Reviews

مراجعة FIFA 22

بعد 3 سنين عجاف أخيرا بتطلع فيفا 22 للنور واللى بتقدم تطور واضح كنا مفتقدينه  السنين اللى فاتت الا انه تطور غير مرضى للجميع خاصة من الناحية الشكلية على الجيل الجديد والتقنية على الجيل القديم زى ماحنا عارفين ان نسخة الجيل الجديد على PS5, Xbox SS&SX و Google stadia بتقدم خاصية هايبر موشن وأداء تقنى أعلى من الجيل القديم

إلا انها شكلها احلى على الجيل القديم ودا بيحط علامات استفهام كتير !؟؟  بدون مانزود في الكلام خلونا نخش فالتفاصيل…

فى البداية مفيش مرة بنقول فيها فيفا غير ونجيب سيرة PES اللى اتغير اسمها السنادى وبقت مجانية مع ذلك لسة فيفا محتفظة بشريحة عريضة من الفانز المخلصين للسلسلة واللى منقسمين الى نوعين حاليا

الأول شايف تغير كويس فالجيم بلاى وحركة اللعيبة وبطئ وواقعية وعودة أهمية الباصات والتكتيك بدل الدرجن درجن والskill moves spamming اللى كان بيحصل الجزء اللى فات بما ان السكيلز خدت نيرف محترم

والتانى شايف انها نفس الفيفا بالسكريبتات والجليتشات مع ابديت للحراس – أنت مين فيهم ؟ – لو  لسة ماشترتش اللعبة تعالى اكلمك عن اللى هتلاقيه فيها

خاصية الهايبر موشن اللى تم تسويق اللعبة بيها السنادى تعتبر أهم ميزة جنب اسم اللعبة وهى عبارة عن تكنولجيا خاصة بحركة اللاعب والفريق ككل بتضيف واقعية أكبر وبتغير فشكل الجيم بلاى وبتحكمه بشكل مختلف عما كنا متعودين عليه بسبب اعتمادها على قدرة الجيل الجديد في تحسين الذكاء الصناعى لمحاكاة الماتشات الحقيقية

كل الكلام التخين اللى قرأته دا بيختصر فكلمة واحدة: اللعبة بقت اصعب سواء على المحترفين او الهواة

ودا بسبب بطئ اللعبة والاعتماد على الباصات وتمشية الكورة بالعرض وبناء الهجمة ففترة أطول عشان تقدر تخترق دفاع الخصم ومش بس كدة هتلاقى الحارس رعد واقف فالجون بيصد كلللل الكور كللللها حرفيا، الشوط من بعيد واحد من الحلول الموجودة لو معاك لاعب تقيل والرفعات والاختراق والباص بالعرض ،مع الحلول دى هتقدر توصل لكن تنفيذها في الملعب صعب جدا خصوصا مع قوة الدفاع وبطئ رتم اللعبة

فالحقيقة مع قوة الحراس دى فيه ناس كتير لسة مش عارفة ازاى تتعامل معاها بس الأكيد ان كله مبسوط منها لان مهما حصل مش هنشوف نتايج السنين اللى فاتت ماتشات بتخلص بالنص دستة والدستة كمان فانت لو بتلعب التيمت تيم استثمر فحارس كويس ومش هتندم

من ناحية التكتيكس والخواص بتاعتها والتوجيهات فتم إضافة تعديل جديد على التكتيكس بيزود فرص سيطرتك على فريقك أثناء الهجوم والدفاع زى ماحنا عارفين من السنة اللى فاتت انما ماتمش إضافة خواص جديدة أو تعديلات جديدة فالجانب دا

إضافات اللعبة الجديدة  وخلونا نتفق على نقطة أن فيفا هي الفيفا بتاعة كل سنة مفيش Modes جديدة او حاجة ثورية نتكلم فيها من الالف للياء زى مثلا إضافة الشامبيونز ليج ف 2019 فاحنا هنتكلم فالتطورات اللى حصلت

واللى بتبدأ معانا فالمود الأهم لاى مجموعة صحاب وهو الPRO Clubs

المود دا حصل فيه مجموعة تجديدات من حيث البروجرشن، وال لفل اب بقى معتمد على مستواك ومستوى فرقتك في الماتشات والريت اللى بتطلع بيه كل ماتش بيتحدد على أساسه xp وبعدها بتلفل اب ، غير إضافة ال Perks أو الخصائص بتختار منها 3 من وسط اختيارات كتير لكل بروفايل من عندك كل واحدة بتساعد في الدفاع او الهجوم ؛ بقيت تقدر تعمل invite لاصحابك وتدخلوا ماتش دروب ان بعد ماكانت معاناة فى السيرش بقيت بتدخل لوبى انت و 4 اصحابك الأول وبعدين تدورا على ماتش وفكرة الخناقة على المراكز اللعبة لغتها وبقت بتختار ليك اوتوماتك

بعض الشكليات والcustomization للفريق من حيث التيشرتات وشكل الملاعب والكورة وغيره

وصولا لأخر إضافة مالهاش لازمة وهى وجود شخصية بنت في البرو كلبس وتلعب مع الرجالة مخلى الواحد مقفول وباعده عن جو الماتشات الحقيقى

الكارير مود

والناس اللى بتحبه أخيرا بقيت تقدر تصمم النادى الخاص بتاعك من  الصفر وتختار اسمه وطبيعة كل حاجة فيه من حيث تشكيل اللاعبين وسنهم وقوتهم كمان بتختار النادى يكون كام نجمة وتوقعات الإدارة منك والفلوس اللى تبدأ بيها فخزنة النادى ، بعد كدة تختار الدورى المفضل ليك وتستبدل فريق منه عشان تاخد مكانه ، بعد كدة بتختار من التعديلات الشكلية الموجودة شعار وطقم الفريق والملعب اللى تحبه وتقدر تغيرهم بعد كل موسم غير كدة فيديوهات التقديم والعروض والصفقات موجودة بنفس الوتيرة والشكل

معظم اللى فات دا ممكن مايفرقش مع متابعين فيفا أو الشريحة الأكبر من مشتريها ولكن اللى هيفرق فعلا هو التغيرات اللى حصلت على

الالتيميت تيم – FUT

بداية الشكليات زى القوايم اللى نظامها اتغير للاحسن عن الشكل العقيم ففيفا 21 اللى كانت كل الاختيارات سايحة فبعضها والتنقل فيها صعب

حاليا اول ماتدخل الفوت هتلاقيه متقسم 3 قوائم رئيسية منظمة وسهلة وسريعة وحط تحتها 100 خط

قائمة Home وتحتها الترانسفير ماركت وتحديات بناء التشكيلة

قائمة Play وتحتها طبعا المودز اللى تقدر تلعبها سكواد باتلز ورايفلز وفوت ودرافت وفريندلى

وقائمة الClub اللى تحتها تعديل الخطة والملعب بتاعك واللى بيظهر فيها كمان عدد الماتشات اللى كسبتها وخسرتها بعد ما اتحذفت من جنب اسم النادى والكوينز كأنه بيذلك بيها كدة

وندخل على التغييرات فسيستم الالتيمت نفسه وماتشات الفوت شامبيون والرايفلز بقت ماشية ازاى

بداية ماتشات الرايفلز كلها تعريق من أول ديفجن 10 ودا بسبب الغاء ال5 ماتشات بتوع الplacement فانت هتبدأ من ديفجن 10 زى زمان بس هتحتاج فوزين بس عشان تطلع ديفجن 9 مش زى قبل فيفا 18 تلعب 10 ماتشات فالديفجن والتعريق فالرايفلز مش بسبب الغلاء البلاسمنت بس اكيد بسبب صعوبة اللعبة وأن الاهتمام اتنقل من ماتشات الفوت شامبيون للرايفلز

السنة اللى فاتت كنت بتلعب ماتشات الفوت شامبيون فكان يحسبلك بيها نقط فالرايفلز وخلص الموضوع لكن السنادى بقى فيه نظام جديد للعب ونظام للجوايز منها جوايز آخر السيزون يعنى كل فترة طويلة، والجوايز الأسبوعية كل خميس كالمعتاد بس عدد ماتشات مفتوح مش محدد زى السنة اللى فاتت

الفوت شامبيون بقى 20 ماتش بدل 30 وعشان تلعبه محتاج تجمع 1500 نقطة من الرايفلز وبعدها ليك 7 محاولات تلعب تصفيات عشان تلعب ال20 ماتش فوت شامبيون وكل أسبوع هتضطر تلعب تصفيات عشان تقدر تلعب فوت شامبيون زى ماتم تغيير النظام الرانكات من عدد فوز لعدد النقط بحيث الفوز بقى ب4 نقط والخسارة بتاخد عليها نقطة انك لعبت الماتش

بقيت مودز اللعبة زى Volta اللى عملو فيه فولتا اركيد والسيزون وغيرهم زى ماهى مفيهاش تطور نتكلم فيه

دا كان الجديد والجانب المشرق للعبة بس على الجانب الاخر فيه بعض المشكلات اللى ماينفعش تتساب من غير كلام ، أولهم مشكلة الكونكشن مازالت موجودة كلاعب عربى في شمال افريقيا بعيد عن كل سيرفرات العالم وبالتالي بواجه بطئ وتقل غير طبيعى داخل اللعبة دا غير أن كل مود فاللعبة ليه ريتم وسرعة لواحده يعنى عندى الالتيميت تيم أبطئ من البروكلبس ، دا  مش حالة شخصية بس لاعبى فيفا فالمنطقة محتاجين اهتمام فالنقطة دى

دا ممكن مايبقاش ازمة اوى لو انت لاعب كاجوال بتلعب فور فن ساعتين تلاتة كل أسبوع تفك عن نفسك إنما مختلفة لو انت بتقضى فاليوم الواحد اكتر من 3 ساعات

وضع اللعبة كجيم بلاى محرج جدا على الجيل القديم واللى يعتبر ابديت فيفا 21 مع باتش للحراس لأن اللعبة حرفيا مازالت شبه 21 زى ما فيفا 21 شبه 20 غير  أن مفيش تجديد على مستوى التكتيكس حتى زى 21 بالظبط

الغريب أكتر ان شكل الملعب احسن عالجيل القديم من الجيل الجديد اللى الملعب فيه شبه السجادة مع وجود بعض الجلتشات فمفيش الفرق في الجرافيكس الرهيب اللى مستنيين نشوفه عالجيل الجديد زى فرق فيفا 16 و17 مثلا هي مجرد انيميشنز جديدة

الخلاصة

فيفا 22 بتقدم تجربة جديدة فيها اختلافات مرحب بيها اكتر من سابقاتها بسبب تقنيات الجيل الجديد والقرارات باعادة هيكلة نظام الرايفلز والفوت شامبيون ولكن من وجهة نظرى غير كافى لمحبى السلسلة

التقييم النهائى :

جيل جديد 9/10

جيل قديم 7/10