عن الألعاب, مقالات

ليه تتحمس لإضافة DOOM Eternal ولعبة Little Nightmares II

كواحد من عشاق سلسلة DOOM فأهم حاجة كنت مستنيها في بث Gamescom Opening Night Live 2020 هي إضافة The Ancient Gods للعبة DOOM Eternal وفعلاً إستوديو id Software مخيبش أمالي وقدم عرض محترم جداً للإضافة وكمان أعلن عن ميعاد إصدارها.

الإضافة في التطوير بقالها فترة كويسة حالياً وهتقدملك مجموعة من التحديات الجديدة. الإضافة هي عبارة عن تكملة مباشرة  لأحداث قصة DOOM Eternal والـ DOOM Slayer لازم هيرجع Urdak مرة تانية وهيروح اماكن جديدة عشان يطهرها من وجود شياطين الجحيم.

بشكل عام القصة لسة مش واضح هي هتقدم ايه بالظبط بس من العرض فا واضح إن الـ Seraphim هيبقى له دور قوي وهيعمل تحالف مع الـ Slayer عشان يساعده في رحلته، كمان في اخر الإعلان واضح إن الـ Slayer هيقابل واحد من الـ Ancient Gods وديه هتبقى حاجة مميزة جداً.

إستوديو id Software أكد إن Satan هيتواجد في الإضافات وشخصياً أتوقع إننا هنشوفه بس مش هنحاربه وهيبقى تجهيز للجزء الثالث والي أكيد هنحارب فيه Satan وهنتفوق عليه عشان نقضي على الشياطين كلها تماماً. إَضافة The Ancient Gods مش هتقدم أسلحة جديدة للـ Slayer بس هتقدم أماكن جديدة تستشكفها في رحلتك مع عودة واحد من الشياطين المميزة من جزء 2016 وهو الـ Summoner .

لو انت من عشاق DOOM Eternal زيي فأنصحك تشتري الـ Season Pass كامل بـ 30 دولار وهيكون ضامم للإضافتين بدل ما تشتري كل إضافة لوحدها بـ 20 دولار. إضافة The Ancient Gods Part 1 هتصدر على الحاسب الشخصي و PlayStation 4 و Xbox One في 20 أكتوبر 2020. الإضافة التانية هتكمل القصة وهتتوفر في 2021 بس لسة مفيش تفاصيل عنها حالياً. لحد مالإضافة تنزل خش شوف مراجعة اللعبة من الرابط ده واعرف ليه انا عطيت اللعبة علامة كاملة.

تاني لعبة كنت متحمس أشوفها في البث هي Little Nightmares II خاصةً واننا مشوفناش حاجة  جديدة عن اللعبة من العرض الأول الي نزل السنة الي فاتت.

الإستوديو المرة ديه شارك بعرض على الرغم من انه قصير الا انه استعرض شوية لقطات مميزة جداً من الجيم بلاي، شخصية Six بتاعت الجزء الأول بقت شخصية جانبية هتساعدك في الجزء الثاني انما الشخصية الرئيسية هي شخصية Mono وديه شخصية جديدة تماماً.

اسلوب اللعبة على الرغم من انه مُشابه بشكل كبير للجزء الأول الي نزل 2017 إلا ان العرض الاخير بيوضح وجود مجموعة ضخمة من أفكار الألغاز الجديدة، كمان الأعداء بقى شكلهم مبتكر ومرعب اكتر خاصةً الأستاذة الموجودة في المدرسة واظن ديه هتكون واحدة من أكتر المراحل رعباً في اللعبة.

الجزء الأول في 2017 قدم تجربة استثنائية جداً ولحد دلوقتي اللعبة تظل واحدة من افضل ألعاب الـ Platformer الي جربتها في حياتي عشان كدة انا متحمس اشوف الاستوديو هيقدم ايه في الجزء الثاني خاصةً مع تأكيد ان اللعبة هتكون أطول من الجزء الأول. الجزء الأول كان بيخلص في حوالي 3 ساعات تقريباً وكانت المراحل فيه قليلة انما الجزء الثاني هيضم مراحل اضخم وأوسع وعمر اللعبة نفسها هيكون أطول بكتير من الجزء الأول. ده غير طبعاً التحسينات الرسومية الضخمة والألغاز الجديدة، بشكل عام التجربة هتكون مرعبة وممتعة اكتر من الجزء الأول.

لعبة Little Nightmares II هتصدر في 11 فبراير 2021 على الحاسب الشخصي و PlayStation 4 و Xbox One. نسخة PS4 تقدر تلعبها على PS5 ونسخة Xbox One تقدر برضو تلعبها عادي على Xbox Series X ولكن الإستوديو أكد ان هيكون في نسخة تانية هتصدر في وقتٍ لاحق من سنة 2021، النسخة ديه هتقدملك تحسينات رسومية كبيرة وأداء اكثر سلاسة مخصص للجيل الجديد فقط !

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.