مراجعات, Reviews, استعراضات, عن الألعاب, مقالات

مراجعة لعبة Hogwarts Legacy

مراجعة لعبة Hogwarts Legacy

مراجعة

Hogwarts Legacy

هوجوارتس ليجاسي…أنا عارف إني اتأخرت عليكم…بس أوعدك المراجعة دي تعوضك عن التأخير، عشان هتبقى مراجعة غير أي مراجعة تانية شوفتها.

بصفتي واحد من اللي قرأوا كتب وشافوا أفلام هاري بوتر كلها كذا مرة، أعتقد إني أقدر أقول إن Hogwarts Legacy بالنسبالي كانت حلم وأصبح حقيقة. فرصة مش بتيجي في العمر غير قليل جدًا، وبمجرد ما اخدت كود المراجعة من الناشر قفلت على نفسي أوضتي وسرحت في عالم اللعبة.

مراجعة لعبة Hogwarts Legacy

أنت فاهم يعني إيه لعبة RPG فيها حرية كبيرة بتدور أحداثها في عالم هاري بوتر، لكن في الوقت نفسه مش مرتبطة بالفيلم؟ اللعبة دي كان ممكن جدًا تكون إخفاق كبير زي Gotham Knights وتبقى فضيحة للاستوديو المطور اللي اسمه Avalanche games خصوصًا إن دي أول لعبة بالحجم ده ليهم. مكنش حد هيلومهم لو اللعبة طلعت وحشة أو عادية أو فيها عيوب كارثية كتير.

مراجعة لعبة Hogwarts Legacy

طبعًا أنت فهمت المراجعة دي رايحة فين دلوقتي، أقدر أقولك إنك فهمتني صح، اللعبة حلوة وأنا جي انهاردة أقولك هي حلوة ليه. بس بشكل موضوعي، خلينا نمسك حتة حتة وأقولك المطور إزاي قدر يحول عالم خيالي كامل لعالم لعبة ممتع.

أنا ممكن اقرأ كتب وأشوف أفلام ممتعة، لكن إني ألعب في العالم نفسه وأحس إني مستمتع، ده إنجاز كبير لازم نقف عنده شوية حلوين، ونحلل أسبابه.

مراجعة لعبة Hogwarts Legacy

القصة

أولًا قصة اللعبة بتدور حواليك أنت، بطل اللعبة وشخصية أنت بتعملها من الصفر بـCharacter creator عظيم مليان تفاصيل والشخصية دي بتنقل من مدرسة تانية لمدرسة هوجوارتس لتعليم السحر، وبيدخل على السنة الخامسة مباشرةً. الشخص المشرف على نقل الطالب ده بسلام هو بروفيسور إسمه فيج، ولكن فيج ده وراه سر كبير وهو وزوجته بتجبرك الظروف إنك تخش معاه في تفاصيله.

مراجعة لعبة Hogwarts Legacy

زوجة فيج، واللي اسمها ميريام بتكون مهتمة ومهوسة بالسحر القديم، وبتحاول تبحث عنه وتفهمه أكتر وده بيعرض حياتها للخطر وبيتسبب في موتها، وبروفيسور فيج بيحاول يفهم الموضوع وأبعاده. لحسن حظ بروفيسور فيج وسوء حظك أنت، وزي أي لعبة RPG كلاسيكية. أنت بتكون أكتر واحد مؤهل إنه يشوف آثار السحر القديم ده ويتتبعه، وبالتالي بيتكتب عليك تكون رفيق البروفيسور في رحلة كشف اللغز بتاع وفاة زوجته.

مراجعة لعبة Hogwarts Legacy

في الوقت نفسه، الجوبلنز، وهم مخلوقات مستعبدة ومضطهدة في عالم اللعبة والأفلام بيحاولوا يقوموا بثورة عنيفة ضد السحرة البشريين واللي بتسميهم اللعبة WIZARDKIND بقيادة مجرم عنيف اسمه Ranrok واللي بيتعاون مع قائد مجموعة من السحرة البشريين الظلاميين اسمه Rockwood.

مراجعة لعبة Hogwarts Legacy

كل الأخطار دي بتحصل لما تقرر تخش المدرسة…وطبعًا كل ده بجانب وقتك الكلاسيكي في المدرسة والتعرف عليها، وعشان كده تقدر تقول إن القصة زحمة أوي من الأول…وأنا أقصد ده بالمعنى الإيجابي المرة دي لإن قصة زي دي في عالم بالتفاصيل دي كلها لازم تكون زحمة.

مراجعة لعبة Hogwarts Legacy

خلينا نمسك القصة حتة حتة…أولًا شخصية البطل ليها تمثيل صوتي، وده قرار موفق جدًا من المطور لإن الشخصية بتتكلم في لحظات مهمة جدًا وبتقول لاينات مش هتنساها بأداء عظيم، وكمان تقدر تختار في الحوارات طريقة كلامه هل إنت عايزه يكون شخصية لطيفة مع الناس ومراعي لمشارعهم ولا شخص دبش ومش بيعرف يزوق كلامه بل في بعض الأحيان وقح. وهنا بيبان أهمية نظام الاختيارات اللي بتقدمه اللعبة ولكن للأسف، ملوش أي تأثير واضح على الأحداث. في مواقف سواء رفضتها أو قبلتها المعطيات واحدة ومفيش خيار إنك ممكن تقنع حد بحاجة بالحوارات فقط.

مراجعة لعبة Hogwarts Legacy

شخصيات القصة والمدرسة من مدرسين وطلاب شخصيات جذابة، وخصوصًا شخصية بروفيسور ويزلي وبروفيسور فيج وشخصيات تانية مش هحرقها عليك، والطلبة أهمهم كانت شخصية أوناي وشخصية سباستيان سالو اللي كانوا مميزين جدًا وليهم خط سير لأحداث خاصة فيهم في مهمات جانبية هنتكلم عنها بالتفصيل قدام شوية.

مراجعة لعبة Hogwarts Legacy

تمثيل كل الشخصيات عظيم ومقنع في معظم الأوقات، ولكن ماتتوقعش حاجة في مستوى God of war أو The last of us في تعابير الوجوه لإن في الاول والآخر دي لعبة RPG.

أقدر أقولك إن القصة فيها حاجات كتير مش متوقعة، وأوقات هتكون متفاجئ من اللي بيحصل قدامك لدرجة إنك ممكن تحط إيدك على دماغك من تسارع الأحداث والدهشة. الأحداث ملحمية من أول لحظة لآخر لحظة وبكده هختم كلامي عن القصة عشان ماكونش بحرق.

مراجعة لعبة Hogwarts Legacy

الجيم بلاي بقى متقسم لأكتر من جانب…إنت في لعبة RPG دلوقتي أوعى تنسى ده، بالتالي إنت قدام كذا عنصر أساسين، والإبداع مش في العناصر دي إنما في كيفية تقديمها.

العناصر الأساسية اللي أقصدها هي القتال  أو الكومبات، والاستكشاف وضمن الاستكشاف هيكون الألغاز وجمع الموارد وتطوير العتاد بتاعك، والعنصر التالت هو تطوير مستواك.

مراجعة لعبة Hogwarts Legacy

اللعبة بتبدأ معاك من مستوى 1، ومعاك لحد نهاية اللعبة 38 مستوى كاملين لفل فيهم، والقتال طبعًا من غير أسلحة يدوية وكله بالعصاية السحرية. مع أول مهمات اللعبة بتروح تشتري عصايتك من محل أوليفاندر اللي في هوجسميد، وتبدأ مغامرتك في تعلم التعويذات السحرية كلها.

أكتر من 20 تعويذة منها اللي قابل للفتح في مهمات أساسية، ومنها اللي بيتفتح من مهمات جانبية. المهمات الأساسية هي مهمات القصة اللي بتطارد الخطوط الأساسية اللي حكيتلك عنها فوق، لكن في مليون خط تاني في القصص الجانبية واللي وجدتها في الحقيقة بمستوى عظيم في معظم الأوقات.

مراجعة لعبة Hogwarts Legacy

الكومبات فكرني أوي بلعبتين من أعظم ما لعبت على صعيد المعارك وهم Batman Arkham و God of war Ragnarok في الاهتمام بالتفاصيل من حيث الanimations وشكل تأثير الضربات على الأعداء والfree flow بتاع الكومبات بحيث يديك طابع سنيمائي بشكل كبير.

لو عجبك المعارك في الأفلام هتحبها هنا أكتر، وحتى لو ماعجبتكش فهنا المعارك أكثر صعوبة من المتوقع لكنها بتكافئك بشدة وكرم على إتقانها. عند ضربة basic باستخدام r2 ولو فضلت دايس على r2 بتفتحلك اخيتار من أربعة بتختار ما بينهم من أزرار الدايرة والمربع والإكس والمثلث، وبتقدر تعمل mapping للزراير دي عشان تحط تعاويذك المفضلة على الزرار اللي أنت عايزه.

مراجعة لعبة Hogwarts Legacy

كل مجموعة تعاويذات ليها استخدام محدد، في مثلًا تعاويذات ليها علاقة بالحكم في الأشياء، زي flippendo و accio و protego والأولى بتقلب بيها الأشياء، التانية بتشد بيها الأعداء أو الأشياء ناحيتك والأخيرة بتدفع بيها الأعداء أو الأشياء بعيد عنك.

مراجعة لعبة Hogwarts Legacy

كل مجموعة تعويذات من دول ليهم لون، واللون ده مؤشر على إن استخدامهم ضروري لكسر دفاعات الأعداء حسب لون درع كل عدو، وده معناه إنك محتاج تبدل بين التعاويذ كل شوية وبسرعة شديدة.

حاجة زي كده كان من شأنها تكون عنصر ممل ومتعب للاعب لإن التعاويذ كتيرة وكلها تقريبًا مهم في أوقات مختلفة، لكن لأ. المطور أبدع إبداع لا يوصف في تصميم القوايم بتاعة التعاويذ بالذات وبالتالي ده انعكس على المعارك بشكل إيجابي شديد جدًا الحقيقة.

مراجعة لعبة Hogwarts Legacy

فاكر GOW Ragnarok و باتمان أركهام لما كان فيهم أدوات كتير جدًا وأنت بتبدل بينهم بسهولة وبانسيابية وبتدمر الأعداء؟ اللعبة هنا كده برضو بس بشكل جديد مشوفناهوش قبل كده. شكل يليق بسلسلة هاري بوتر العظيمة.

ومش بس كده يا صديقي، ده أنت كمان بتستخدم التعويذات دي في الألغاز وفي التنقل في البيئة بشكل ذكي جدًا فكرني بألعاب GOW تاني أو Star wars Jedi fallen order لما كانت اللعبة كل شوية تديك أدوات جديدة تخليك ترجع بيئات قديمة تفتح منها أجزاء ماكنتش مفتوحة قبل كده.

مراجعة لعبة Hogwarts Legacy

وهنا نكون دخلنا في الاستكشاف يا عزيز، واللي متقسم 3 أقسام…ألغاز،جمع الموارد، وتطوير العتاد. مبدأيًا جمع الموارد بيكون عن طريق استكشاف البيئات وفتح الصناديق وتلويت أي مخيمات للأعداء أو أماكن نائية. والألغاز كان تصميمها رائع وممتع بشكل مشوفتوش كتير في الألعاب الحقيقة. ألغاز بيئية معقدة بشكل مايخلكش لا تزهق منها ولا تحلها بسهولة، والأجمل إن اللعبة مش بتغششك حاجة فيها.

مراجعة لعبة Hogwarts Legacy

أما جمع الموارد ففي نص اللعبة بتفتحلك Room of requirments ودي بتتيحلك إنت تزرع نباتات تستفيد منها في المعارك و مساحيق تفيدك برضو في المعارك والاستكشاف، ودي مهمة جدًا ولكن اللعب في غرفة المتطلبات مش بيقتصر على كده لأ إنت تقدر تربي فيها حيوانات وتراعيهم وتجيبلهم لعب و أكل وتدلعهم على الآخر، وتقدر تخليهم يتكاثرو وتحافظ عليهم من الانقراض.

الحقيقة جانب غرفة المتطلبات ده لوحده قضيت فيه ما لا يقل عن 5 ساعات لعب من ال60 ساعة اللي لعبتهم في Hogwarts Legacy وكأني بلعب المزرعة السعيدة من تاني، وسعيد جدًا بكم الوقت اللي قضيته ورقيت في الغرفة.

مراجعة لعبة Hogwarts Legacy

الجانب الأخير من الاستكشاف، وهو ترقية العتاد بتاعك أو لبسك من الآخر كان هو الأضعف. اللبس مكنش مؤثر أوي ومكنش في حاجة كبيرة له لإن أصلًا مع الوقت بتلاقي معاك كم كبير من الملابس والحاجات اللي بتخلي أرقامك تعلى وماتحتجش تدور كتير بعد كده.

في بداية اللعبة بتحصل على كتاب اسمه Field guide أو المرشد الميداني، وده كتاب بيقدملك كل ما يمكن أن تحتاجه حرفيًا، وهو القايمة الرئيسية للعبة، وتصميمه عبقري وبيديك معلومات عن كل حاجة بتقابلها في المدرسة وبراها.

مراجعة لعبة Hogwarts Legacy

خريطة اللعبة مش بتقدملك Hogwarts فقط بل بتقدملك المنطقة المحيطة كلها واللي بتتضمن الغابة المحظورة وقرية هوجسميد وبعد الوديان والجبال والمناجم المحيطة. العالم ضخم جدًا وكلمة مليان نشاطات قليلة. يكفي إني أقولك إن اللعبة فيها أكتر من 100 مهمة جانبية كل واحدة بقصة مختلفة، ده غير مهمات العالم المفتوح اللي منها كتير متكرر لكن ممتع بشكل رهيب. في مجموعة مهمات اسمها merlin trials كنت سعيد أوي وأنا بتنقل في العالم المفتوح وبخلصهم واحدة ورا التانية. وعلى ذكر التنقل بقى يا صاحبي…تعلالي هنا كده

مراجعة لعبة Hogwarts Legacy

التتنقل ممتع لدرجة رهيبة برضو، أنا مش هقدر أوصفلك ممتع قد إيه دي حاجة لازم تجربها بنفسك لكن يكفي أقولك إنك ممكن تتنقل باستخدام المقشة السحرية ودي لوحدها سواقتها عايزة تعليم ووقت على ما تتعود عليها لكن بعد ما تتعود عليها هتلاقيها عظيمة ودقيقة جدًا.

مراجعة لعبة Hogwarts Legacy

وممكن تتنقل باستخدام مخلوقات Hippogriffs أو مخلوقات thestrals لو معاك لانسخة الديلوكس! ودي كلها طرق تنقل عمرك ما هتزهق منها خالص، وبالتالي تجولك في العالم المفتوح غالبًا هيخليك تعمل نشاطات أكتر منه حتى لو متكررة.

مراجعة لعبة Hogwarts Legacy

تطوير مستواك ده بقى بيجي عن طريق الxp اللي بتاخده على أي نشاط بتعمله، وتقدر مع كل لفل تطلعه تفتح مهارة واحدة ضمن شجرة مهارات ب 5 فروع، منهم فرع مخصص للدارك أرتس أو السحر الظلامي بتاع فولدمورت وكده.

مراجعة لعبة Hogwarts Legacy

المهارات دي ممتازة وعظيمة وبتقدم تجديدات قوية على أسلوب اللعب بشكل ملحوظ.

طيب هل ده معناه إن اللعبة بدون عيوب يعني خلاص؟ ماستربيس؟

الحقيقة لأ، اللعبة في عيوب واضحة لكن ممكن جدًا نقول إنها سهل تتفاداها لو في أجزاء جديدة، زائد إنها هنا مش مؤثرة أوي على المتعة. إنت في النهاية هتخرج مستمتع ومش فاكر حاجة من العيوب دي خالص.

مراجعة لعبة Hogwarts Legacy

العيوب

روح التنافس بين الفرق بتاعة المدرسة اللي هي سليثرن وجريفندور وريفنكلو وهافلبوف مش موجودة تقريبًا. جزء مهم من قصة الأفلام والكتب كان حوالين الجزئية دي وده غايب هنا وكمان كاست الشخصيات كان عظيم بس مش متواجد بكثرة وتحس دايمًا إن البطل بيعمل كل حاجة لوحده. يمكن عشان مش منضم من السنة الأولى؟ جايز بس كان نفسي اللعبة يكون فيها نظام رفقاء شبه لعبة the outer worlds اللي كان بيعلق فيه الشخصيات اللي معاك على كل حاجة بتحصل ولكل شخصية بتكون معاك ميزة بتتيحهالك.

مراجعة لعبة Hogwarts Legacy

الأعداء كمان كانوا متكررين وبعد نص اللعبة بتحس إنك مبقتش تشوف جديد، الفكرة في الاعداد اللي ساعات اللعبة بتزودهم عليك عشان تحس بالصعوبة وخطورة الموقف لكن التجديد كان فقير نوعًا ما.

فيما عدا الحاجات دي، اللعبة شبه مثالية الحقيقة وممتعة لأبعد الحدود. الجرافيكس فيها من أجمل ما يكون وألعاب قليلة قدرت تقدم بيئات وتفاصيل بالحجم والإتقان ده على الجيل الحالي. الجرافيكس خلال اللعبة كأنه مقطع سينيمائي وده بيخليك علاطول مندمج معاها.

مراجعة لعبة Hogwarts Legacy

الموسيقى بقى كانت من أعظم الحاجات اللي سمعتها آخر 5 سنين في الألعاب. دمجت العظمة بتاعة هاري بوتر مع بعض النوتات الجديدة واللي خلتين حاسس إني أمام ملحمة لا تقل عن ملحمة Lord of the rings أو الأفلام بتاعة هاري بوتر في حاجة. موسيقى فيها كل درجات الألوان اللي ممكن تحتاجها لعبة زي دي، أوقات هتحس إنها خفيفة ومرحة، وأوقات جادة ومظلمة، وأوقات ملحمية وصاخبة. كل حاجة حلوة ممكن تتقال عن الموسيقى متوفرة هنا.

مراجعة لعبة Hogwarts Legacy

في النهاية، تجربة لعبة Hogwarts legacy هي واحدة من أمتع تجارب السنة عشان عالمها المفتوح العملاق، والمتقدم بمستوى خرافي من التفاصيل ومتعة التنقل والاستكشاف فيه، وقصة اللعبة القوية واللي بتديك جرعة كنت مستنيها من بعد الأفلام ما خلصت في 2011.

لعبة هوجوارتس ليجاسي بالنسبالي هي لعبة السنة حتى إشعار آخر.

التقييم النهائي

10/10

مراجعة لعبة Hogwarts Legacy

مراجعة لعبة Hogwarts Legacyمراجعة لعبة Hogwarts Legacy