Articles, Gaming News, News, Reviews

مراجعة Resident Evil Village

خلال الكام سنة الي فاتوا شركة Capcom قدرت ترجع تاني وتثبت قوتها في عالم الألعاب، سلسلة Devil May Cry رجعت بالجزء الخامس وسلسلة Monster Hunter رجعت بلعبتين ممتازين، ولكن الأهم هي سلسلة Resident Evil والي رجعت بجزء سابع قدم نقلة ضخمة في عالم رزدنت إيفل والي كان لأول مرة بيتقدم من منظور الشخص الأول.

الجزء الثامن الرئيسي من السلسلة نزل تحت عنوان VILLAGE والي بالنسبالي بقى واحد من أفضل التجارب في السلسلة كلها، حضر مشروبك الحلو وابدأ استمتع بالقراءة لإن في كلام كتير مهم هنقوله النهاردة.

أحداث قصة Resident Evil Village بتبدأ بعد 3 سنين من أحداث الجزء السابع، Chris Redfield نقل بطلنا Ethan Winters ومراته Mia لقرية في أوروبا عشان يبعدوا عن الأنظار خاصةً بعد الي حصل في بيت عائلة الـ Bakers. أول كام دقيقة في اللعبة بتوضح إن حياتهم بقت كويسة وعايشين من غير مشاكل وكمان خلفوا طفلة كيوت إسمها Rose والي عمرها 6 شهور بس.

ولكن السعادة ديه مش بتفضل مستمرة كتير لإن بشكل مفاجئ بيتم الهجوم على البيت من قبل Chris Redfield ومجموعة تابعة له وبيقتلوا Mia وكمان بيخطفوا Rose و Ethan، بعد كام ساعة Ethan بيفوق وبيتفاجئ إنه في قرية مليانة وحوش ومستذئبين وهدفوا الأساسي والوحيد هو انه يوصل لبنته Rose ويعرف الي حصلها.

قصة Resident Evil Village مليانة تفاصيل وشخصيات مهمة جداً سواء كانوا أصدقاء لـ Ethan أو الأعداء الرئيسين والي اتقدمولنا بشكل مميز زي Lady Dimirescu و Heisenberg، كمان اخر كام ساعة في اللعبة بتربط بشكل ممتاز بين أحداثها واحداث مجموعة كبيرة من الأجزاء السابقة في السلسلة وبنعرف تفاصيل أكثر عن كل الشخصيات وأسباب وجودهم في القرية الملعونة ديه.

أنا اللعبة أخدت مني حوالي 12 ساعة عشان اخلصها وكنت مركز بشكل رئيسي على القصة وبعض الاحداث الجانبية، في مهمات  وأنشطة جانبية كتير ممكن تعملها في عالم RE Village والي ممكن توصل معاك اللعبة لـ 15 أو 16 ساعة لو فكرت تنهيها بنسبة 100%.

زي الجزء السابع فلعبة Resident Evil Village بتتقدم من منظور الشخص الأول ولكن المرة ديه اللعبة بقت سلسة أكتر من الجزء السابع وحركة الشخصية الرئيسية وإستخدامه لمختلف الأسلحة بقت واقعية جداً. زي أي لعبة Resident Evil في التاريخ فأنت هيكون معاك ترسانة ضخمة من الأسلحة هتتقدملك على فترات خلال الساعات الي هتقضيهم في عالم Village.

أسلوب Resident Evil Village بيقرب بشكل ملحوظ من Resident Evil 4 خاصةً لما يتم تقديم شخصية الـ Merchant والي بإسم The Duke، البائع ده هتقدر تستفيد منه بشكل ملحوظ بإنك تعمل تحسينات لأسلحتك وتشتري منه ذخيرة وموارد مختلفة، كمان هتقدر تلم شوية Collectibles من قتلك لمختلف الأعداء وإستكشاف البيئة وتبيعها للدوق عشان تاخد فلوس وبالفلوس ديه تشتري موارد تانية وهكذا. وجود الدوق كان مميز وعلى الرغم من إنه مش بنفس قوة الـ Merchant الي كان في الجزء الرابع إلا إنه لا يزال شخصية عظيمة هيساعدك بشكل كبير خلال رحلتك في Village. كمان هتقدر تجمع أكل زي سمك وفراخ ولحمة و تديهم للدوق يطبخلك طبخة حلوة ولما تاكلها هتزود من حياتك.

زي ما واضح من إسم اللعبة فأنت هتكون في قرية، القرية ديه هي الرابط الأساسي بين كل بيئات اللعبة الي هتزورها والي هي بيئات مختلفة زي القلعة والمستنقع والمصنع وحاجات تانية كتير، هترجع للقرية كذا مرة عشان تستكشفها بشكل أكبر وتفتح مناطق أكتر فيها وده هيساعدك في الحصول على موارد أكتر. هنا بقى بيظهر التنويع الي بتقدمه Resident Evil Village لأن مش اللعبة كلها في منطقة واحدة زي الأجزاء الي فاتت، لا، ده انت هتشوف كمية ضخمة من البيئات والأعداء المميزين !

واحد من العيوب الكبيرة الي واجهت Resident Evil 7 Biohazard كانت قلة التنويع في الأعداء و RE Village فعلاً حسنت من الموضوع ده بشكل ضخم، أولاً انت عندك كمية ضخمة  من مواجهات الزعماء سواء كانوا زعماء رئيسين في القصة أو مجرد Mini Bosses، كمان كل بيئة وكل مكان هتزوره بيقدملك أعداء مختلفين وجدد ودايماً بيكونوا أصعب من التجارب السابقة وبيكون ليهم Hit Points مخصصة عشان تقضي عليهم بشكل أسرع. وهنا بتظهر  أهمية الدوق وأهمية الترقية الي هتعملها لأسلحتك والموارد بتاعتك.

Resident Evil Village قدرت تعمل دمج حلو جداً بين الرعب والبقاء وكمان الأكشن وحتى الرعب النفسي، الإختلافات ديه والتنوع ده في أسلوب اللعب دايماً هيخلي اللعبة fresh بالنسبالك ومش هتزهق منها إطلاقاً. اخر ساعة في اللعبة بتاخد طابع أكشن بشكل كامل، الموضوع ده ممكن يضايق بعض اللاعبين ولكنه بالنسبالي كان تجربة حلوة واتقدم بشكل حلو يليق مع قصة وعالم Village. اللعبة كمان ضافت شوية ميكانيكس جديدة زي دفع الأعداء لما تعمل صدة صح لضرباتهم وكمان بتقدر دلوقتي انك توطي وده بيساعدك أكتر في التخفي والتسلل أثناء التنقل في البيئات خاصةً لما يكون في وحوش كبيرة وأنت معكش ذخيرة أو موارد كافية عشان تقدر تواجههم.

زي ما ذكرت في كلامي عن القصة فاللعبة بتقدم محتوى جانبي مكانش متواجد في الأجزاء السابقة من السلسلة، تركيزك على القصة هو الهدف الرئيسي طبعاً بس عالم Resident Evil Village ضخم ولو قررت تخلص كل حاجة فيه هتاخد وقت طويل، الخريطة الي بتتقدملك مصممة بشكل ممتاز هيخليك حابب تستكشف كل مكان جانبي عشان تلاقي أسلحة أو موارد جديدة وكنوز مختلفة. طبعاً انت ممكن تنهي القصة بدون ما تتطرق لأي حاجة جانبية في عالم اللعبة، ولكن أنت دافع فلوس في اللعبة فا استفيد بالفلوس الي أنت دافعها واعرف اكتر عن بيئة Village عن طريق إنهاء مختلف المهام والأنشطة الجانبية وكمان متنساش انك تقرأ كل الـ Notes الموجودة قدامك لأن اللعبة بتشرح تفاصيل أكثر فيهم وكمان بتربط بشكل ممتاز بينها وبين الأجزاء السابقة.

بعد ما تخلص قصة Resident Evil Village هيتفتحلك مود إسمه The Mercenaries، المود ده هو تجربة جانبية وهو عبارة عن مجموعة أقسام من عالم اللعبة بتخش فيها  وبتقتل  الزومبيز قبل ما الوقت الي قدامك على الشاشة يخلص، لما بتعمل كدة بتاخد Score بتقدر تستفيد بيه بإنك تشتري أسلحة وموارد من الدوق قبل ما تخش على القسم الي بعده وهكذا، تجربة لذيذة وكدة كدة متوفرة قدامك بشكل مجاني بعد ما تخلص القصة.

بمناسبة الكلام على الحاجات المجانية فلعبة Resident Evil Village كان المفروض ينزل معاها مود إسمه Resident Evil Re:Verse وده عبارة عن لعبة أونلاين Free For All بتخش فيها وتختار واحدة من الشخصيات الي بنحبها في عالم Resident Evil زي Claire أو Leon أو Jill أو Chris وغيرهم كتير من الشخصيات التانية. هدفك انك تخش وتعمل Score عالي بإنك تقتل باقي اللاعبين. للأسف المود ده متوفرش مع إصدار اللعبة واتأجل لصيف 2021 بس طالما انت معاك Resident Evil Village فأول ما المود ينزل هتقدر تستمتع بيه بشكل مجاني بالكامل.

Resident Evil Village قدرت تستخدم محرك RE Engine بأفضل شكل ممكن، المحرك قدم تفاصيل وتجارب مميزة في ألعاب مختلفة زي Resident Evil 7  وريميك الجزء التاني والتالت بالإضافة لـ Devil May Cry 5 ولكن الإبداع الرسومي بيظهر بأفضل شكل ممكن في Resident Evil Village خاصةً من ناحية تنوع البيئات سواء في القرية أو القلعة أو مجموعة من الأماكن التانية الي هتزورها والي مش هحرقها عليك عشان تتفاجئ انت بنفسك أثناء تجربتك للعبة.

كمان ديه أفضل تفاصيل للشخصيات والأعداء اتقدمت في لعبة Resident Evil لحد دلوقتي، كل شخصية وكل Asset موجود في عالم البيئة مُصمم بدقة مرتفعة والي أحياناً بتقرب جداً من الواقعية، تخيلوا إن Capcom وصلوا للمستوى الرسومي ده واحنا لسة بنبدأ الجيل الجديد واللعبة أصلاً Cross-gen ، ما بالكم لما يركزوا على الجيل الجديد فقط.

Resident Evil Village هي أول جزء في السلسلة يستخدم تقنية تتبع الأشعة على الحاسب الشخصي وأجهزة الجيل الجديد من الكونسول، فعلياً مفيش فرق ضخم واضح لما تفعل أو تقفل تتبع الأشعة ولكن لو دققت وركزت هتلاقي في تفاصيل كتير في الإضاءة والإنعكاسات متقدمة بشكل خرافي، وشخصياً انا متحمس أشوف Capcom هيقدموا تتبع الأشعة ازاي في الأجزاء الي جاية لما يشتغلوا عليه بشكل أفضل.

كل منطقة هتزورها في عالم Resident Evil Village هتسمعك موسيقى تصويرية لايقة  مع الجو المحيط بيك، قوة الموسيقى بتظهر بأفضل شكل أثناء تجربة الرعب النفسي الي هتحصلك في نص اللعبة وكمان في اخر ساعة والي بتقلب لموسيقى أكشن وحماسية بس في نفس الوقت داخل فيها الطابع المرعب بأسلوب حلو جداً.

الأداء التمثيلي لـ Ethan Winters مكانش أفضل حاجة، احياناً بتحس ان تعليقاته على الأحداث سخيفة ومش منطقية بس معظم الوقت كان بيقدم أداء فيه مشاعر ظاهرة ليك كلاعب وبتحس بالي هو بيحس بيه، الأداء التمثيلي القوي في Resident Evil Village هيكون من نصيب الأعداء خاصةً Lady Dimitrescu وبناتها بالإضافة طبعاً للشخصية المُفضلة بالنسبالي Heisenberg.

Capcom قدروا يستخدموا الأصوات في إنهم يدمجوك في عالم RE Village، في جزء كبير من اللعبة انت هتقضيه في أماكن مفتوحة خاصةً أول ساعة الي هتكون  في القرية وهنا Capcom هتخليك قلقان طول الوقت بسبب المؤثرات الصوتية واحساسك الدائم إن في حاجة بتراقبك سواء من جوا البيوت أو مستخبية في الزرع المحيط بيك وفي نفس الوقت انت معكش أسلحة أو ذخيرة كتيرة تدافع بيها عن نفسك.

تجربتي للعبة كانت على منصة Xbox Series S، اللعبة شغالة بدقة 1440p وبفريمات متراوحة بين 30 و45 فريم وديه التضحية الي هتعملها لو قررت تشغل اللعبة بتقنية تتبع الأشعة، ولكن لو أنت مش مهتم بالكلام ده فأنصحك تقفل تتبع الأشعة عشان تاخد 60 فريم ثابتين. التجربة الأفضل لـ Resident Evil Village هتكون على Xbox Series X أو PlayStation 5 ودول عندهم القدرة يشغلوا اللعبة على 4K وفريمات قريبة من 60 حتى لو أنت مشغل تقنية تتبع الأشعة، طبعاً لو حابب توصل لفريمات أكتر من كدة وشاشتك بتدعم 144 هرتز فننصحك تجرب اللعبة على كمبيوتر قوي.

اللعبة مُترجمة بالكامل ( نصوص وقوائم ) للغة العربية الفصحى، وبكدة هتقدر تستمتع بالتجربة حتى لو أنت مش متمكن أوي في الانجليزي.

الخلاصة :

لعبة Resident Evil Village هي تكملة ممتازة لأحداث قصة الجزء السابع وبتجاوب عن أسئلة كتير احنا كنا محتاجين نعرف إجاباتها، ولكنها في نفس الوقت بتفتح الطريق لأجزاء جديدة في السلسلة. ده بالإضافة لإنها قدرت تقدم ربط ممتاز بين كل الأحداث الي مرت علينا خلال أخر 25 سنة في عالم Resident Evil. الجزء الثامن هو ميكس عظيم بين أفكار الجزئين الرابع والسابع و Capcom قدرت تخرج الميكس ده لينا بأفضل شكل ممكن. من وجهة نظرنا اللعبة تستحق التجربة فوراً وتستحق يتدفع فيها سعرها الكامل.

التقييم النهائي : 9/10

لو حابب تشتري اللعبة على Xbox إضغط هنا

لو حابب تشتريها على PlayStation إضغط هنا

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.