Articles, News, Reviews, استعراضات, الأخبار, دليلك, عن الألعاب, مراجعات, مقالات

مراجعة لعبة Steelrising

ألعاب السولز بقت أشهر من النار على علم في 2022، والسنة اللي بدأت بلعبة سولز عملاقة زي إلدن رينج ماينفعش تعدي من غير ما نشوف لعبة جديدة جميلة من النوع ده زي Steelrising واللي من أول ما تم الغعلان عنها أبهرتني وأسرتني بسحر عالمها اللي بتدور أحداثه في تاريخ بديل في حقبة الثورة الفرنسية.

Steel rising فيها عناصر جذب كتير أولهم إنها لعبة سولز، لكن تانيهم وأهمهم إنها لعبة السولز الوحيدة اللي بتركز أوي على القصة وبتقدم مقاطع سينيمائية فعلية، وده هيخليك لو بتكره ألعاب السولز بسبب إن قصصهم غامض بزيادة تتقبل steel rising.

طيب هتعمل إيه يا وحش لو قولتلك إن مطور اللعبة هو هو مطور لعبة Greedfall ؟ لعبة كانت نزلت في 2019 وأبهرت الناس وحققت شعبية محترمة، وكلنا كنا مستنين مشروع الاستوديو الجي..طيب المشروع وصل أهو، فهل كان يستاهل الانتظار من 2019 لدلوقتي؟

القصة

بتلعب بإيجس، آلية متمردة بتساند الثوار اللي بيخطط الملك لويس السادس عشر إنه يقضي عليهم بمجموعة من الآليين المتوحشين. الآليين دول بيخرجوا عن السيطرة ويحلتوا باريس، ودورك هو طردهم ومواجهتهم بمساعدة بعض الشخصيات اللي كانت موجودة في الحياة الواقعية وقتها منهم ماري أنتوانت.

القصة بتقدم أحداث متوسطة ومتوقعة بعض الشيء بصراحة، وماكنتش مبسوط بيها خالص على عكس Greedfall على الرغم إن القصة هنا فيها إمكانيات أكبر كان ممكن يتم استغلالها استغلال أفضل كتير. وشوش الشخصيات البلاستيكية أثرت كتير على استمتاعي باللعبة، وخلتني باضطر أفوت المقاطع السنيمائية ساعات.

الجيم بلاي وتصميم العالم

اللعبة مش زي إلدن رينج يعني لا هي عالم مفتوح ولا شبه مفتوح حتى. اللعبة ماشية بنظام المراحل بشكل مباشر وكلاسيكي هتحس إنها لعبة قديمة شوية في الحتة دي بالذات لكن ده مش حاجة وحشة إطلاقًا، لإن البيئات مليانة تفاصيل وأعداء وأشياء قابلة للجمع.

الجيم بلاي معتمد على ضرب الأعداء وتفادي ضرباتهم السريعة، ولإن كلهم آلات فتصميمهم كان معتمد على دروعهم السميكة وأجسامهم المعدنية وكل ما هتضربهم هتسمع أصوات الخبط على الحديد كأنك بتخبط على حلل..!!

المعارك متفذة حلو جدًا وممتعة والتحرك في عالم اللعبة حلو بس للأسف عليه قيود غير مبررة. في نص اللعبة أخدت Grappling hook و مهارة Double dash لكن اللعبة كانت بتمنعني استخدمهم في لحظات مع إنه نظريًا ممكن يفيدوني.

معارك الزعماء كانت صعبة بما فيه الكفاية بس عيبها إنها شبه بعضها ومفيهاش التجديد الكافي، اللي كان حلو وفي تجديد هو نوعيات الأسلحة اللي بيمتلك كل واحد منهم ميزة مش عند غيره، واللي كان بيخليني دايمًا أجرب أسلحة جديدة وأسعى للتغير فيهم.

الأسلحة تصميمها لطيف جدًا، في سلاح عبارة عن مروحة ليها شفرات حادة بيتم استخدامها كسلاح هجومي او درع دفاعي، وكمان في خطاف مميز ممكن تستغله عن طريق إشعال النار فيه وضرب الأعداء باستخدامه.

على ذكر النار، اللعبة فيها 4 كلاسات (فئات) ممكن تختار بينهم وهم Alchemist و Bodyguard, dancer و soldier وكل واحد له طريقة هجوم وبيختلفوا في المهارات اللي كل واحد كويس فيها. لإن في 6 مهارات أساسية على حسب مستواك في كل واحدة بيتحدد إيه الحركات اللي بتقدر تعملها كويس وإيه نقط ضعفك. شخصية Alchemist مثلًا بتقدر تستخدم النار ببراعة وتزود الضرر اللي بيحصل للأعداء لما تضربهم بالنار.

شخصية الBodyguard كويسة في الدفاع وتفادي الضربات والسرعة وهكذا، وشخصية dancer تقدر تتسلل، وسريعة في الحركة وتفادي الضربات برضو. وأه اللعبة فيها تسلل بيسهل عليك اللعب كتير لو أنت مش من محبي ألعاب السولز أو مش واخد عليها.

الترجمة العربية

اللعبة مترجمة للعربي، والترجمة كانت معقولة بس كان فيها أخطاء، وده بيخليني أرشحلك تلعبها مترجمة بس في حالة لو كنت مش بتفهم إنجليزي خالص، غير كده إلعبها بالإنجليزي أفضل.

رسوميًا اللعبة مش واو، لكن جيدة جدًا والتصميم بتاع الخرايط جميل وهيخليك تحب تتجول فيهم وتشوف مقدمين إيه خصوصًا إن الحقبة التاريخية دي مش بتتقدم كتير.

تقنيًا اللعبة جميلة على كل المنصات واداءها معقول جدًا لكن ماتوقعش حاجة خرافية على أي منصة لإن اللعبة معمولة بميزانية متوسطة، وعلى الرغم إن نظريًا في تتبع أشعة على البي سي لكن مش هتحس بالفرق الرهيب لما تشغله بل بالعكس هيأثرلك على الأداء فليه ياعم..بلاش منه.

في الآخر، لعبة Steelrising هي واحدة من  امتع ألعاب السنة لكن كنت مستني حاجة أقوى وأكثر اكتمالًا من الاستوديو اللي قدم Greedfall من 2019. كنت عايز حاجة على لفل جديد. كأول تجربة سولز ليهم فهي مرضية جدًا وصعبة بس في نفس الوقت مناسبة للناس اللي ملعبوش السولز قبل كده…لكن القصة متواضعة بكل المقاييس.

بنصح الكل إنه يجرب اللعبة دي خصوصًا لو بيحب الألعاب اللي بتقدم معارك حلوة.

التقييم

10 / 7.5

اللعبة متوفرة لدى متجر جيمزاوي و تقدر تشتريها من هنا