مراجعة لعبة
Gotham Knights
في ظل انتهاء سلسلة باتمان أركهام، والوضع الحالي للعبة أفنجرز وتبقي سنة كاملة على ما نشوف لعبة سبايدرمان الجديدة من سوني، ماكنش في وقت أفضل من ده لتقديم لعبة Gotham Knights من نفس مطور لعبة Arkham Origins، استوديو WB Montreal.
مش هتحتاج وقت كتير عشان تعرف إن اللعبة دي كانت رايحة في إتجاه مشابه جدًا لأفنجرز لكن من الواضح إن التاجيلات الكتير وإلغاء نسخة الجيل القديم كانوا الطريقة اللي حاول بيها الاستوديو النجاة من نقد لاذع حتمي لو كانت اللعبة خرجت للنور كلعبة أونلاين لوتر زي أفنجرز.
لحسن الحظ لعبة جوثام نايتس خرجت للنور كلعبة قصة بإمكانية كو أوب مع تركيز على اللعب الفردي وعناصره ولكن هل قدمت حاجة جديدة كلعبة سوبر هيرو؟ وهل تستحق التجربة؟ ده اللي هنعرفه!
القصة
في الحقيقة أنا مش عارف أبدأ منين بالكلام عن اللعبة دي. بس يكفي إنك تكون عارف إن اللعبة دي مفيهاش باتمان وده قرار طبعًا قرار جريئ جدًا من المطور محتاج تقدم حاجة قوية عشان تعوضه، وأقدر أقول إنه نسبيًا اتقدم حاجة قوية تعوض غياب باتمان، بمعنى إني ماكنتش بتمنى إني ألعب بباتمان طول أحداث اللعبة وكنت متقبل الأبطال اللي لعبت بيهم.
القصة بتتكلم على البات فاميلي بعد موت باتمان أثناء تحقيقه في قضية غامضة، وبيكون دورهم هو معرفة سبب موته، ومين قتله وليه وإيه تفاصيل القضية اللي كان بيحقق فيها. طبعًا الكلام ده بيقودهم للتعرف على التنظيم السري اللي بيحكم جوثام من قرون طويلة، وهو The Court of owls.
تقديم الشخصيات الجانبية كان قوي ومع الوقت بيتحسن على الرغم من سوء جرافيكس وتفاصيل وشوش الشخصيات، وكمان الأعداء كتير ومتقدمين حلو خصوصًا الCourt اللي بيحوم حواليهم كم من الغموض المثير للإهتمام، وبيكون هو مركز الأحداث والمهمات بتاعته هي أفضل مهمات في القصة و بتكون على هيئة تحقيق بينكشف فيه تفاصيل أكتر مع الوقت.
القصة فيها ميزة كبيرة عن سلسلة أركهام وهي إنها ممتدة على مدار فترة زمنية كبيرة وده بيديك مسافة لتطور الشخصيات والأحداث وتصاعد وتيرتها مع الوقت. في أيام في اللعبة هادية ومفيهاش أحداث كبيرة وفي أيام مشتعلة ومولعة ومليانة أحداث وده لإن اللعبة متقسمة على ليالي كل ليلة ليها أحداثها ومهماتها.
الجيم بلاي
هنا الكلام هيبتدي يبقى بين إشادة واستنكار لإن مش كل عناصر أسلوب اللعب حلوة. في حاجات كتير تحس إنها محطوطة بهدف الحشو أو مد عمر اللعبة زي نظام المقر أو الbelfry اللي بتضطر ترجعله قبل أي مهمة رئيسية وفي نهاية كل يوم بدون سبب مقنع. المقر ده هو مكان تواجدك طول ساعات النهار وفيه بيكون متاح التدريب على الحركات وتبديل الشخصية وبحص ملفات القضايا المختلفة وقراءة الميلات وبعض لحظات القصة الخاصة بالشخصيات اللي بتلعب بيهم.
المقر كان إضافة لطيفة بس مش فاهم ليه تجبرني أرجعله قبل كل مهمة كبيرة؟
اللعبة فيه مهمات جانبية على هيئة جرايم ودي بتتقسم بين التحقيق في جرايم، ومنع جرايم نهب وقتل وسرقات سيبرانية وحاجات تانية كتير. الحقيقة المهمات دي متصممة حلو ماقدرش أقول أبدًا إنها بتصميم سيء، بس بتتعاد كتير بشكل بيخليك تمل منها جدًا مع الوقت.
الحصول على المهمات دي بيكون بطريقة مثيرة جدًا للإهتمام. أنت كل ما تقضي على فرد من أي عصابة من العصابات الكتير الموجودة في جوثام، بتحصل منه على دلايل ومع تجميع عدد كافي من الدلائل بتعرف أكتر عن خطط العصابة اللي جاية وده بيكون على هيئة الجرايم مسبقة التخطيط، ودي هي مهماتك الجانبية.
طيب هل المهمات الجانبية دي ليها دور في القصة؟ أه ولا لأ..إزاي؟
أه لأن مع إتمام 10 مهمات بكل شخصية بتفتح خاصية تنقل قوية هنتكلم عنها بعدين، ولأ لإنك بعد ما تفتح التنقل بيكون ملهاش لازمة أوي المهمات الجانبية دي غير إنك ترقي من شخصيتك وتجيب xp تشتري بيه مهارات جديدة تخليك أقوى.
المهارات كانت رائعة ومتصممة حلو بس في حاجات ضرورية كانت مستخبية ورا كونها مهارة ومكانتش مفتوحة من الأول زي خاصية الgliding لكل الشخصيات، والinverted takedown وحاجات تانية كتير.
مهارات التنقل كانت متقنة التصميم وجميلة جدًا وفرقت معايا كتير في تجربة اللعبة، ولحسن حظي أنا فتحتها في الأول. بالنسبة لبات جيرل كانت إمكانية الgliding الشبيهة بباتمان، وبالنسبة لريد هود كانت خاصية double jump، وروبن كان معاه إمكانية الteleporting ودي كانت أكتر تصميم مجنون شوفته في اللعبة دي..فكرة برة الصندوق.
أما night wing فميزة تنقله اللي بيفتحها بعد منع 10 جرايم هي البات وينج ودي طيارة يقدر يطير بيها شبيهة بالمظلة بتاعة فورتنايت لكن بدون COOL DOWN.
الاختلاف بين الشخصيات في القتال كمان كان عنصر حاسم في رفع قيمة التجربة، أنت ممكن تزهق من المهمات الجانبية لو فضلت تعيدها بنفس الشخصيات لكن لو لعبتها بشخصيات مختلفة عمرك ما هتزهق، وهيفضل البطل اللي بتلعب بيه يتحسن مع الوقت والميزة الأكبر هنا إن النقط اللي بتكسبها بتتوزع على كل الشخصيات. يعني أنت دلوقتي لو كسبت نقطة، فهي مش نقطة واحدة هي 4 نقط..نقطة لكل شخصية وده بيخليك قادر تطور شخصيتك علاطول وتواكب بيها مستوى الأعداء.
وهنا هنروح لنقطة سلبية تانية للعبة…الأعداء متقسمين مستويات وده بيخليهم قادرين يمتصوا عدد لا نهائي من الضربات لو أنت أضعف منهم في اللفل..كده إنت مجبر تعمل المهمات الجانبية دي بالزوق أو بالعافية للأسف وده خيار تصميمي كسول وسيء.
المهمات الجانبية القصصية في اللعبة حلوة ومهمة زيها زي مهمات القصة، لكنها قليلة. أعداء زي مستر فريز وهارلي كوين وكلاي فيس بيظهروا كمهمات رئيسية ليها مسار ونهاية وبداية لكن ليه 3 زعماء فقط؟
معارك الزعماء في أركهام أوريجنز كانت أكتر ما يميزها، وهنا برضو معارك الزعماء حلوة بس مش زي أركهام أوريجنز للأسف.
الجيم بلاي في جوانب كتير تحسسك إن اللعبة دي كانت هتبقى لوتر، زي إمكانية تخصيص الأزياء زي لعبة أفنجرز تمامًا، في كم رهيب من البدلات القابلة للتطوير والتخصيص المظهري، وكمان في كم كبير من الحاجات القابلة للجمع والاستخدام في الكرافتينج بس التركيز عليها قليلة شوية، وكلها مسألة أرقام بتترفع مع الوقت..طول مانت أرقامك عالية أنت في السليم يا صديقي.في برضو إمكانية تخصيص للbat cycle واللي هتكلم عليها الفقرة الجاية. بشكل عام ماستخدمتش قوايم التخصيص والتطوير دي كتير لإنها كانت مملة وشكلها منفر من اللعبة، لكن في الجيم بلاي أمتع ما كان موجود هو القتال والمهمات اللي بتخليك توظف مهاراتك صح.
في قدرات اسمها momentum ودي عبارة عن قدرات خارقة بتفتح مع الوقت، كل ما تقتل أعداء أكتر كل ما تفتح معاك أكتر، والحقيقة هي قدرات رائعة ومعمولة حلو ده غير إنها مؤثرة جدًا في المعارك.
بمناسبة المعارك بقى، أسلوب التخفي كان متواضع ومتساب لشخصيات معينة تحديدًا باتجيرل وروبن بس حتى مع الشخصيات دي، التخفي تعبان وأضعف كتير جدًا جدًا من سلسلة أركهام.
أجمل ما في اللعبة كلها هي مدينة جوثام اللي متصممة بشكل بصري خلاب وممتع للعيب. مليانة تفاصيل وروح تخوف وتحسسك إنها مدينة ليها هيبة جدًا زي الكوميكس بتاعة باتمان القديمة. الحلو في المدينة المرة دي إننا لأول مرة بنشوفها حيوية وفيها سكان وعربيات ومشاة في الشارع. فكرتني بلعبة مارفل سبايدرمان لكن مع تفاصيل أقل شوية. لكن هي لسا جميلة برضو وهتكون مبسوط وأنت بتتنقل فيها سواء بميزة التنقل الخاصة بتاعة كل شخصية، أو بالbat cycle.
الموسيقى والأداء الصوتي
الموسيقى مش هتلاحظها أوي، وده جزء من جمالها هي مناسبة جدًا للعبة وأجواءها الهادية والغامضة، وبتتوظف صح في لحظات الأكشن. الأداءات الصوتية كمان ممتازة للشخصيات الأساسية والفرعية. أداء صوتي عجبني جدًا ولازم أشيد بيه هو صوت الفريد اللي كان معمول بشكل ممتاز فكرني بأجزاء باتمان أركهام.
الخلاصة
بشكل عام، جوثام نايتس لعبة فيها عيوب واضحة منها إجبارك على المهمات الجانبية، ووجود مستويات للأعداء والتخفي الضعيف، لكن الحقيقة هي اللعبة الوحيدة اللي بتسمحلنا نلعب بالبات فاميلي براحتنا وقصتها قصة أصلية مميزة جدًا وأحداثها بتحصل في واحدة من أجمل النسخ من جوثام. عشان كده بنصحك تلعبها بس تكون حاطت في اعتبارك إنها مش تكملة لسلسلة أركهام. وأه نسيت أقولك! اللعبة ممكن تتلعب مع صديق ليك CO-OP والجانب ده بيحسن التجربة بنسبة 500%!
التقييم النهائي
8/10
