مراجعات, Articles, Reviews, عن الألعاب, مقالات

مراجعة لعبة Like a Dragon: Ishin!

مراجعة لعبة Like a Dragon: Ishin!

مراجعة

Like a Dragon: Ishin!

لعبة Like A dragon Ishin هي ريميك للعبة صدرت في اليابان بس بنفس الأسم سنة 2014، كجزء فرعي من سلسلة Yakuza، بشخصيات نفس أشكال الشخصيات بتاعة السلسلة لكن في عالم موازي بأسماء تانية، والأسماء دي أسماء شخصيات حقيقية في واحدة من أهم حقب التاريخ الياباني والساموراي.

مراجعة لعبة Like a Dragon: Ishin!

في الحقبة التاريخية اللي بتدور فيها أحداث اللعبة في ستينيات القرن الـ19 والفترة دي كان فيها عركة كبيرة في اليابان بين النظام العسكري اللي حكم لمدة 300 سنة واللي بيسموه الshogun والنظام الإمبراطوري اللي بدأ وقتها بعد ما حصلت ثورة ولسا مستمر لحد دلوقتي.

مراجعة لعبة Like a Dragon: Ishin!

المشاكل السياسية دي حصلت لإن اليابان وقتها كانت مضت معاهدة مع الأمريكان أنصار الإمبراطور شافوا إنها مذلة وكانوا عايزين يغيروا الوضع إنهم يغيروا نظام الحكم في اليابان بالكامل، في وسط المعركة دي بقى أنت بتلعب بشخصية حقيقية وفي أحداث حقيقية بالبطل اللي اسمه Sakamoto Ryōma وده كان ظابط صغير في صفوف الجيش الياباني وقتها، وفي اللعبة هو بتحط قدام موقف صعب بيموت فيه أبوه في عملية اغتيال، وبيكون همه الأكبر يعرف مين قام بالعملية دي.

مراجعة لعبة Like a Dragon: Ishin!

المدينة اللي بتلعب فيها هي نسخة تخيلية من طوكيو الحالية، والبطل بيكون شاهد على الحقبة التاريخية بكل ما فيها من تحولات وتغيرات، وبيضطر ينضم لمجموعة زي الـفرقة الانتحارية للشوجن عشان يتجسس عليهم ويعرف مين اللي قتل أبوه.

مراجعة لعبة Like a Dragon: Ishin!

فرقة المحاربين اللي بينضملها دي بتكون عبارة عن مجموعة مجرمين وقتالين قتلة الحكومة مجمعهاهم عشان يعملوا المهمات الصعبة اللي ماتقدرش هي تعملها بصفة رسمية،وبالتالي البطل بيكون قدام خطر دائم وهو الإنكشاف ودايمًا بيكون مش عارف يثق في مين ويخون مين.

مراجعة لعبة Like a Dragon: Ishin!

شخصيات اللعبة الرئيسية والجانبية رائعة، لكن لأن اللعبة يابانية، فالأداء الصوتي ياباني ومؤخرًا سلسلة ياكوزا والسلاسل الفرعية زي Judgment مثلًا بيكون فيهم أداء صوتي إنجليزي، ولكن Like a dragon ishin مش كده فالأداء الصوتي الرئيسي هنا ياباني ولكن في ترجمة إنجليزي هتخليك تفهم الأحداث، ولو أنت من عشاق الإنمي مش هتمانع حاجة كده لكن وجب التنويه لإن في ناس ده لوحده هيفصلها أوي.

مراجعة لعبة Like a Dragon: Ishin!

بص بقى….القصة ميكس هزلية وجد بطريقة مايعرفش يعملها غير المطور بتاع سلسلة Yakuza، في لحظات درامية قوية جدًا والتمثيل مهتمين بيه أوي لكن في نفس الوقت في طبقة الكرينج الياباني المعتاد. أنا عن نفسي أتعودت عليه وحبيته وتقبلته لكن لو أنت بتلعب السلسلة لأول مرة هتحس إن إيه العبط ده وفين القصة الرئيسية يا جماعة خلونا نخلص.

مراجعة لعبة Like a Dragon: Ishin!

الحقيقة إن اللعبة هويتها مميزة جدًا لإن البيئة اللي بتلعب فيها والأحداث اللي بتحصل من حواليك مميزة وقوية لكن ممكن يعيبها إن اللعبة بتبدأ بطيئة شوية في القصة وكمان في الجيم بلاي، ومش بتفتحلك عالمها بشكل كامل أو حر إلا بعد أول 3-4 ساعات وده ممكن يكون منفر لناس كتير.

مراجعة لعبة Like a Dragon: Ishin!

لكن اللعبة لما بتفتح بقى، بتتحول لتحفة فنية في القصة والعالم والجيم بلاي.

الجيم بلاي متقسم هنا لـMini games ومعارك واستكشاف وحوارات. المعارك هي التركيز الأساسي وهنا فاللعبة تراجعت خطوة عن آخر أجزاء لعبة ياكوزا، ورجعت تاني real time combat حاجة شبيهة بلعبة Judgment مثلًا بس المميز أكتر عن اللعبة دي إنه فيها أسلحة وحركات متقنة أكتر.

مراجعة لعبة Like a Dragon: Ishin!

اللعبة بتديك سيف ومسدس صغير اللي هو revolver، وبتديك مع الوقت 4 طرق قتال. قتال يدوي بدون أسلحة خالص وده أقل واحد هتستخدمه وكمان قتال بالسيف فقط، وقتال بالسيف والمسدس مع بعض، وآخر واحد القتال بالمسدس لوحده.

مراجعة لعبة Like a Dragon: Ishin!

أنت ممكن في البداية تقول إيه الذكاء ده..إيه اللي يخليني أستخدم مسدس بس اللعبة كده هتتحول للعبة شوتر، أو وإيه اللي يخليني أستخدم سيف بس وكده لكن الحقيقة إنت كل سيناريو من دول هتحتاج تستخدمه لإن اللعبة ساعات بتزود في الأعداد بتاعة الأعداء بشكل مبالغ فيه عشان تستفزك تعمل كده، وفي بعض الأحيان بتحطك قدام عدو واحد قوي وقتها مش هينفع معاه غير القتال بالسيف لوحده، أو السيف والمسدس ولكل نظام فيهم Skill tree هتكلم عنها قدام.

مراجعة لعبة Like a Dragon: Ishin!

الحركات بتاعة الشخصية أثناء القتال من أنيميشنز وتأثير مرئي بتشوفه بعينك مقنعين جدًا الحقيقة ومتقنين بشكل كبير، وده اللي خلاني مبسوط ومستمتع وأنا بلعب اللعبة بكل الطرق الممكنة في القتال. المسدس مش هتحس إنه جي في مكان مش مكانه على الإطلاق بالعكس هتحس إنه عامل كومبو قوي بس مش overpowered في نفس الوقت.

مراجعة لعبة Like a Dragon: Ishin!

الاستكشاف رائع في اللعبة وفي عناصر مش هتصدق إنها موجودة في لعبة من مطور ياكوزا لإنها جديدة عليه، زي مثلًا إن لكل أسلوب قتال في الأربعة اللي ذكرتهم فوق في مدرب تقدر تتدرب معاه ووتعلم سكيلات جديدة.

مراجعة لعبة Like a Dragon: Ishin!

السكيلات هنا مش بتتفتح عن طريق شجرة المهارات بشكل مباشر لا أنت لازم تتعلمها من المدرب بتاعك وتمارسها قدامه، وبعدين لو عايز تتعلم حاجة جديدة هيقولك لأ أنت السيف بتاعك محتاج يتطور، والبحث عن الموارد لطويره مش سهل برضه خلي بالك…كل شيء محسوب ومتصمم بحيث العالم يشدك ومايسبكش بسهولة. عارف بقى إيه المبهر في العملية دي كلها؟

مراجعة لعبة Like a Dragon: Ishin!

المبهر إنك ممكن تلعب اللعبة كاملة من غير ما يعدي عليك النظام ده، الطريقة الوحيدة اللي ممكن تعرف بيها عن المدربين والسكيل تري دي هي إنك تسمع حوارات الناس في الشارع واللي هتلاقيهم بيقولوا “في مدرب كويس في المنطقة دي ” وبرضو ممكن تسمع وتفتكرها حاجة عادية جدًا فيا الحوارات، لكن اللعبة بتكافئ اللي بياخد عالم اللعبة على محمل الجد وبيقرر يدور على المدربين الأربعة وبيلاقيهم، ومن هنا بتحس إن العالم بيتفاعل معاك أو بيقدم قيمة تخليك تحب الاستشكاف ومش هتكره خالص عدم وجود أي وسيلة لإرشادك في العالم، لإن حجمه برضو مش كبير ومش شاسع نهائي زي ألعاب يوبي سوفت مثلًا.

مراجعة لعبة Like a Dragon: Ishin!

طبعًا اللعبة فيها كم مهول من الـMini games لإن ده أحد أركان سلسلة ياكوزا، ومنها الكاريوكي الغنائي، وسباق الديوك، وحاجات تانية عبيطة جدًا بس ممتعة. أنت ممكن تفتح اللعبة دي كل يوم لمجرد إنك تلعب سباقين للديوك في السريع كده قبل ما تنزل شغلك أو مدرستك أو جامعتك…حاجة منتهى العبط والجمال في نفس الوقت والله.

مراجعة لعبة Like a Dragon: Ishin!

الجرافيكس بتاع اللعبة مش تطور رهيب عن سلسلة ياكوزا ولعبة lost judgment اللي جت من نفس المطور من سنتين، بس تطوير كبير عن الإصدار الأصلي لإن زي ما قولتلك اللعبة دي تعتبر ريميك للأصل. الوشوش بتاعة الشخصيات هي اللي شهدت ثورة وبقت ممتازة ومعبرة ومتنوعة جدًا وساعدت في اندماجي في القصة وكمان موسيقى اللعبة  رائعة ومناسبة للأجواء اللي فيها كم كبير من التنوع وتداخل العصور. أنت بتشهد عصر بتسقط فيه إمبراطورية عملاقة وبتصعد عليها إمبراطورية تانية، في بقعة من الأرض تعتبر من أغنى الأماكن من حيث الثقافة والحضارة.

مراجعة لعبة Like a Dragon: Ishin!

البيئات وتصميمها البصري بيعكس ده، وبيخليك تحب تتجول في العالم وتتفرج عالناس اللي بتتفاعل مع بعض وتشوف بيتعاملوا إزاي، وده يخليني أقولك على المهمات الجانبية  بشكل سريع. بص يا صديقي الفكرة في المحتوى الجانبي هنا هو التركيز على الحقبة التاريخية ومظاهرها وده بيتم بشكل شبيه شوية بلعبة أساسينز كريد أوريجنز، وده مش ميزة في كل الأوقات، أو بمعنى أصح ميزة لو أنت حابب كده لكن لو عايز مهمات بكواليتي عالية طول الوقت فالمحتوى الجانبي بالنسبالك مش هيبسطك.

مراجعة لعبة Like a Dragon: Ishin!

اللعبة فيها 79 مهمة جانبية، كلها قصص جانبية وصغيرة أوي وبتخصل في حدود ال10 دقايق، في منهم مهمة مثلًا بتتكلم عن انتشار الناس اللي بتعرض قروض على المواطنين الفقراء مقابل شروط مذلة زي إن زوجاتهم يشتغلوا عاهرات لمدة معينة، أو أحد الشعراء اللي هتساعده يكتب قصيدة عن أحوال البلد البائسة، أو شخص هتحاول تساعده يعمل مشروع يسترزق منه. كلها مهمات بقصص جميلة وبتعكس وضع الشعب والمكان اللي أنت فيه بشكل عظيم، لكن هل هي في حد ذاتها ممتعة أوي؟ مش أوي بصراحة.

مراجعة لعبة Like a Dragon: Ishin!

في النهاية، أنا مش من عشاق سلسلة Yakuza لكن لعبة judgment و lost judgment شدوا رجلي الصراحة ناحية السلسلة ولما أعلنوا عن Ishin كنت مهتم بيها أوي لإن شكلها جميل والعصر اللي بتدور فيه من عصوري المفضلة، وفعلا اللعبة ماخيبتش ظني في نوع المحتوى اللي قدمته والقصة الملحمية والمؤثرة في الوقت نفسه، وكمان عالمها الممتع في استكشافه. لو بتحب الألعاب الياباني فدي واحدة من أحسنهم في الفترة الأخيرة.

مراجعة لعبة Like a Dragon: Ishin!

التقييم النهائي

9/10

مراجعة لعبة Like a Dragon: Ishin! مراجعة لعبة Like a Dragon: Ishin! مراجعة لعبة Like a Dragon: Ishin!