مراجعة

EA FC 24

هكون صريح معاك من البداية وأعترفلك إني مكنتش متفائل بلعبة EA FC 24 من ساعة ما تم الإعلان عنها، خصوصًا بعد الانفصال المفاجئ عن FIFA، واللي توقع البعض إنه ممكن يُسبب مشاكل لسلسلة ألعاب كرة القدم المُحببة لينا كلنا، ولكن هل صدقت تخوفاتنا؟ هل فعلًا أول لعبة في سلسلة EA الجديدة مكانتش على مستوى التوقعات؟ الإجابة قطعًا لا وهنعرف ده مع بعض في مراجعتنا وتقييمنا للعبة.

أسلوب اللعب

مبدأيًا كده لو انت جاي من FIFA 23 وفاكر إن الجيمبلاي متغيرش، فأحب أقولك استعد للمفاجأة، EA FC 24 مختلفة تمامًا عن كل ألعاب فيفا اللي قبل كده وده هتحس بيه من أول لحظة ليك في أي ماتش لأي طور لعب، وده بسبب تقنية Hypermotion V الجديدة والقادرة على تقديم أنماط لعب تحاكي العالم الحقيقي واللاعبين وحركاتهم، عشان يُترجم ده في الماتش لأداء أقرب ما يكون للواقعية.

الهجوم

سرعة اللاعبين بقت مهمة جدًا في النسخة دي أكتر من أي لعبة فيفا قبل كده، والفروقات بقت واضحة بين اللاعبين اللي بيمتازوا بسرعة فوق الـ 90 واللاعيبة التانية. الضربات الرأسية والـ Power Shots بقت أحسن مقارنة كتير مُقارنة باللعبة اللي فاتت وده بسبب إنها أصبحت أوتوماتيكية أكتر بعد ما كانت مانوال ومُزعجة جدًا في الحقيقة.

بالنسبة للتمرير، فحدث ولا حرج! بقى جميل جدًا وسلس ويطمّعك تلعب جيم تكتيكي حلو قصاد خصمك وتخنقه بالتيكي تاكا، العرضيات بقت أكثر دقة والكيرف بتاعها بقى مظبوط بشكل أفضل، والركنيات في الحقيقة بقت ممتازة وعادي تعتمد عليها كمُفتاح لعب مُهم.

فيه اختلاف في جري اللاعبين بشكل ملحوظ، وده بسبب تقنية Accelerate 2.0 اللي بتوفّر أنماط جري جديدة تختلف من لاعب للتاني وفقًا لنوع جسمه وشكله وحجمه، وعايز أقولك إنها واقعية جدًا في الحقيقة وأقرب ما يكون للي بنشوفه في المباريات الحقيقية، وده بيضيف حماس ومُتعة أكتر للجيمبلاي بلا شك!

الدفاع

انسى بقى الدفاع في نسخ فيفا اللي فاتت، وركّزلي على التدخلات والاعتراضات في EA FC 24 اللي وصلت لمستوى جديد تمامًا! في البداية أحب أقولك إنك لو لاعيب بتعرف تدافع كويس في اللعبة، فـ أنت هتضايق خصمك وهيكون عندك القدرة على إيقاف خطورة أجنحته ومهاجميه وده بفضل مهارات دفاعية جديدة بتدي المدافعين أفضلية ملحوظة في الصراعات الهوائية والالتحامات الثنائية.

تمركز المدافعين نفسه بقى أفضل بشكل كتير وواضحة عليه لمسة الذكاء الاصطناعي اللي ساهم في تطويره، وده بعد ما كانوا أشبه بالزومبي تحديدًا في فيفا 23، طبعًا الموضوع لسه مش بالشكل المثالي المطلوب ولكن فيه قفزة ملحوظة وتحسن في الجزئية دي.

فيه تقنية جديدة في الدفاع اسمها Kinetic Shielding، بتدي عُمق أكتر لمهام المدافعين وبتساهم في تحسين قرايتهم لتحركات لاعبي الفريق الخصم، كلما كان المدافع بتاعك قوي، زادت قدرته على حماية الكرة والحفاظ عليها بشكل أفضل، ده طبعًا هيدي الأفضلية للمدافعين أصحاب البنية الجسدية القوية زي فان دايك وروديجير، بعد ما كانت أغلب التفضيلات رايحة ناحية المدافعين اللي بيمتازوا بسرعة معقولة زي ميليتاو وكوندي وتوموري.

خليني أقولك إن التمرير بشكل عام والمراوغة واستخدام مهارات الدريبل بقت أصعب من النسخ اللي فاتت، على الرغم من إن ده ممكن يضايق بعض الناس، إلا أنه أتاحلي فرصة شخصيًا إني أجرّب وأدوّر على حلول تانية في الماتش، أستغل الكرات الثابتة مثلًا أو العرضيات الدقيقة، مننساش الثروهات برضو اللي بتفك أي تكتلات دفاعية لو اتلعبت في الوقت الصح.

الأداء والرسوميات

جرافيكس اللعبة كان عليه جدل كبير وخصوصًا بعد تريلرز اللعبة على مدى الشهور اللي فاتت، ولكن بطمنك إن الأداء الرسومي عظمة على عظمة وهتحس كده إن الملعب نضيف ونابض بالحياة والألوان، وجوه اللاعيبة أقرب ما يكون إنها تكون حقيقية وتفاصيل الشكل والجسم وكل حاجة! بصراحة أنا منبهر من الجرافيكس في اللعبة، واللي زاد انبهاري هي الطفرة الثورية في تصميم وشكل القوائم اللي بقت سلسة ومُريحة للعين وسهلة التنقل، ده بيحصل مشكلة كانت عاملة صداع مُزمن للاعبين في جميع نسخ فيفا السابقة.

بس طبعا ما زال فيه بعض المشاكل بخصوص أوجه اللاعيبة المغمورة، اللي تحس إنهم استسهلوا بشكل مُبالغ فيه في تصميمهم وإضافة تفاصيل مظهرهم بشكل صحيح للعبة، ولكن كل ده ممكن حله في التحديثات المستقبلية.

أوعدك إنك هتستمع بالتجربة البصرية في EA FC 24، وهتنبهر بمشاهد غرف المُلابس والجماهير في المدرجات وأنيميشن الحكم من منظور الشخص الأول ساعة ما بيتكلم مع اللاعيبة، تفاصيل المستطيل الأخضر والشبكة والبانرات الإعلانية، بصراحة فيه طفرة رسومية محترمة في اللعبة يجب الإشادة بيها.

أوضاع اللعب

الكارير مود (نمط المدير الفني)

منقدرش ننكر إن الكارير مود ليه مكانة خاصة في قلوبنا كده من زمان، لإنه بيساعدنا نتقمص شخصية بيب جوارديولا ونمارس لعبة كرة القدم بس من منظور مختلف من على مقاعد البدلاء، بصراحة مكانش فيه جديد في الطور ده على مدى النسخ اللي فاتت بس الوضع اختلف في EA FC 24.

أقدملك نظام الإدارة الشامل، وده سيستم جديد بتعتمد عليه اللعبة السنادي، يشمل مميزات كتيرة هدفها زيادة مستوى إنغماسك في اللعبة وإدارة فريقك، ومُحاكاة دور المدير الفني الحقيقي في أفضل شكل ممكن، ودي أبرز الإضافات الجديدة

Tactical Vision

بتسمحلك تطبق الفلسفة التكتيكية الخاصة بيك وتحاول تكيّفها مع هوية النادي اللي أنت بتدربه، زي أسلوب التيكي تاكا الشهير لبيب جوارديولا، تكتيك Gegenpressing المُميز بيه يورجن كلوب، Park the Bus اللي أول من قام بتطبيقه كان جوزيه مورينيو، وأنماط تكتيكية أخرى هتساعد في اعتمادك على فلسفة تدريبية مُحددة.

Tactical Vision Scouting

 ده نظام استكشاف جديد هيساعدك إنك تلاقي اللاعيبة اللي بتناسب أفكارك التدريبية، فمثلًا لو بتحب التيكي تاكا، هيساعدك النظام الجديد على استكشاف لاعيبة عندهم رؤية تكتيكية ومهارة عالية في التمرير.

نظام تدريب جديد

في وضع الكارير مود للعبة EA FC 24، بقى تدريب اللاعبين مختلف نوعًا ما، هيتم تقسيم اللاعبين إلى مجموعات بناءً على مراكزهم  في الملعب وكل مركز في الفريق هيتم تعيين ليه مُدرب متخصص يساعد على تطوير أداء اللاعيبة اللي بتلعب في المركز ده.

هيبقى ليك القدرة على اختيار المدربين دول طبعًا، وكل ما كان إختيارك صائب، كل ما لاعبين فريقك هياخدوا تعزيز رهيب في طاقاتهم ونقاط مهاراتهم، وأنت نفسك هتاخد XP، وبالتالي دورك مبقاش مُقتصر على مهامك الأساسية فقط في النادي.

الاستعدادات قبل المباراة

ولإن تظبيط الشغل أهم من الشغل، بقى فيه أوبشن إن يتم توفير ليك تقارير قبل الماتشات، بتخليك تطلع على التشكيلات المتوقعة لخصومك، أهم عناصرهم الخطيرة، أسلحتهم التكتيكية ومفاتيح طرق لعبهم، وأسرار تانية كتير هتساهم في قرايتك بشكل أفضل للمنافس. برضو فيه إضافة جديدة عجبتني جدًا في الحقيقة وهي Match Ready واللي بتتيح ليك إنك تقعد مع لاعبي فريقك قبل المباراة المباشرة وتذاكروا الخصم جيدًا وتوجه لهم النصائح المطلوبة.

اللحظات الديناميكية

واللي بتخليك تكون جزء من مشاهد مميزة ولحظات جميلة زي حفلة الكرة الذهبية واختيار جوائز الأفضل كل موسم، ومننساش طبعًا المؤتمرات الصحفية والتصريحات بعد المباراة!

نمط اللاعب

نمط اللاعب في طور الكارير مود نال إعجابي برضو في الحقيقة ودي أبرز التغييرات الإيجابية:

وكلاء اللاعبين: هتقدر من خلال الإستعانة بالوكلاء على رسم المسار الصحيح ليك في مسيرتك المهنية. يعني مثلًا لو عندك تارجت معين إنك تحترف في نادي كبير، ممكن تتناقش مع وكيلك واللي هيتولى مهمة التواصل مع النادي ده وعرضك عليه وهيبذل كل جهده إنك تحقق هدفك.

خيارات تخصيص أكتر تنوعًا بشكل ملحوظ وأقرب ما يكون للواقعية واللي بتتيح ليك الإهتمام بأصغر جزء من التفاصيل المُتعلقة باللاعب بتاعك زي الوشم مثلًا والنظارات الواقية والأقنعة وكل التفاصيل الصغيرة دي.

الألتيميت تيم

نيجي بقى للطور الأهم في اللعبة واللي مشاعرنا مختلطة ناحيته، أحيانًا نبقى سُعداء ومبسوطين جدًا، وبعدها بشوية ممكن الموضوع يقلب بغضب عادي لو حظ الباكات مش أفضل حاجة، ولكنه بلا شك أهم شئ في اللعبة كلها وأكتر وضع اللاعبين بتجربه وفي السطور الجاية هنستكشف مع بعض إيه أبرز الإضافات الجديدة:

وضع Evolutions الجديد: ميزة جديدة في Ultimate Team بتُتيح ليك ترقية اللاعيبة بناءً على معايير مُحددة واللي بيساعد في تطوير فريقك وتكوين رابط شخصي بينك وبينه لإنك بتختار اللاعيب اللي عايز تطوره من البداية وبتنطلق معاه في رحلة لغاية ما يبقى أحد نجوم الفريق.

مش ريت اللاعب بس اللي هيتطور، لا دي كل إحصائياته تقريبًا، طاقاته الداخلية ونجوم المهارة والقدم الضعيفة والسمات المميزة ليه طبعًا، من الآخر اللاعب في البداية هيكون حاجة، وعلى طول مسار الرحلة، هيتطور بشكل مُبهر!

أحب أنوه إن تصميم الكروت اتغير بالكامل، الطاقات بقت مصفوفة بشكل أفقي جنب بعض وتحتها هنلاقي علم النادي وجنسية اللاعب ولوجو الدوري، أنيميشن فتح الباكات اتغير برضو، بقى أكتر فخامة بصراحة وهيبة كده ومش متخيل ساعة ما ينزل فريق الموسم هيبقى عامل إزاي، وبرضو ميزة جديدة مهمة وهي إن الباكة الواحدة بقى ممكن يطلعلك منها اتنين لاعيبة ووك أوت وده بنشوفه للمرة الأولى.

أنواع سرعات اللاعيبة اللي اتناقشنا فيها فوق، ليها تأثير مهم في الألتيميت تيم، ده لإن كل لاعب بقى ليه أسلوبه الفريد في الجري والتمرير والتصويب والمراوغة وكل الحاجات دي وده بناءً على نقاط مهارة قابلة للتطور، مش زي الـ Traits المُعتادة اللي اتعودنا عليها في النسخ اللي فاتت.

بالكلام عن التغييرات في الألتيميت تيم، خلونا نرحب بالعنصر النسائي اللي بقى مُتاح رسميًا إنك تلعب بيهم في فريقك عادي، بجانب طبعًا شرائهم وبيعهم واستخدامهم في التحديات طبعًا. إضافة روشة طبعًا منقدرش ننكر، بس مضافتش كتير على مستوى الإثارة والحماس، مش قادر أقتنع إن هي دي طاقاتهم في الحقيقة، وبشوف تناقض كبير في الماتشات ما بين الطاقات والأداء، على العموم إضافة طيبة معنديش مشاكل معاها، وأفضل حاجة إنك ليك الحرية في تشكيل فريقهم بدونهم.

بصرف النظر عن كل التغييرات اللي ناقشناها، يفضل الألتيميت تيم زي ما هو بدون أي تغييرات جوهرية، ما زال عندنا نفس نظام الديفيجن رايفلز والفوت شامبيونز والسكواد باتلز، فيه أخطاء مستفزة طبعًا في طور رايفلز بالتحديد وأحيانًا بتحس إن الماتش مجرد سكربت، ولكن أعتقد أن التحديث الجاي هيحل المشكلة دي.

في النهاية

EA FC 24 هي لعبة محترمة بكل ما تحمله الكلمة من معنى، مش خروج عن المسار إطلاقًا زي ما توقع البعض بعد انفصال EA عن FIFA، بل بالعكس اللعبة بتستمر في نفس المسيرة، وبتيجي مع تطويرات كتيرة ومميزات أضافت جدًا للعبة.

يمكن لعبة FIFA المُعتادة اللي متعودين عليها كل سنة بقت مش موجودة، بس عشاق السلسلة مش هيحسوا بأي تغيير على الإطلاق، عشان EA Sports FC 24 نجحت باقتدار في إنها تستثمر في نجاح الألعاب اللي فاتت بشكل مثالي. لغاية دلوقتي، اللعبة واعدة جدًا، وممكن جدًا تحقق نجاح أفضل من فيفا 23 اعتمادًا على مدى نجاح طور Ultimate Team والإهتمام بيه.

بشكل عام، أي شخص كان مستني لعبة FIFA التقليدية، مش هيحس بخيبة أمل إطلاقًا، عشان اللعبة الجديدة لسه بتتشارك نفس الجذور والأسس مع الألعاب الأصلية، مع بعض اللمسات الجديدة المضافة، وتحسينات رسومية لتحقيق أقصى استفادة من منصات الجيل الجديد

تقييم اللعبة

8.5/10