Articles, Console News, Gaming News, News, Reviews

مراجعة لعبة Roller Champion

لعبة Roller Champions وهي لعبة مجانية متوفرة على كل المنصات حجمها لا يتعدى ال4 جيجا ونص

اللعبة دي قايمة على لعبة تقريبا من حضارة الازتيكا او خلينا نقول شبيها ليها وهيا عبارة عن فريقين الازرق و البرتقالي كل فريق مكون من 3 افراد من السكيترز (ايوا الي بتشوفهم في الزمالك و وسط البلد ولابسين باتيناج دول) لكن هنا بيتنافسو على اسرع فريق يجيب 5 نقط من خلال انو يمسك الكورة و يلف بيها التراك كلو من غير ماتتقطع منه ويجيبها في الشبكة و دا بيساوي نقطة في حاله لو الفريق لف مرتين كاملين 3 نقط لو 3 مرات يبقى 5 نقط و الماتش هيخلص فورا ساعتها وطبعا الفريق الخسران بيبقى منظره عره لو خسر بالشكل ده

بالنسبة لطريقة اللعب:

طريقة اللعب مش معقدة كتحكم مجرد ما تلعب ماتش او اتنين هتكون عرفت الدنيا لكن في بعض النقط محتاجه خبرة التفادي او دفع الفريق الخصم مثلا او انك تزود سرعتك عن طريق انك تطلع على جنب التراك المنحني و تنزل تاني الكلام ده كله بيتم بشكل سلس و سريع وممتع و ادماني

الرسوميات و الجانب التقني:

اللعبة بصريا بتعتمد على التوجه الكرتوني في رسم الشخصيات و البيئات بشكل بسيط و معتمد على الالوان المشبعة عشان تدي حماسة وكدا

من الجانب التقني اللعبة فيها مشكلة بسيطة وهيا تسقيط الفريمات في بعض الاحيان ودا غريب بصراحة جدا يعني لأن اللعبة بسيطة

نظام اللعب:

اللعبة بسيطة جدا فيها مود واحد تنافسي 3 ضد 3 في تراكيين اتنين بس و لما ترفع في المستوى هتفتح الRanked و موود تاني تتسلى فيه وتتدرب فيه بس مع وجود Season Pass للملابس وقصات الشعر و الجوانتيات وكدا و بشكل عام مع كل ماتش هتاخد نقط تقدر تشتري بيهم اللعبة فيها 9 اغاني كويسين بصراحة ويدخلوك في موود اللعب.

الخلاصة:

لعبة Roller Champions لعبة ممتعة وجميلة خاصة لو لعبتها مع اصحابك لكن نقص المحتوى في اللعبة كبير جدا و بيهدد استمرار اللعبة زي باقي العاب يوبي سوفت التنافسية

التقييم النهائي

7/10