Articles, Console News, Events, Gaming News, News

PlayStation Showcase 2021 مُلخص وأراء حول حدث

blank

سوني عملت بث مباشر عملاق امبارح وقدمت مجموعة من الألعاب القوية الي هتصدر لمنصتي PlayStation 4 و PlayStation 5 خلال الكام السنة الجايين، النهاردة احنا هنتكلم عن أهم الألعاب الي كانت موجودة، خاصةً وإن كان في بعض الألعاب الي ملهاش لازمة أوي ومتستحقش اننا نتكلم عنها بشكل كبير.

blank

أول لعبة هنبدأ بيها هي واحدة من مفاجآت الحدث والي مفيش تفاصيل عنها كتير وهي لعبة Wolverine. طبعًا الشخصية نفسها مش محتاجين نتكلم عليها، والي اتأكد ان اللعبة هتكون من تطوير استوديو Insomniac Games وهتصدر على PlayStation 5 مش قبل 2024. اللعبة هتكون من منظور الشخص الثالث وهتركز بشكل رئيسي على تقديم قصة مميزة.

blank

النهاردة شوفنا أول استعراض رسمي من لعبة God of War Ragnarok المنتظرة والي هتصدر في سنة 2022. اللعبة هتكمل أحداث جزء 2018 بـ Kratos و Atreus والأعداء الرئيسيين هيكونوا فريا وThor. من ناحية الجرافيك وأسلوب اللعب فا مفيش فرق كبير أوي بين اللعبة وبين لعبة 2018، ولكن المهم اننا هنشوف نهاية القصة ونهاية الحضارة الاسكندنافية. اللعبة هتصدر في 2022 والحلو انها هتصدر كمان على PlayStation 4 مش هتكون حصرية PlayStation 5 بس.

blank

لعبة Forspoken هي و Ghostwire Tokyo نزلهم إعلانات جديدة أخيرًا واتأكد ان كل لعبة فيهم هتصدر على الجهاز خلال اوائل سنة 2022. اللعبتين هيكونوا حصريات مؤقتة على منصة PlayStation 5  وده معناه انهم هيصدروا على Xbox Series X و S خلال 2023 أو بعدها. كمان اللعبتين هيصدروا في نفس يوم الإصدار على منصة الحاسب الشخصي  فا لو معاك PC محترم مش هتفوت أي تجربة منهم ومش هضطر تستنى لحد ما ينزلوا على الاكس بوكس.

blank

لعبة العربيات Gran Turismo 7 كان بقالنا فترة كبيرة مسمعناش أي تفاصيل عنها، ولكن الشركة أكدت امبارح انها هتصدر على PlayStation 4 و PlayStation 5 في 4 مارس 2022 وهتقدم تجربة سباقات محترمة زي الي اتعودنا عليها دايمًا من سلسلة Gran Turismo في كل الأجزاء الي فاتت.

blank

آخر جزئين نزلوا من سلسلة Uncharted وهما الجزء الرابع والجزء الفرعي The Lost Legacy هتوصلهم نسخة ريماستر في أوائل سنة 2022، النسخة ديه مش هتصدر بس على منصة PlayStation 5 بل هتصدر كمان على الحاسب الشخصي وبكدة تبقى رابع لعبة من سوني تصدر على المنصة بعد Death Stranding و Days Gone و Horizon Zero Dawn.

blank

أنا قولت اسيب اللعبة ديه للآخر لإنها كانت الأهم بالنسبة ليا، سوني كشفت بشكل رسمي عن لعبة Spider Man 2 والي هتكون من بطولة Peter Parker و Miles Morales كمان. العدو الرئيسي في اللعبة هيكون شخصية Venom ومتقدم بشكل قوي وشرير زي أفلام Venom الأخيرة. بالمناسبة متنسوش ان فيلم Venom Let There be Carnage هينزل في 1 أكتوبر السنة ديه. لعبة Spider Man 2 هتصدر بشكل حصري على PlayStation 5 خلال سنة 2023.

الخلاصة ان سوني قدمت مؤتمر جامد جدًا، اعلنت عن ألعاب جديدة وشاركت بتفاصيل عن ألعاب الناس كلها كانت مستنياها. لو انت معاك PlayStation 4 فإحنا بننصحك انك تستنى لإن معظم الحصريات الي جاية لمنصة PS5 زي God of War Ragnarok و Gran Turismo 7 و Horizon Forbidden West هيصدروا على PlayStation 4 كمان.

الوقت الأنسب للتحديث هيكون في اواخر 2022 أو أوائل 2023 مع إصدار ألعاب زي  Spider Man 2 و Wolverine وغيرها من العناوين الضخمة الي سوني مجهزاها.

Ahmed Yousry

About Ahmed Yousry

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.