لما أعلنوا عن لعبة Exoprimal من فترة مكنتش متحمس ليها إطلاقًا لأكتر من سبب. أول سبب هو ان اللعبة فيها ديناصورات و مفيش في دماغي ولا لعبة قدمت الكائنات ديه في العالم بتاعها و نجحت بشكل كبير. و السبب التاني انها لعبة أونلاين و فيها قصة. كنت متوقع جدًا ان يا إما القصة هتتوه في النص و هبدأ اطنشها و اركز علي أسلوب اللعب. أو القصة نفسها متبقاش قوية كفاية انها تشدني من الأساس.
لعبة Exoprimal من تطوير Capcom. و ديه تقريبًا رابع ألعاب كابكوم السنادي بعد ريميك Resident Evil 4 و ستريت فايتر و الكولكشن بتاع لعبة Mega Man. سنة ناجحة بامتياز لكابكوم بعد الريميك العظيم اللي قدمته في أول السنة و النجاح الكبير لستريت فايتر. فتعالو نشوف لعبة كابكوم الخدمية الجديدة هتقدملنا ايه.
قصة اللعبة
أول ما تسمع ان اللعبة فيها ديناصورات هتفتكر للحظة ان اللعبة احداثها بتحصل في الماضي. لكن بالعكس, اللعبة أحداثها بتدور في سنة 2043. و في عصر بيمر فيه البشر بتطور رهيب علي مستوي التكنولوجيا و بالذات الذكاء الاصطناعي اللي بقي عنصر أساسي في حياة البشر.
و في السنة ديه بيتفاجئ البشر بانتشار الديناصورات في العالم و ظهورهم بدأ في جزيرة بيكيتوا المعزولة. الجزيرة ديه كانت بتملكها شركة Aibius. و اللي كانت بتقوم بتجاربها كلها على الجزيرة و كانت بتستعين بالذكاء الاصطناعي “لفايثان” عشان يساعدهم في التجارب ديه. لكن فجأة بتتفتح بوابات زمنية في سماء الجزيرة و بيخرج منها عدد مهول من الديناصورات اللي بتجتاح العالم و الجزيرة ديه.
لحسن الحظ شركة Aibius كانت بتطور بدلات قتالية و هي الـ Exosiuts, و اللي كانت بتدي المقاتلين اللي بيتحكمو فيها قدرات مختلفة و أسلحة مدمرة ده غير انها بتوفرلهم حماية برضو.
بتبدأ قصة اللعبة مع الشخصيات الاربعة الرئيسية اللي بيشتغلو في الشركة ديه. و اللي بيروحو في مهمة اعتيادية عشان يجيبو جهاز معين من الجزيرة هيساعدهم يعرفو أيه اللي حصل في المكان ده. لكن لسوء حظهم المركبة بتاعتهم بتتحطم علي الجزيرة و بيتحبسو فيها.
و من خلال بعض الاحداث اللاعب بيعرف ان الذكاء الاصطناعي “لفايثان” هو المسئول عن الكارثة ديه. لا ده كمان هتكتشف انه لسة بيقوم بتجارب علي الجزيرة عن طريق انه بياخد المقاتلين اللي عندههم بدلات الـ Exosiuts و بيسفرهم عبر الزمن لسنة 2040 و ديه سنة بداية الكارثة, عشان يخليهم يحاربو الديناصورات و يعيدو نفس الاحداث عدد لانهائي من المرات, و اللي بيعيش بيعيد التجربة تاني و اللي بيموت اثناء التجربة نقوله RIP.
زي ما قولتلك في المقدمة انا كنت متخوف جدًا من فكرة قصة في لعبة خدمية زي Exoprimal. لكن اللعبة فاجئتني بقصة مليانة ألغاز و أسئلة. مع كل Match بتلعبة بتتقدم جزء في القصة, و ده لأنك ببساطة بتعيد نفس السيناريو اللي بيدخلك فيه الذكاء الاصطناعي و اللي من خلالة بتتسربلك بعض الملفات اللي بتكشفلك شوية من الحقايق.
الملفات اللي بتتفتحلك مع كل Match بتلعبه بتبقي عبارة عن محادثات بين شخصيات اللعبة الرئيسية و هم بيتناقشو في الملفات ديه. و اللي ممكن تبقي عبارة عن صور أو بيانات أو حتى محادثات صوتية للمهندسين اللي كانو شغالين على مشروع الذكاء الاصطناعي اللي اتسبب في الكارثة.
الملفات ديه بتبقي متقسمة في شكل خريطة دائرية. و لما بتخلص سكشن معين بيتفتحلك Cutscene و اللي غالبًا بيحتوي علي معلومة مهمة جدًا للقصة او حدث كبير بيغير في مكان أحداث القصة أو في الشخصيات.
بصراحة اللعبة قدمت قصة ممتازة و كل ما بتتقدم بتزيد الأسئلة و مع كل إجابة علي أسئلتك بتزيد رغبتك في الوصول للنهاية عشان تعرف مين الشرير الحقيق اللي ورا الكارثة ديه. كمان القصة مندمجة مع الـ Gameplay بسبب فكرة انك بتعيد نفس السيناريو زي فيلم day after tomorrow بتاع توم كروز كدة.
أسلوب اللعب
لازم تبقي عارف ان انت في الأول في الأخر قدام لعبة خدمية بتخطط انها تعيش لوقت طويل و تكون جمهورها زي ما عملت لعبة Street Fighter 6 كدة. عشان النقطة ديه هنرجعلها في النهاية بعد ما نتكلم شوية في أسلوب اللعب.
اللعبة بتقدملك طور لعب واحد فقط لا غير. لكن بشكلين مختلفين. الطور ببساطة هو منافسة بين فريقين علي مهمة محددة. و الفريق اللي بينجح في إنهاء المهمة ديه بشكل أسرع بيفوز. مهمتك هي انك تقضي على الديناصورات اللي بتخرجلك من البوابات و تنتقل من منطقة لمنطقة لحد ما توصل للمهمة النهائية.
كل فريق بيبقي مكون من 5 لاعبين. و كل لاعب بيبقي قدامه عدد كبير من Heroes اللي يقدر يختار منهم البطل اللي عايز يلعب بيه. و هنا نيجي لواحدة من إيجابيات اللعبة. لأن اختيارك للبدلة اللي أو Hero هتلعب بيه ليه تأثير كبير علي أسلوب اللعب و على سرعتك في انهاء المهمات و اللي ممكن تكسبك الدور بسهولة أو تتهزم هزيمة ساحقة.
الشخصيات متنوعة جدًا, عندك شخصيات Support و شخصيات دفاعية و شخصيات تانية هجومية. و في كل تصنيف في أكتر من شخصية زي ان الشخصيات الهجومية هتلاقي منهم اللي بيستخدم السيف و بيضرب من قريب و في اللي بيستخدم الأسلحة الآلية أو اللي بتضرب من بعيد عمومًا.
اختيار الفريق للتوليفة الصح في الشخصيات اللي هيلعبو بيها مهم جدًا. يعني لو كنت فاكر ان وجود الـ Support ملوش قيمة فانت هتعرف قيمته في المهمة النهائية. رغم انك لو مت هترجع تاني عادي لكن هترجع بعد 15 ثانية و دول كافيين للفريق التاني انه يسبقك بفرق كبير.
بما اننا بنتكلم عن الشخصيات و أهميتها. فلازم نتكلم عن التحكم فيهم و مكيانيكيات اللعب اللي وفرتها Exoprimal. كابكوم أبدعت في أسلوب اللعب السلس و السريع اللي بتقدمه. رغم ان اللعبة بتخلط بين التصويب في معظم أوقاتها و بين الاعتماد علي القدرات أو الضرب من مسافات قريبة, لكنها نجحت في ان كل الأساليب ديه تبقي مُرحبة جدًا باللاعب و خلتني محتار دايمًا في اختيار دوري في الفريق و الشخصية اللي هلعب بيها.
المهمة النهائية
بعد عشر دقايق كل اللي بتعمله هو انك بتحارب الديناصورات, بنوصل للمهمة النهائية اللي بتواجه فيها الفريق المنافس. اللعبة بتعدم نوعين مختلفين من المهمات النهائية. اللعب التعاوني أو اللعب التنافسي. اللعب التعاوني مش محتاج نتكلم فيه كتير لأنه ببساطة سباق بين الفريقين.
اللعب التنافسي بيكون سباق على مين اللي يخلص المهمات بشكل أسرع. و كل ما بتنتقل لمنطقة جديدة اللعبة بتوريك الفريق التاني وصل لفين و بتقولك هل انت متأخر ولا سابق.
المهمة النهائية مفي غير مهمتين بيتغيرو بشكل عشوائي مع تغيير خريطة اللعب العشوائية برضو. يا إما بتبقي مهمة انك تدافع عن مكعب البيانات لحد ما يوصل للمكان بتاعه. أو انك تسيطر علي 3 نقاط في الخريطة و اللي في شبه شوية من مود capture اللي موجود في ألعاب باتلفيلد و كود.
الميزة في المهمة النهائية في الطور التنافسي هي انها بتحول اللعبة من PVE للعبة PVPVE. القتالات بين اللاعبين حماسية جدًا مع أسلوب اللعب السلس و قدرات اللعب المختلفة حرفيًا كانت قمة المتعة انك تهزم تخش علي الفريق اللي قصادك و تموتهم كلهم.
بس للأسف اللعبة بتفتقد لحاجة مهمة جدًا لأي لعبة تنافسية و هي المكافئة. المفروض ان اللاعبين بيتم ترتيبهم علي حسب ادائهم في اللعبة. لكن النظام غريب و مش متوازن, ففي شخصيات عندها بعض القدرات اللي بتضمنلها نقاط طول الوقت و سهل جدًا تبقي أفضل لاعب في الـ Match. ده غير ان مفيش Kill count مثلًا عشان اللاعب يعرف هو قتل كام لاعب.
التقدم في اللعبة
زي ما قولتلك في النقطة الأولي اننا قدام لعبة خدمية. و في أي لعبة خدمية لازم يكون في محتوى طول الوقت بيتقدم للاعب سواء من خلال أطوار لعب مختلفة أو محتوى بينزل بشكل مستمر مع الوقت.
كل ما بتلعب أكتر بترفع من مستوي الشخصية اللي بتلعب بيها. و بصراحة هنا اللعبة بتوجه اللاعبين انهم يختارو شخصيتين يلعبو بيهم بشكل مستمر و ميغيروش كتير. مع كل مستوى بتتقدمه في الشخصية بتفتح تعزيزات جديدة للشخصية زي انك تعمل ضرر اكبر على الديناصورات مثلًأ.
كل Match بتكسبه أو مستوي بتتقدمه اللعبة بتديك عدد محدد من العملة اللي جوا اللعبة و اللي بتقدر تشتري بيها أشكال تغير بيها شكل الشخصيات. و كمان بتفتح بيها التعزيزات اللي كلمتك عنها.
للأسف اللعبة بتعاني بشدة من قلة المحتوى, و ديه أكبر سلبية في اللعبة. بعد ما تعدي 20 Match بتبدأ تحس بالتكرار و عدم التغيير. خصوصًا ان المهمة النهائية مش متنوعة بشكل كبير.
ده غير الفقر الرهيب في انواع الديناصورات اللي بتحاربها. كلنا عارفين ان الديناصورات اكتر كائنات متنوعة و في منها أشكال كتير جدًا, لكن اللعبة مقدمتش نهم غير الـ Raptors أغلب الوقت و Boss اللي بيبقي في تالت مهمة كل Match و اللي مبياخدش منك دقيقتين و غالبًا بيبقي نفس البوص و مبيشكلش أي تهديد للاعب.
في الوقت اللي بتتنشر فيه المراجعة ديه هو الوقت اللي كابكوم وعدتنا انه هينزل فيه محتوى اضافي للعبة بيزود أطوار لعب جديدة و بيزود كمان شخصيات جديدة و هيكون في تعاون مع ألعاب تانية من كابكوم زي Street Fighter. لمكن توقعي ان التعاون ده هيبقي في شكل Skins مدفوعة ملهاش أي تأثيرعلي أسلوب اللعب. و اتمني الأطوار الجديدة اللي هتتضاف تبقي فيها تنوع كفاية و محتوى جديد.
اللعبة سعرها تقريبًا 50 دولار على معظم المنصات. و اللي هو سعر غالي جدًا بالنسبة للعبة محتواها قليل بالشكل ده. بس لحسن الحظ اللعبة متاحة على الـ Gamepass يعني تقدر تلعبها بسعر أقل من ده بكتير خصوصًا بعد ما الـ Gamepass بقي مدعوم في معظم البلاد العربية.
اللعبة فيها تعريب شبه كامل للقوائم و المحادثات لكن مش كلها الحقيقة. يعني الذكاء الاصطناعي “لفايثان” اللي بيقولك التعليمات هيتكلم بالعربي زي جوجل بالظبط. و طبعًا المحادثات بين الشخصيات مترجمة لكن للأسف مش مدبلجة. بشكل عام تجربة لطيفة و سهلت فهم القصة خصوصًا ان فيها بعض المصطلحات اللي محتاجة ترجمة فعلًا.
الرسوميات و الأداء التقني
كابكوم دايمًا متميزة في النقطة ديه. الـ Cutscenes كانت ممتازة و في بعض اللحظات تعابير وجوه الشخصيات أثرت فيا فعلًا بسبب جودتها العالية و التفاصيل. ده غير الأنميشن سواء الخاص بالديناصورات أو البدلات و الـ Exosiuts و اللي كانت ممتازة برضو.
جربت اللعبة على جهاز متوسط بإمكانيات أعلى من المتطلبات الـ Minimum و علي اعدادات High كانت اللعبة مستقرة جدًا و مواجهتنيش أي مشاكل ليها علاقة بالفريمات, رغم العدد المهول من الدينواصورات اللي موجود علي الشاشة دايمًأ.
الخلاصة
رأيي من الأخر ان Exoprimal عندها Potential انها تبقي لعبة خدمية ناجحة لو نزلت بمحتوى اكبر من كدة, لكن الظاهر ان كابكوم مخططة من البداية انها تنزل المحتوى بشكل متقطع و في رأيي ده هيضر اللعبة جدًا. كمان اللعبة سعرها غالي لكن ممكن الـ Gamepass يساعد شوية في انتشارها رغم السعر ده. قلة المحتوى مينفيش انها لعبة ممتعة و تجربة مضايقتنيش إطلاقًا, لكنها معاشتش معايا كتير.
