مراجعة Cyberpunk 2077 (نسخة 1.52 الجيل الجديد)

المقدمة

لعبة سايبر بانك واحدة من اللعب الطموحة جدا و الي واخده هايب عالي جدا من حتى اول اعلان خالص ليها في سنة ٢٠١٢ لما نزل فيديو سينيمائي بسيط بس الفيديو ده وقتها كسر الدنيا ومن ساعتها والناس مستنيه على احر من الجمر مع تأجيلات عديدة لاقت غضب شديد من الجمهور ويمكن ده السبب الي خلى الأستوديد البولندي CD Projekt Red ينزل اللعبة وهيا مش جاهزة تماما اللعبة كانت كارثة تقنية خاصة علي أجهزة الجيل القديم،المهم بعد مرور اكتر من سنة على الاصدار اخيرا اللعبة الحقيقة نزلت مع التحديث 1.5 الي شقلب اللعبة من كل الجوانب،فخلينا نعمل مراجعة على نضافة اكننا ماشفناش إصدار للعبة قبل التحديث ده.

القصة:

القصة هنا هيا تقريبا اهم عامل في اللعبة كلها،بتحكي قصة V الي بتختارة يكون ذكر او انثي فى بداية اللعبة و بتختار اصله منيين هل هو من اولاد الشوارع ولا ابناء المؤسسات ولا من الرحالة اختيار واحد من دول بيأثر علي القصة شوية خاصة في بدايتها و في بعض الحوارات على مدار الأحداث،المهم قصة اللعبة بتحكي لما V بقى مرتزق وجاله سبوبة كبيرة من انه يسرق شريحة من بيت يارينوبو اراسكا و بسبب بعض المشاكل المشاكل هتضطر انك تحط الشريحة في دماغك والي هتكتشف انها بتحمل الوعي الرقمي بتاع مغني الروك المتوفي چوني سيلفرهاند (كيانو ريفييز-جون ويك) و الشريحة هتبدأ تستولي علي عقلك بشكل تلقائي مما يعني إنك بتموت وبتحاول تدور علي حل و بمرور الاحداث شخصية چوني هبتدأ تظهر علي شكل تهيؤات في العالم المحيط بشكل اكبر،بصراحة قصة اللعبة حلوة جدا ومختلفة عن اي حاجة الواحد لعبها قبل كدا و في كذا نهاية للعبة حوالي 7 نهايات.

الخريطة وعالم اللعبة:

اللعبة دي في حتة تانية،طريقة تصميم المباني و الاعلانات و لبس الشخصيات و تصمييم الشخصيات بالذات في اللعبة دي كان مميز بصراحة و العربيات و الأسلحة الغريبة زي بعض الاسلحة الي الرصاص بتاعها بيتتبع العدو او بيرتد من الاسطح و حوارات كتيره بصراحة فعلا تحسسك بأجواء مدينة في المستقبل بجد كل جزء من المدينة بيتميز بطابع مختلف زي منطقة ساحلية منطقة عشوائيات منطقة للناس الأغنية وكل منطقة ليها الريس بتاعها الي بيكلمك لما تدخلها يقلك لو عايز تعمل بيزنس معاه علي شكل مهمات جانبية اختيارية.

طريقة اللعب و المهمات:

في بعض الملحوظات هنا احب انوه عليها اولها لوسمحت ماتلعبش اللعبة علي صعوبة متوسطة لأنها بعد اخر تحديث اللعبة بقت سهلة جدا جدا شخصيتك هتبقى قوية جدا بشكل غريب هتلم كمية اسلحة و فلوس كتير جدا واصلا مش هتحتاج تصرف الفلوس علي حاجة لو حابب ممكن تخلص اللعبة من الLoot الي بتجمعة من الأعداء و هنا احب انوه علي تاني حاجة المهمات الجانبية يا جماعة ماتخلصش القصة الرئيسية غير لما تخلص الجانبية لأنها فعلا جميلة جدا ومرتبطة بالقصة او علي الاقل بالشخصيات الرئيسية في اللعبة و مش عارف بصراحة ليه المهمات دي اتفصلت عن القصة الرئيسية لأني لاحظت ان مدة تختيم اللعبة كقصة رئيسية من خلال تجربتي كانت قصيرة جداً علي لعبة RPG و بما ان اللعبة RPG فا في عناصر RPG كتير في اللعبة الأعتيادي يعني شجرة مهارات متنوعة جدا و امكانية التصنيع و البيع و الكلام ده حلو جدا بس طريقة اللعب نفسها فيها حاجة مش مظبوطة يعني انا حاسس ان اللعبة دي كانت المفروض تبقى من منظور الشخص الثالث مش الأول بس بشكل عام الGun Play و الShooting Mechanics كان حلو و ممتع

السواقة برضو بعد التحديث اتحسنت بشكل كبير

الصوتيات:

طبعا من الجوانب القوية جدا في اللعبة سواء التمثيل الصوتي الشخصيات الي كان ممتاز حتى حاجة زي الراديو الي فعلا الاستوديو المطور اهتم جدا بجزئية اختيار و تأليف اغاني مخصوص لجو اللعبة المستقبلي والي يمكن اكتر اغنية عجبتني فيهم اغنية Night City.

الجانب التقني:

دا اهم جزء في المراجعة لأن زي ما قلنا دي مراجعة للنسخة 1.5.5 والي اتصلح فيها واتغير و اتضاف حاجات كتير اقدر اقول اللعبة دلوقتي بقت لعبة ناضجة و مصقولة و المفروض اللعبة كانت تتأجل لحد دلوقتي لأن اي تحديث قبل التحديث ده المفروض كان يتسمى Early Access مثلا ومش غلط لو اتسمى كدا عشان الي كان يجرب يبقى عارف الي ممكن يحصل ،المهم انا ماوجهنيش اي جلتشات تقريبا او مشاكل تبوظ التجربة انا لعبت علي جهاز سيريز اكس اللعبة شغالة 4K Dynamic مع ٦٠اطار بس هوا في الحقيقة ثابت على 1440p مع سقطات في الفريمات بتحصل بشكل كتير شوية لما تتنقل بسرعة في المدينة و لتفادي حاجات زي كدا يعني للأسف كثافة العربيات و الناس قلت بشكل ملحوظ عن الطبيعي المدينة بقت نوعا ما فاضية بس على الجانب التاني الذكتء الاصطناعي اتحسن و رده فعل المارة في الشارع اتغير و تحسينات كتير جدا ملهاش حصر.

الملخص:

Cyperpunk 2077 لعبة طموحة قدرت توصل بعض من الطموح ده وكان كفاية انوا يخلي اللعبة من اروع العاب استوديو CD Projekt RED

8/10