إطلاقة فورزا هورايزون 5 بتمثل واحدة من أفضل إطلاقات العاب السباقات على مر التاريخ
من حيث الجودة اللى بتقدمها اللعبة في كل جنب منها ومن حيث الأثر الايجابى اللى بتسيبه في كل مرة بتقفل فيها اللعبة عشان مضطر تقوم تنام او تروح الشغل او تنزل درس ودا بعد تجربة اكتر من 50 ساعة لعب
من تاريخ السلسلة لاى حد جرب جزء من الأجزاء السابقة هيعرف ان فورزا هورايزون بتقدم أكتر تجربة بتحتوى على محاكاة ممزوجة بالاركيد اللى بيضيف متعة لألعاب السباقات ويبعدها عن ملل العاب المحاكاة
الجزء الخامس بياخد الأثر الايجابى للسلسلة و بيعلى من الجودة فكل اشكالها من حيث الجرافيكس والجيم بلاى وعالم اللعبة المفتوح والمليان أنشطة
على غرار الجزء التالت اللى كان فاستراليا والرابع في بريطانيا فالجزء الخامس بياخدنا للمكسيك اللى بيتم تقديمها بشكل مبهر جدا ومتنوع من حيث البيئات والمهمات فانت مش بتبدأ اللعبة كمشارك في احتفالات الهورايزون Festivals انت كمان بتساعد في انشاءها وتقديمها من خلال سباقات مختلفة في انحاء الخريطة
لعبة فورزا المرادى بتقدم Horizon Chapters مختلفة عن بعضها ، وكل شابتر منهم بيكافئك بنقط تسمحلك تفتح سباقات جديدة ودا فحد ذاته ممتع جدا لأنه بيبعد عن خطية الأحداث أو ان اللعبة تجبرك على سيناريو مفروض تمشى عليه والنتيجة انك تقدر تعمل أي حاجة بتحبها من بعد مقدمة اللعبة
فكرة العالم المفتوح اللى بتقدمه فورزا وكمية الأنشطة والسباقات المتاحة مش جديدة علينا حتى اللى مالعبش اكيد سمع عنها ، بس اللى بيقدمه الجزء دا بياخد التفاصيل دى لمستوى أعلى واحسن من قبل كدة ، من سباقات السرعة لشوارع لمدينة لسباقات الصحراء والمغامرات فى الأدغال دا طبعا غير العالم المفتوح اللى تقدر تتمشى فيه وتتسلى في drift zone او speed traps او الBoards بتاعة الxp و fast travel الموجودة بأعداد كبيرة ومتنوعة ، غير عربيات Barn اللى بتدور عليها ودى كلها أنشطة معروفة من قبل كدة
الجديد هنا نشاط زى ال Stories اللى بتقدم مهمات مختلفة ب شخصيات جانبية وبتبقى مابين 9 ل18 سباق متنوع فكل story منهم وعشان أكون صريح مش كلهم بنفس المتعة وهتزهق لو عملت كتير منهم فمرة واحدة
من الحاجات الظريفة والمهمة بردة من بداية اللعبة بتختار شخصيتك سواء male او female وبتختار صوت لها واللى بيساعد بنسبة كبيرة جدا فحوارات اللعبة وتحس ان ليك شخصية بتتفاعل مع اللعبة بدل مابتسمع بشخصية خرساء ، أي نعم الحوارات فاللعبة تعتبر ملهاش لازمة من الأساس غير توضيح وشرح الحاجات الجديدة فالبداية انما بعد كدة هي حرفيا عبارة عن يلا نلعب السباق دا ، يلا نكتشف المكان الجديدة دا ، يلا نجرب العربية السريعة دى وما الى ذلك بس هو فالاول والأخر عامل جو
نقطة تانية وهى ال showcase events ودى بتبقى السباقات الضخمة او المميزة لسلسلة فورزا عموما اللى بتسابق فيها طيارة او قطر وغيرهم متقدمة بشكل حلو كالعادة بس مش عشان هي ممتعة أو فيها اختلاف بس عشان اللعبة نفسها ممتعة وعبقرية في اللعب والتقديم واحنا لحد هنا يعتبر خلصنا من تقديم اللعبة فتعالو نتكلم شوية عن الجيم بلاى
واحدة من أكتر مميزات لعبة فورزا هي الميكانكس وأسلوب اللعب اللى بتقدمه ومايحتويه من متعة فمهما كان نوعية السباق او العربية او النشاط فانت ماسك الكنترولر وحرفيا مستمتع ودا اللى بيعمله فريق تطوير ناجح زى playground هو بيبنى لعبة على أساس انها تبقى Fun to play انا بلعب عشان استمتع واتبسط وانبهر وابعد عن الروتين والملل بوجود اختيارات كتير وتجارب وانشطة وسيارات كتير من كل الأنواع ، وكمان نقطة مهمة جدا وهى الجوائز بعد السباقات ونظام التقدم في اللعبة مُرضى جدا عكس العاب تانية تلعب بالاسبوع وتاخد باكات تعملها كويك سيل
مود الاونلاين هو كمان بيقدم أنشطة ممتعة جدا وعكس السنة اللى فاتت مش محتاج vpn فتقدر تلعب مع اصحابك أو لواحدك سواء سباقات بكل أنواعها او العاب زى دراج ودريفت وسيركت وسبرينت أو حاجة زى Eliminator ودا باتل رويال بين 72 لاعب بيخلص لحد 11 ويبدأ بينهم سباق بيكسبه اللى يوصل خط النهاية الا ان المشكلة الوحيدة فالاونلاين هو اى جيم فيه فريقين ضد بعض الماتش ميكنج مش بيكون منصف واحيانا يبقى فريق اكتر من التانى
فكرة مقدمة اللعبة بتجربة واحدة من أفضل السيارات في كل نوع بتحفزك مجرد ماتبدأ تلعب انك تحوش وتشترى عربية أحدث وقابلة للتعديل اكتر عشان تنافس احسن وتكسب اسرع عشان تشترى عربيات ال end game
نقلة اللعبة للمكسيك قدم بيئة مبهرة لان الخريطة واسعة ومليانة أنشطة وسباقات فكل شبر فيها وتنوع البيئات من الجبال للصحارى والشواطئ والمستنقعات لقلب المدينة غير المعالم السياحية وكل دا متقدم بشكل متقن ومليان تفاصيل بتستغل إمكانيات جهاز الاكس بوكس لأحسن درجة
زى ما الجانب الصوتى ليه من الاتقان مايستحق الإشادة في لعبة بالحجم دا حدث ولا حرج عن جمال الأصوات فيما يخص العربيات واختلاف كل محرك عن التانى او البيئة المحيطة
اللعبة بتقدم اختيارين في بدايتها وتقدر تغيرهم فأى وقت إما نمط الجودة Quality Mode ودا بيقدم دقة4k مع دعم وتعزيز كامل للرسوميات عشان يطلع أجمل صورة ممكنة ولكن شغال 30 فريم ، والاختيار الاخر نمط الأداء Performance Mode بردة 4k مع دعم ل60 فريم على حساب الرسوميات
في النهاية فورزا هورايزون 5 مع أكتر من 530 عربية وعالم مفتوح مبهر وتفاصيل متقنة بهذا الشكل تستاهل تترشح للقب لعبة السنة بدون مجاملة
مميزات
رسوميات مبهرة
أداء قوى وثابت
أنماط ممتعة متنوعة
عيوب
بعض التكرارية
لايوجد تطوير جذرى عن الجزء الماضى
