مراجعة توسعة
Cyberpunk 2077: Phantom Liberty
من 3 سنين تقريبًا نزلت واحدة من أكتر الالعاب المحبطة في التاريخ، بل في ناس كتير مقتنعة انها اكتر لعبة احبططهم في حياتهم و افقدتهم ثقتهم باستوديو عظيم زي CD Projekt Red. كانت صدمة حرفيًا و الكل كان بيسأل ازاي الاستوديو اللي طلعلنا تحفة Witcher 3 يخرجلنا لعبة مليانة مشاكل بالشكل ده. طبعًا احنا بنتكلم عن Cyberpunk 2077.
لكن CD Projekt مستسلمتش وقررت تنزل لقاع المحيط عشان تنقذ لعبة Cyberpunk و تطلع بيها للسطح عشان تتحول من لعبة منسية محدش مهتم بيها، للعبة تريند و كله بيتكلم عن الاضافة الجديدة بتاعتها اللي بعنوان Phantom Liberty، و اللي نزل معاه تحديث 2.0 الضخم. السؤال بقى، هي Cyberpunk بقت Cyberpunk اللي كنا مستنينها بعد اعلانها اللي نزل في 2019؟ هنشوف ده في المراجعة.
قصة الإضافة من غير حرق
لو انت من الناس اللي ادت للعبة فرصة سنة 2020 و لعبت اول كام ساعة من القصة فانت اكيد عارف V. الشاب اللي بيفقد شخص عزيز عليه جدًا اثناء عملية سرقة لواحدة من الشرايح الالكترونية و عشان يخرج بيها بيضطر انه يحط الشريحة ديه في دماغه. و للأسف الشريحة ديه بتبقى عبارة عن قنبلة موقوتة في دماغه بتموته بالبطيء.
اضافة Phantom liberty بتبدأ بعد نص اللعبة بشوية تقريبًا بالتحديد بعد مهمة “Vodo Boys” و بتاخد منحنى مختلف عن قصة اللعبة الاساسية. ده ينقلنا لسؤال مهم جدًا و هو هل انا لازم العب اللعبة كلها بعدين اخش على اضافة Phantom Liberty. ولا زي ما حصل في لعبة Witcher 3 و اضافاتها فانا اقدر العبهم علطول و مش هتأثر على تجربتي.
اه انت ينفع تخش بشكل مباشر على الاضافة و ده خيار اللعبة بتقدمهولك لما تضغط على New Game. و لو اختارت تلعب الاضافة علطول فاللعبة هتاخدك للجزء من القصة اللي احداث الاضافة بتبدأ فيه. لكن اللعبة بتنصح بانك تلعب قصة اللعبة الاساسية الاول لحد نقطة بداية قصة الاضافة عشان تبقي فاهم تطورات شخصيات عالم اللعبة اللي هتقابلها و تطورات V كمان.
نرجع لقصتنا. V اثناء رحلته في انه يلاقي علاج للشريحة اللي في دماغه بتظهرله الـ Netrunner اللي اسمها Songbird. و الي بتطلب منه انه يساعدها في مهمة قومية عشان ينقذوا رئيسة دولة “الولايات المتحدة الجديدة” اللي طيارتها رايحة لمدينة Dog Town. الاحداث بتتطور و بتتحول مهمتك لحماية Myers و بينضم ليك بعد كدة العميل السري “سولمن رييد” اللي بيقوم بدوره الممثل “إدريس إيلبا” المعروف بشخصية هايمدال في افلام Thor.
انضمام إدريس جنب كيانو ريفز في اللعبة و وجود الاتنين في بعض المشاهد كان حرفيًا Mind Blowing في حواراتهم مع V. مش عشان دول افضل ممثلين في التاريخ، لكن عشان فكرة ان دول مثلين موجودين في الحقيقة بتزود من ارتباطك بالشخصية. فلازم نحيي الاستوديو على شخصية سولومون ريد و اختيار إدريس إيلبا انه يقوم بالدور، و اتمني اشوف ممثلين اكتر في العاب تانية لأنها واضح انها فكرة ناجحة تسويقيًأ و كمان بالنسبة للقصة.
كالعادة CD Projekt بتبدع في انها تعمل اضافات لألعابها بقصة يمكن تكون أفضل من قصص ألعاب كاملة. القصة مليانة كمية تويستات بتحصل كل كام ساعة بتخليك مرتبط بالقصة و بالشخصيات طول الوقت. و زي ما قدمو شخصيات متتنسيش في اضافات لعبة ويتشر. في سايبر بانك برضو شخصية سولومن ريد من اكتر الشصخيات المعقدة اللي شوفتها و معقدة بمعنى صعب جدًا تفهم هو عايز ايه.
القصة ليها نهايات كتير. نقدر نقول انهم 4 نهايات. بيعتمدوا بشكل رئيسي على اختياراتك بالذات في مهمتين مش هقولك ايه هم عشان الحرق. رغم كل الكلام الجميل ده عن القصة، لكن للأسف في بعض اللحظات و القررات اللي بتاخدها بعض الشخصيات مش منطقية اطلاقًا لأن انا و انت عارفين نتيجة القرار ده بس الشخصية بتعمل من بنها.
اللعبة فيها لحظات بتجبرك فيها انك تروح تلف في عالم اللعبة و تخلص شوية مهمات جانبية لحد وقت معين. بالنسبالي انا كنت عايز اعيش مع قصة الاضافة بشكل كامل و كانت اللحظات ديه فصلان ملوش لازمة بالنسبالي ده غير انها مكانتش قليلة. بس بشكل عام CD Projekt نجحوا انهم يقدمو قصة متتنسيش بسهولة.
ايه الجديد في Phantom Liberty
اضافة Phantom Liberty جاية بمحتوى اضافى بيتفتحلك بمجرد ما تشتري الاضافة. اهمها هي منطقة جديدة بالكامل و هي مدينة Dog Town بتصميمها المختلف عن Night City. الخريطة كبيرة نسبيًا و بيئتها مختلفة و مكان خطر جدًا. و طبعًا مهمات جانبية جديدة احداثها في خريطة Dog Town. في منها قصص مثيرة للاهتمام الحقيقة.
ده غير طبعًا التعديل الكبير على الـ Skill Tree باضافة مهارات جديدة ليها تأثير مباشر على الـ Gameplay. مهارات زي انك تعمل Dash في الهوا أو زيادة في قوة V أو حركات جديدة ليها علاقة بالـ Combat. ده غير شوية اسلحة جديدة و عربيات جديدة على شوية ملابس جديدة. محتوى كان ليه تأثير في انه يحسن من تجربة الـ RPG اللي كنا مستنيينها لما نزلت اللعبة اول مرة.
ايه الجديد في تحديث 2.0
اكيد مكانش هيبقى منطقي ان CD Project ينزلو اضافة للعبة بقالها 3 سنين و محدش فكر يلعبها بسبب مشاكل الاداء الكارثية. من غير ما ينزلو معاها محتوى يضمنلنا اننا هنلاقي تجربة مختلفة عن اللي شوفناها في ديسمبر 2020.
تحديث 2.0 مش بس جاي بشكل مجاني للناس اللي عندهم اللعبة عشان يظبطلهم الاداء. لكنه كمان جايب معاه محتوى عشان يصلح من مشاكل كتير في اللعبة. زي مثلًا مشكلة الذكاء الاصطناعي. دلوقتي الاعداء بقو اذكى بكتير و بيعرف ازاي يستخبى منك و ازاي يحاصروك.
و نيجي عند الملابس و الـ Armor بتاعك فالنظام ده اتعدل و بقى احسن بكتير. الملابس بقدت دلوقتي مجرد مظهر و مش بتديك Armor ولا اي اضافات. و التركيز كله راح للقطع الالكترونية المزروعة اللي بتشتريها و تغيرها و اللي بتديك الـ Armor الارقام اللي كانت في الملابس.
حصل تعديل مش صغير برضو على العربيات في اللعبة و اتضافت بعض العربيات اللي بتقدر تضرب منها صواريخ عشان تخلي المطاردات اللي بالعربيات حماسية اكتر. رغم ان للأسف ده مبيحصلش بشكل كافي في الاضافة. لكن ليها تأثير مش قليل على قصة المهمات اللي بيحصل فيها مطاردات في القصة الاساسية. لكن لا زلت عند رأيي ان التحكم في اغلب عربيات اللعبة مش مريح اطلاقًا رغم انه واقعي، لكن الواقعية مش دايمًا مفيدة للـ Gameplay.
الاداء التقني
و هنا نيجي للـ Master scene زي ما بيقولو. و هو السؤال اللي اي حد بيسأله قبل ما يقرر يدفع فلوس مرة تانية و يشتري الاضافة عشان ميتخدعش تاني زي ما حصل في 2020. ايه اخبار الاداء التقني و الجليتشات؟
التحديث اللي نزل مع الاضافة حول اللعبة من كابوس لاغلب الاجهزة للعبة سلسة بكشل رهيب و معدل فريمات شبه ثابت طول الوقت. انا شخصيًا لما جربت اللعبة لما نزلت كانت صدمة اني مش عارف اوصل لأداء يرضيني و يخلي التجربة سلسة خصوصًا ان اللعبة بتركز اغلب الوقت على التصويب. لكن مع تحديث 2.0، التجربة بقت سلسلة جدًا و وصلت لفرق 20 فريم زيادة عن ادائها من 3 سنين.
اما بالنسبة للجليتشات، فخلينا منطقيين، صعب جدًا تصلح مشاكل الجليتشات اللي شوفناها وقت اصدار اللعبة لأنها كانت بتحصل بشكل متكرر جدًا و في كل جوانب اللعبة بتقابل جليتش تقريبًا. رغم كدة CD Projekt قدروا يحلو 90% من الجليتشات ديه و انا طول تجربتي مقابلتش جليتشات كبيرة تقريبًا. يمكن هتقابل كام جليتش غالبًا يتعدو علي الايد الاواحدة و هتنسي انهم حصلوا.
كدة نقدر نقول ان ديه نسخة Cyberpunk التقنية اللي كنا مستنينها في 2020.
الخلاصة
احنا كـ Gamers دايمًا بنبقى عايزين اللعبة اللي تدينا تجربة ممتعة و سلسة مع قصة تشدنا و اداء ثابت. و مظنش ان حد فينا بيكره ستوديو CD Projekt اللي دايمًا معروف بألعابه اللي بتتحط في التاريخ. و رغم الفشل الزريع اللي حصل وقت اصدار Cyberpunk. الا ان الاستوديو قرر يعافر مع اللعبة عشان يقدملنا اضافة تتحط بسهولة جنب اضافات ويتشر العظيمة في قايمة افضل اضافات الالعاب. و مع تحديث 2.0، نقدر ننسي الاصدار الكارثي في 2020 ونقول ان أخيرًا Cyberpunk 2077 نزلت زي ما توقعناها في سبتمبر 2023.
التقييم
9.5\10
