مراجعة وتقييم لعبة
DAVE THE DIVER
بقالي 20 سنة جيمر وتقريبًا سنة 2023 من أعظم السنين اللي مرت عليا من حيث كمية الألعاب الجامدة اللي فيها، في سنين كده بتبقى عارف إنها مش هتتكرر في التاريخ وسنة 2023 تعتبر منهم بشكل واضح وصريح بس أنا انهاردة مش جايبلك لعبة معروفة وجايين نتكلم عنها ونقول حلوة ولا وحشة، لا أنا جايبلك عمرك ما كنت هتتخيل إنها حلوة أوي كده، اللعبة دي اسمها Dave the diver ومكسرة الدنيا على ستيم ومحققة مبيعات واصلة لمليون نسخة ومفيش حد بيلعبها غير لما يرشحها لأصحابه، فيا ترى ليه الضجة دي كلها عاللعبة دي؟ وهل تستاهل فلوس المواطن الغلبان اللي زي حالاتنا ولا بلاش منها؟
لعبة dave the diver تتصنف إنها لعبة RPG، واتجاهها الفني جميل جدًا ومُبسط بيستخدم البيكسل أرت ومنظور ال2d في معظم أوقات اللعبة مع بعض اللحظات اللي بتتحول اللعبة فيها للعبة 3D. وزي ما الاسم بيوحي لك إنك هتلعب بشخصية ديف الغطاس واللي بيتجيله مكالمة من صديق له بيطلبه في شغل جديد، ديف هيشتغل في محل سوشي ودوره إنه يغطس ويصطاد أنواع السمك اللي هتطبخ في المطعم، والطباخ هيكون شخص اسمه بونشو.
لحد هنا الدنيا تمام، مطلوب منك تغطس وتصطاد بس صح؟ الحقيقة لأ، اللعبة بتتيحلك كمان جانب إداري كامل للمطعم بصفتك أحد الشركاء فيه، وده بيخليك تقدر تساهم في طبخ وتقديم الوجبات وتطوير الموقع عشان تحافظ على الريفيوز بتاعته إنها تكون إيجابية. وده بيجي عن طريق تقديم الأطباق الصح للزباين بسرعة وتكون الأطباق بجودة كويسة.
في ساعات هيجيلك زباين مميزين طالبين أطباق غريبة ومكوناتها مش جاهزة هتنزل تصطاد السمك المطلوب وترجع تحضره، ومن خلال الصيد الكتير بتاخد نقط تقدر تصرفها على ابجريد للأطباق بحيث تديك عائد مالي ونقاط أكتر مع تقديمها. في آخر كل يوم هيكون في تقييم لليوم من 5، وكمان الطبيعي إن الصيد بيكون الصبح والمطعم بيفتح بليل، بس ساعات هتنزل تصطاد بليل ودي بتكون تجربة مميزة جدًا لإن البحر بليل مرعب وفي كائنات معينة مش بتظهر غير بليل، وده طبعًا بيخليك تخسر نسبة من أرباح المحل اللي كان ممكن تحققها لو أنت شغال فيه بليل، بس في نفس الوقت الأصناف اللي ممكن تعملها بالأسماك اللي هتلاقيها بليل هتكون أغلى وتستاهل الريسك…بس خلي بالك، ماينفعش تصطاد غير السمك اللي هيتطبخ اليوم اللي هتصطاد فيه بس…يعني ماينفعش تخزن السمك ويكون بايت عشان كده الإفراط في الصيد حاجة مش كويسة.
طيب عملية الصيد نفسها بتتم إزاي؟ عملية الصيد جميلة وسهلة، شكل البحر لوحده هيحسسك إنك عايز تستكشفه كتير جدًا. بيكون معاك أنبوبة اكسجين وبدلة غطس وقناع تنفس قابلين للتطوير ومع التطوير بتقدر تقعد مدة أكبر تحت الماية وبالتالي تقدر تنزل أعماق أكتر، ومش محتاج أقولك طبعًا إن في الأعماق في مخلوقات أشرس، بس جودتهم أفضل كمأكولات ووصفات تقدر تعملها، وعشان كده بيكون همك الأساسي إنك تطور من بدلة غطسك ومساحة أنبوبة الأكسجين الخاصة بيك، وكمان أسلحتك اللي تقدر تصطاد بيها كائنات شرسة زي الحيتان والقروش وغيرهم من الأسماك المفترسة أو صعبة الاصطياد.
هل ده كل شيء؟ لأ طبعًا اللعبة فيها حاجات كتير جدًا على هيئة ميني جيمز زي ميني جيم لصب المشاريب، ورش الوسابي على الأكل، وتقطيع الأسماك، وفي كمان ميني جيم عبارة عن سباق لأحصنة البحر…اللعبة دي أكتر لعبة لعبتها في حياتي فيها اهتمام بالتفاصيل وميني جيمز بشكل مش طبيعي، كل حاجة فيها ميني جيم وكل شخصية من الشخصيات اللي بتساعدك ليهم حاجة تتعمل في اللعبة. في اللعبة هيكون معاك موبايل وتقدر من خلاله تفتح آلة حاسبة….لا ماعرفش دي مهمة في إيه أنا بس فرحت إن في اهتمام بالتفاصيل للدرجة دي…
الموبايل تقدر كمان من خلاله تصور المخلوقات البحرية النادرة وتاخد بوينتس وتشتغل مصور بحري، وتقدر كمان توثق اكتشافاتك للمخلوقات النادرة وتاخد كارت لكل مخلوق اكتشفته، وتقدر كمان تفتح السوشيال ميديا، واللي هتلاقي عليها الطباخ بونشو وشريكك كوبرا منزلين صورهم في المطعم، وهتحس إنهم أصحابك بجد.
اللعبة في نصها كده دخلتني في سكة غريبة كده عن حضارة مختفية تحت الأرض وأسماك نادرة محتاج تكسب ثقة أهل الحضارة دول عشان يساعدوك تلاقي السمك ده، وبتبدأ تعمل مهمات لصالحهم…اللعبة دي كل شوية هتكتشف فيها حاجات غريبة حقيقي، ودي أحلى حاجة فيها.
جرافيكس وصوتيات وأداء تقني ممتازين، أسلوب لعب إدماني بشكل كبير…وكل ده لعبة ب 20$، هتقعد معاك 25 ساعة وممكن أكتر كمان تعتبر صفقة ممتازة في حساباتي أنا شخصيًا، بس طبعًا المهم رأيك أنت
التقييم النهائي
10/10
ملاقيتش في اللعبة أي جانب ممل أو عيب جوهري واستمتعت بكل دقيقة لعبتها فيها.
