايه ؟ مات من الfloods ؟؟؟
 ايه ده ياعم الحج مش دول ماتوا من عشرات الاف السينين ؟؟
للأسف الFlood لسة موجودين على الHalo  ده وال covenant عمالين بيحاولوا يقضوا على الflood عشان يعرفوا ينشطوا هالو لاسباب عقائدية زي ما قولنا، ولكن دول الFlood كابوس لا ينتهي، عمال يتنشر ويقتل ويحول كل الامامهم ويبدأوا في السيطرة على هالو والcovenant عمالين يصوتوا مش ملحقين من ضربات ماستر شيف ولا من ضربات الflood
بعد كده يلاقي ماستر شيف الكابتن مات وياخد منه قلادته وهو راجع لكورتانا يظهرله ال شخصية جديدة اسمها Guilty Spark   343  وهو عبارة عن AI على شكل الكورة كده وبيطير، لو ناسي فاكر الAI بتاع الARK هو برده في AI اصغر منه لكل Halo
 المهم ان 343 Guilty Spark تحدث مع ماستر شيف ويكذب عليه ويقوله ان هالو ده سلاح للقضاء على الflood بس، هو طبعا AI مهمته يشغل الهالو، فعايز ماستر شيف يساعده في كده، بس هو جهاز اسمه Index عشان يشغل الهالة بس هو موجود في مكان تاني فقال لماستر شيف يروح يجيبهوله، ماستر شيف قاله ماشي بس رجع لكورتانا الاول
 ولما رجع وكورتانا شافت الArk راحت فرشت الملاية لماستر شيف وتقوله ازاي تمشي مع الكائن ده ؟؟ ده المسئول عن تنشيط هالو وده سلاح لتدمير الحياة كلها والAI يقوله متصدقهاش انا الصح بس طبعا ماستر شيف يقف مع كورتانا اللي كان بدأ تطور علاقة ما بينهم بعد الرحلة دي، ويحارب ماستر شيف الAI ويدمره هو وحراسه
هنا بقى كورتانا  تفكر وتقول لشيف اننا لازم ندمر هالو علشان البشر ميمتوش فقالت الحل الوحيد  هو جعل سفينة البشر العملاقة الوقعت على هالو تدمر لأن لو ادمرت هينفجر انفجار نووي هيشع درجة حرارة عالية تدمر هالو بالكامل فمكنش في حل غير ان ماستر شيف يروح لمكان سقوط السفينة ويدمرها ذاتيا وبالفعل ماستر شيف ينجح في كده ويعمل حاجة في  السفينة معرفش دمر ايه كده المهم السفينة بدأت في الدمار وانت بقى عمال تهرب وتهرب والدنيا بتدمر حواليك لحد ماتركب سفينة فضائية صغيرة كده وتطير من هالو ويروح السفينة تطلق كامل حرارتها وهالو يدمر
ويرجع شيف للارض مع كورتانا منتصرين بس معرفوش يحتفلوا بسبب ضياع reach وموت اهلها  وكده كده مش من حقهم يفرحوا لأن اللي ادمر ده مش آخر halo لسة موجود هالوز تانية ومن هنا يبدأ الجزء التاني، ومعاه هيبدأ الفصل الثاني من رحلتنا مع قصة Halo واللي هنذكر فيها احداث اجزاء Halo 2 و Halo 3 وHalo 4 وHalo 5 و Halo Wars 2 وبكده هتكون جاهز وفاهم كل حاجة قبل ما تلعب Halo Infinite
تابع معانا لان الفصل الثاني هينزل قريبا، ونحب ان نشكرك على القراءة ونرجوا ان تكون الرحلة كانت ممتعة
ملحوظة دي مجرب ملخص مجرد قشرة من احداث وقصص Halo لو عايز تعرف اكتر لازم تلعب
ألبوم الصور

 

الكوكب الحلقي Halo

الجندي الخارق Master Chief

الذكاء الاصطناي اللي ملوش مثيل Cortana

مصنع الهالوز The ARK

الشر المقيم Gravemind

فرقة الSpartans

الجحيم الFloods

شعب الForerunner

 Didact  ومراته

شعب ال Covenant

حرب البشر والForerunner القديمة

حرب البشر والCovenant الحديثة

سفن الCovenant وهي بتحرق وتبخر سطح كواكب البشر

السبارطي نوبل6 بطل Halo Reach

لحظة اقلاع السفينة العملاقة الاخيرة Pillars of Autumn من على سطح كوكب Reach

ماستر شيف على سطح الكوكب الحلقي Halo لأول مره

ماستر شيف يقاتل الFlood

القبطان Captain Keys

الذكاء Guilty Spark 343

ماستر شيف وهو نايم في الCryosleep يتم ايقاظه فقط في وقت الخطر

تدمير Halo في الجزء الاول والمعروف بأسم Installation 04