مراجعة وتقييم

Payday 3

لو بتدور على لعبة فيها عمليات سطو مسلح على بنوك تقدر تخطط فيها قبل بداية عملية السرقة وتقدر تلعبها مع صحابك كمان، يبقى خليني أقولك يا صديقي إنك في المكان الصح لأن النهاردة احنا هنتكلم عن الجزء الثالث من لعبة السطو الشهيرة Payday 3 اللي بقالنا مستنيينها سنين كتير مستنيينها لكنها أخيرًا نزلت وقدرنا نلعبها بعد مرور 10 سنين على نزول الجزء الثاني من اللعبة، والنهاردة هنقدم لكم مراجعتنا للعبة Payday 3 فا كفاية كلام لحد كدا ويلا بينا ندخل في مراجعتنا علطول.

قصة اللعبة

قصة لعبة Payday 3 تعتبر مش مهمة اوي زي أول جزئين لأنها في النهاية لعبة تعاونية القصة فيها متهمش الشخص اللي بيلعب لأنه بيبقى مركز على أنه يستمتع مع أصحابه والمهم بالنسباله في الأخر هو أنه الجيمبلاي يكون ممتع وبيقدم حاجات جديدة عن الجزء الثاني خصوصًا إنه عدى 10 سنين كاملين على اخر جزء من السلسلة دي. القصة بشكل عام بتتكلم عن عصابة Payday واللي كانوا اعتزلوا حياة الجريمة بعد ما جمعوا ثروة كبيرة لكن لسبب ما خسرت العصابة الثروة دي وعشان كدا في الجزء الثالث رجعوا من تاني لحياة الجريمة عشان يجمعوا ثروة تاني عن طريق الدخول في عمليات سطو مسلح خطيرة وده بعد ما خسروا كل فلوسهم اللي جمعوها؛ وأما عن الطريقة اللي بيتم سرد القصة بيها فهي من خلال فيديوهات قصيرة بين المهام المختلفة في اللعبة – هنتكلم عن المهام في الفقرة الجاية – وتلك المقاطع عبارة عن صور ثابتة تتغير طوال الفيديو بجانب مقاطع صوتية لشخصيات اللعبة.

جيمبلاي ومحتوى اللعبة

نيجي بقى دلوقتي للنقطة الأهم في لعبة Payday 3 وهي الجيمبلاي والمحتوى اللي بتقدمه اللعبة وعشان هي لعبة تعاونية في الأساس فدول هما العناصر الأهم في اللعبة. ما زالت اللعبة بتقدم نفس الجيمبلاي اللي شوفناه في الجزئين اللي فاتوا فهي عبارة عن لعبة تصويب أركيدية غير واقعية ولا يمكن مقارنتها بألعاب زي Call of Duty أو Battlefield على سبيل المثال، وبالرغم من تشابه نظام التصويب بين الجزء ده والجزئين اللي فاتوا فاللعبة بتقدم تحسين ملحوظ على نظام التصويب واللي ساعد على كدا هو تنوع الأسلحة فلو كنت استمتعت بأخر جزء فهتستمتع أكثر من Payday 3 وهتقضي وقت ممتع.

ومن الحاجات اللي خلت الجيمبلاي أفضل من أخر جزء هو تواجد بعض الإضافات الجديدة عليه ومن أهم الإضافات اللي شوفتها خلال تجربتي للعبة الفترة اللي فاتت هي التسلل فدلوقتي تقدر تنهي مهمة كاملة بالتسلل بس أو بأسلوبك واللعبة مش هتجبرك على إتباع أسلوب معين فهي بتديك الحرية أكثر من الجزئين اللي فاتوا. ومن الجدير بالذكر برضو للناس اللي ملعبوش أي أجزاء من سلسلة Payday إن الجزء الثالث بيقدم نظام لعب تعاوني فقط (PVE) أو ضد الذكاء الاصطناعي ومبتقدمش أي أطوار لعب تنافسية (PVP) أو ضد لاعبين حقيقيين وهو نفس نظام الأجزاء الأخيرة، وهو اللي بيعني إنك تقدر تتعاون مع صحابك أو لاعبين تانيين عشان تخلص مهام السطو واللي بيوصل عددهم لأربع لاعبين في كل مباراة كحد أقصى.

أما عن المحتوى اللي بتقدمه اللعبة وقت نزولها فهي بتضم 8 مهمات مختلفة وقت نزولها مع إمكانية زيادة العدد من خلال دعم اللعبة بعد نزولها في الأسواق بشكل رسمي، ومن بين المهام دي مهمة Gold & Sharke ومهمة Under The Surphaze ومهمات اكتر تقدر تكتشفهم بعد تجربتك للعبة. في كل مهمة من الـ 8 هتعمل عملية سطو على بنك مختلف في خريطة مختلفة من حيث التصميم والبيئة وكل حاجة ، وده مع اختلاف طريقتك في إنهاء كل مهمة. 

طبعًا في بداية كل مهمة بتكون إنت وصحابك برا مكان السرقة وكل اللي عليكوا تعملوه هو التسلل والدخول لمكان السرقة أو البنك بس طبعًا الموضوع مش بالسهولة دي لأن في حراس كتير واللي زاد مستوى صعوبتهم بسبب زيادة مستوى الذكاء الاصطناعي ووجود انواع مختلفة من الأعداء، أما لو كشفك حارس خلال دخولك لمكان محظور هياخدك برا مكان السرقة المحظور ويأما تمشي وراه أو تواجه ولو اخترت المواجهة هتتفاجئ بوصول دوريات الشرطة لمكان. الموضوع مش بيقتصر على عمليات السطو بس ففي كل عملية سرقة بتكون في مهمات جانبية مختلفة زي إنك تحتجز رهائن لمنع الشرطة من إنهم يوصلوا لمكانك ده برضو بجانب إنك تبحث عن رموز الخزنات اللي هتسرق منها الفلوس، برضو مع إمكانية التفاوض مع الشرطة عن طريق تبديل الرهائن اللي انت احتجزتهم ومهام اكتر تقدر تكتشفهم لما تلعب.

التخصيص والشخصيات

في البداية اللعبة بتقدملك 6 شخصيات بس تقدر تلعب بيهم في المهام – هيزيد العدد مع التحديثات – كل شخصية عندها قدرات مختلفة بتخليها مميزة عن الباقي، بس من مميزات اللعبة إنك تقدر تعمل تخصيص لأي شخصية من الشخصيات الستة بداية من الشكل والزي وحتى المهارات، وبما إننا ذكرنا المهارات فاللعبة بتقدملك 17 نوع مختلف من المهارات تقدر تختار بينهم 4 مهارات في وقت واحد عشان تبدل بينهم بسرعة وكل فئة بتقدم مهارات بتساعدك في المهمات.

نيجي بقى لنقطة مهمة جدًا وهي إن اللعبة فيها عيوب واضحة ومؤثرة على تجربة اللعبة لكن معظمها عيوب يقدر المطور يحسنها من خلال تحديثات في المستقبل زي بعض المشاكل التقنية ومشاكل الإتصال خلال المباريات، ودي حاجات قابلة للتحسين، لكن في عيوب ميقدرش المطور يصلحها بتحديثات زي وجود Microtransaction أو عناصر تقدر تشتريها من جوا متجر اللعبة بفلوس حقيقية لتطوير الأسلحة أو تغيير شكل الشخصيات، بس في النهاية هي عيوب مش هتكون مؤثرة اوي على تجربتك.

أخيرًا، الجرافيكس والصوتيات

بتقدم Payday 3 تحسين ملحوظ على الجرافيكس سواء كان الشخصيات أو البيئات أو الأسلحة ومع إن الرسوميات لا تقارن بألعاب الجيل الحالي فهي مش سيئة ومناسبة لأجواء اللعبة وأفضل بكتير من الجزئين اللي فاتوا، أما بقى عن الصوتيات فاللعبة بتقدم صوتيات من مستوى عالي بتلعب دور كبير في متعة اللعبة فالموسيقى حماسية وقادرة على دمجك مع أجواء المطاردات والسرقات المتواجدة في اللعبة، وطبعًا الأداء الصوتي لشخصيات اللعبة معمول بشكل كويس جدًا.

في النهاية

دلوقتي وصلنا لنهاية مراجعتنا للعبة Payday 3 وعشان تقدر تقرر اللعبة مناسبة ليك ولا لا، فأحب اقولك يا صديقي إنك لو استمتعت بالاجزاء اللي فاتت وبتجب أجواء السرقات والمطاردات البوليسية وعاشق لأفلام السرقات فاللعبة هتكون مناسبة ليك وهتستمتع جدًا، أما بقى لو عكس اللي قولته فا اللعبة مش هتناسبك؛ لكن الخبر الحلو إنك تقدر تلعبها ببلاش عن طريق خدمة Xbox Game Pass لو منصتك الأساسية PC أو Xbox،. وتقدر تشتريها على منصة PS5 بسعر 40 دولار وهو مناسب لتجربة اللعبة.

وبنفكرك إنك تقدر تشترك في Xbox Game Pass أو تشتري Payday 3 وألعاب تانية كتير من خلال متجرنا الخاص.

تقيمنا النهائي لـ Payday 3

 8/10