مش عارف ممكن تتفق معايا ولا لأ، بس أنا حاسس إن Payday 3 ظهرت فجأة على الساحة من غير ما نسمع عنها أي إشاعات أو تسريبات زي ما بيحصل دايمًا، وفجأة لقيت الشركة اللي عاملة اللعبة بتقولي خد جرب البيتا…طبعًا أنا انبسط جدًا بالمفاجأة دي وكنت مبسوط جدًا بيها لإني كنت قربت أفقد الأمل في إني أشوف لعبة جديدة من السلسلة دي بعد ما قضيت فوق الألف ساعة بلعب الجزء التاني.
عشر سنين عدت على إصدار الجزء اللي فات، و20 إضافة حصل عليها الجزء ده بعضها محتوى وبعضها إضافات شكلية وكان حجم الدعم من الاستوديو هايل وغير مسبوق بصراحة لكن 10 سنين مش كتير شوية إنك تطور لعبة مش كبيرة؟ دي مش gta 6 يعني عشان تاخد 10 سنين.
خليني أديك نبذة عن اللعبة والاستوديو المطور الأول، بص يا سيدي المطور اسمه star breeze، استوديو في حالة كده وغلبان ومش بيعمل ألعاب غير سلسلة pay day ومش بيتكلم كتير ولا الدعايا بتاعته فيها فرقعة وتصريحات نارية والكلام ده.
سنة 2013 عمل جزء تاني من لعبة نجحت نسبيًا كانت بتتمحور حوالين سرقة البنوك والسطو المسلح والعمليات الإجرامية من النوع ده. عارف الهايستات بتاعة gta 5؟ أهي دي لعبة كاملة مبنية على كده بس من المنظور الأول، ومفيهاش سواقة عربيات وبتركز على جانب الشوتينج والتنفيذ في العمليات دي. اللعبة دي نجحت أوي لدرجة مكنش حد متخيلها والجزء الجديد إتعلن عنه في سمر جيم فست اللي فات، وهينزل في سبتمبر الجي…
نيجي بقى للجزئية اللي كلنا جايين عشانها…هل اللعبة حلوة؟!؟
اللعبة حلوة أه، وحلوة أوي كمان ومن خلال البيتا اللي لعبتها دي أقدر أقولك إننا قدام جزء تالت في منتهى الجمدان بس عايزك تحط في اعتبارك إن البيتا اللي لعبتها دي فيها خريطة واحدة بس فمش مقياس بنسبة 100% برضو…يعني لو طلع فيها مشاكل بعدين ماتجيش تقولي إن أنا اللي لبستك هههههه
الخريطة الموجودة في البيتا عبارة عن بنك موجود في نيويورك المفروض تسرقه، وبتبدأ في مود اسمه Masks off وده بتكون عامل فيها مواطن عادي داخل يسحب مرتبه أول الشهر من البنك وبتكون مخبي السلاح ومش لابس الماسك بتاعك وتقدر في الوقت ده تتجول في البنك وتستكشفه عشان تحفظ الlayout بتاعك…مش قولتلك، لعبة إجرام إجرام يعني مش أي كلام.
تقدر كمان تتسلل لمناطق الموظفين بس دي لو اتكشفت فيها الأمن هيخرجك برة، ولو اتكشفت مرة تانية هيتقبض عليك، فهنا بقى يظهر استخدام نظام التسلل العالمي اللي من زمن تاني وكوكب تاني….اللي تقدر من خلاله توطي!!!
أيوة، هتوطي وتتسحب ورا الأمن عشان تسرق كروت تعريفهم اللي تقدر تفتح بيها أبواب البنك المقفولة وتسهل طرق الهروب، وتقدر كمان تدور في أوراق البنك وتعرف أكتر الثغرات الأمنية في البنك وإزاي تقدر تهكر السستم وكده يعني.
نظام التخفي ده طبعًا بيبوظ لو أي حد ضرب رصاصة واحدة، وده منطقي يعني 4 داخلين بنك وواحد ضرب رصاصة أكيد مش هيسيبوا ال3 اللي مع اللي ضرب الرصاصة…فكر فيها كده؟ منطقية..
لو حصل حاجة واتكشفت، أو لو كشفت نفسك بنفسك بتخش مود masks on وهنا بتطلع السلاح بقى وتدور في الضرب والأمن بيبلغ الشرطة والشرطة بتيجي خلال 30 ثانية…الشرطة بتيجي على مراحل هنا، كل مرحلة لو اتغلبت عليها بيجيلك قوات أصعب وأقوى وبصراحة القوات كلها سهلة أوي يعني والذكاء الاصطناعي بتاعهم يتقال عليه غباء اصطناعي…ماحدش فيهم بياخد ساتر ولا بيوطي عشان يتفادى الرصاص حتى.
أنت بيكون مطلوب منك تفتح الخزنة بثيراميت من السقف، وتقف تحميه وممكن تنسق ده بقى مع باقي الفريق بس لو أنت بتلعب مع 3 روس زي مانا كنت بعلب كده، فطبعًا تنسق إيه يا معلم صباح الفل…أنسى، الحمد لله إنك مكمل الجيم أصلا يعني.
لو بتلعب مع 3 من نفس بلدك وبتتواصلوا اللعبة هتكون أمتع كتير لأنك هتقسم الأدوار معاهم وكل واحد هيكون مسؤول عن حاجة وبالتالي المهمة هتخلص بسرعة وهتنجز فيها.
المهم بعد فتح الخزنة لازم تقفل الإنذار اللي لو كمل وماتقفلش الفلوس بيترمي عليها صبغة بتخليك الفلوس كلها ملهاش لازمة، وده طبعًا معناه إنك خلاص خسرت المهمة.
بعد ما بتاخد الفلوس بتنقل على الهروب بقى وهنا بيتم تفعيل مود الجري نص الجدعنة وبتحاول تجري بس الشرطة بتكون في كل حتة فبتحاول تفتح ثغرة في صفوفهم، وتهرب منها والهروب مش بيكون عشوائي ..لأ بيكون في عربية بتجيلك تحط فيها الفلوس وتهرب أن، والعربية دي بتقابل معوقات في الطريق فأنت لازم تحلها وكده…بص من الآخر مفيش حاجة سالكة في اللعبة دي.
بشكل عام التجربة جامدة وممتعة وهيكون في اللعبة النهائية 8 مهمات تقدر تلعبهم وتعيد وتزيد فيهم زي مانت عايز. في مهمة لعبها بعض الصحفيين الأجانب كانت عبارة عن سرقة لوحة من متحف وكان لازم تفضل تتأكد من اللوحات أصلية ولا لأ قبل سرقتها، فده معناه إن المهمات هتكون متنوعة وكل مهمة ليها أدواتها اللي هتخليك تحس بتغيير.
الفلوس اللي هتاخدها من المهمات بتصرفها في متجر اللعبة واللي تقدر تشتري منه أسلحة، واقنعة وستيكرات وسكنات وكل حاجة حرفيًا. عاجبني إن اللعبة كل مدى بتديك أدوات تغير نسبيًا من أسلوب لعبك، يعني مثلا في الأول مش بتبدأ معاك قنابل غاز أو كاتم صوت، ومع الوقت بتقدر تاخدهم وتستعملهم، يعني مثلا كاتم الصوت ده مهم أوي لو هتلعب تخفي. تقدر تضرب بيه الكاميرات وتكسرها والحراس من غير ما حد يشوفك.
اللعبة فيها 4 صعوبات، الكاميرات قابلة للتكسير على الصعوبة الأولى بس، وبعد كده بتبقى مصفحة..هههه الصعوبة كل ما بتزيد بتموت أسرع والاعداء بيبقوا كتير…ماخبيش عليك أنا كنت بلعب على الصعوبة المتوسطة عشان مابحبش لما الألعاب تكون فاهمة إن الصعوبة يعني ترميلي 500 عدو
الجرافيك جامد والأداء كان عظيم ومفيش أي مشاكل تقنية والحلو إنه نقلوا اللعبة على أنريل إنجن 4 وهينقلوه على 5 بعد الإطلاق. عاجبني كمان إن في تفاصيل أكتر في البيئة والرصاصة اللي بتضرب على الحيطة بتخرمها، والبيئات قابلة للتكسير وبالتالي بتشوف تأثيرك عليها وده شيء ممتع ومرضي أوي.
الشوتنج نفسه دقيق وممتع، هي مش Modern warfare 2، بس ممتازة كإحساس وفيدباك وrecoil وكل سلاح فعلا مختلف عن التاني بشكل كافي.
في النهاية يا عزيزي، اللعبة حلوة وانا مستنيها جدًا عشان ألعبها مع أصحابي ونشوف أحلى ضحك وهبل مع بعض للصبح، وخليني أقولك إن في لعبة صدرت من فترة حاولت تقدم تجربة مشابهة بس فشلت فشل ذريع، كان اسمها cime boss rockay، مع إنهم جابوا ممثلين كتير جدًا وعملوا قصة وأحداث سينيماتك وبتاع بس فشلوا برضو، فلما ده يحصل لازم نعرف إن اللي عمله مطورين pay day ده مش سهل، ومش حاجة يستهان بيها أبدا.
Mustafa Sabry
